Read Mongondow DATU MITA IMITÁNEA 16 Bible Online

DATU MITA IMITÁNEA 16 - Mongondow bible

DATU MITA IMITÁNEA 16

¹Dá nosingogdon in ki TUHAN kon i Nabi Yehu ki adí i Hanani, kai-Nia, “Poyaputdon kon i Baesa in koyow-Ku tanaa,

²‘Koḻipod in iko nion in deemanbí ki ine bo ki ine, táe iko in dinuí-Kudon nobaḻí itoi kon umat-Ku Israel. Tanaa in iko in binaradosadon ná ki Yerobeam bo nokopopisídon kon umat-Ku Israel binaradosa, dá nomuká in torú-Ku.

³Tuamai in yopúon-Kubí in iko takin motoḷuadímu notongkai ná inta pinomia-Ku kon i Yerobeam.

⁴Tombonu in baḷoimu inta matoi kon kotá in kaanon in ungkú, bo mosia inta matoi kon ḷuai in kotá in kaanon in ḷagapan.’ ”

⁵Koyow i TUHAN kon i Baesa bo kon motoḷuadínea tatua in pinoyaput i Nabi Yehu sin ki Baesa in nomiadon kon inta moraat kon tayowon i TUHAN, Ki Baesa in nopomukádon in torú i TUHAN, deemanbí tongá popisí in sia ain noḻimod kon bayongan in motoḷuadí i Yerobeam. Ouman ibanea inta nongonguman kon i Baesa, takin kobobaraninea in pinaisdon kon bonu in buk Ouman in Datu mita in Israel. Ki Baesa in minatoi bo iḷobong kon Tirza. Ki Ela, ki adínea ḷoḷaki, nomaḷui kon inia nobaḻí datu.

⁸Kon taong nogindoyowa nopuḷú bo onom pinomarentaan i Datu Asa kon Yohuda, ki Ela ki adí i Baesa in nobaḻí datu kon Israel. Sia in nomarenta kon Tirza doyowa notaong in koonggotnea.

⁹Ki Zimri, porwira tobatú in nobaḻí itoi kon tongobotak in tontara inta nomaké in kereta, noyopopog noḷawang kon i Ela. Kon singgai tobatú kon Tirza, ki Ela in nonginumai nodapot in noḷoḷangu kon baḷoi i Arza inta tongguḷu in mopoposadia in kaanon kon komaḻig i datu.

¹⁰Bo sinumuot in ki Zimri bo noḻimod kon i Ela, onda intua sia in nobaḻí datu nomaḷui kon i Ela. Tua in nobaḻí kon taong indoyowa nopuḷú bo pitu kon pinomarentaan i Datu Asa kon Yohuda.

¹¹Naonda in ki Zimri nobaḻí datu, iḻimodnea in bayongan motoḷuadí i Datu Baesa. Nodapot in bayongan ginaḷum i Baesa inta ḷoḷaki takin yobayatnea mita bo motoḷuadí monia diábí doman tobatúmai in kinotaḻiban.

¹²Podudui kon onu inta pinotaau i TUHAN kon i Baesa inta pinongin i Nabi Yehu, bayongan in motoḷuadí i Baesa iḻimod.

¹³Ki Baesa bo ki Ela, ki adínea, in nosumba kon dewa mita bo nokopopisí kon intau in Israel nomia kon dosa. Tuamai, mosia in nokopomukádon kon torú i TUHAN, Allah inta musti sumbáan in intau in Israel.

¹⁴Ouman ibanea inta nongonguman kon i Ela ain pinais kon bonu in buk Ouman in Datu mita in Israel.

¹⁵Kon taong indoyowa nopuḷú bo pitu kon pinomarentaan i Asa datu kon Yohuda, ki Zimri in nobaḻí datu kon Israel bo nomarenta kon Tirza pitu nosinggai in koonggotnea. Kon dodai intua tontara in Israel koyogot in nongopung kon Gibeton, kotá in intau in Pilistin.

¹⁶Naonda in kinodongogan monia kon ki Zimri in noyopopogdon noḷawang kon i datu bo poḷatdon noḻimod kon i datu, dá kon singgai doman tatua kon pinononḷoḷaigan monia tatua, mosia komintan in noduídon kon i Omri, itoi totokan in tontara monia, binaḻídon datu in Israel.

¹⁷Onda intua ki Omri takin tontaranea nonaḷámaidon kon Gibeton bo minayá nongopung kon Tirza.

¹⁸Kon tungkuḷ in inontong i Zimri kon kotá tatua inagowdon, sinumuot in komaḻig tatua in sia bo sinumurub takin in komaḻig tatua in sia, dá minatoi in sia.

¹⁹Tua in nobaḻí popisí in sia ain nogaid kon inta moraat kon tayowon i TUHAN. Notongkai ná ki Datu Yerobeam, ki Zimri in nogaid doman kon dosa kon i TUHAN bo nokopopisí kon umat in Israel nogaid domandon kon dosa.

²⁰Ouman ibanea inta nongonguman kon i Zimri, takin doman in pinoyopopogan monia kon inta moraat bo tomayánea in pinaisdon kon bonu in buk Ouman in Datu mita in Israel.

²¹Nobaḻídon in rogenggeng kon bangusa in Israel popisí in oyúon in moibog sinbá ki Tibni ki adí i Ginat in mobaḻí datu, táe oyúon doman in moibog sinbá ki Omri in mobaḻí datu.

²²Imbuitnea kon tua mosia inta moibog kon i Omri in nountung. Ki Tibni in minatoi bo ki Omri in nobaḻí datu.

²³Tua in nobaḻí kon taong nogintoḷu nopuḷú bomitá kon pinomarentaan i Datu Asa kon Yohuda. Ki Omri in nomarenta nobaḻí datu kon Israel mopuḷú bodoyowá notaong in koonggotnea. Onom notaong dungkuḷ nomarenta in sia kon Tirza.

²⁴Táe noiduduimai kon tua, notaḷui in sia kon buḷud tobatú kon i Semer, boḻinea in 6.000 in doit saḷaka. Bo noposindog in sia in kotá tobatú kon buḷud tatua bo sinangoiannea in Samaria, pinodudui in tangoi i Semer, intau inta kitogi buḷud tatua.

²⁵Ki Omri nomia kon dosa mita inta noiḻiu kon inta pinomia in datu mita inta noiuna kon inia.

²⁶Ná doman ki Yerobeam, ki Omri in binaradosa doman bo nokopopisídon kon intau in Israel nomia doman kon dosa bo nosumba kon dewa. Tuamai in mosia nokopomuká kon torú i TUHAN, Allah inta musti sumbáan in intau in Israel.

²⁷Ouman ibanea inta nongonguman kon i Datu Omri, bo bayongan inta pinomianea in pinaisdon kon bonu in buk Ouman in Datu mita in Israel.

²⁸Naonda in ki Omri minatoi bo iḷobong kon Samaria, ki Ahab ki adínea in nobaḻí datu nonoḻiu kon inia.

²⁹Kon taong nogintoḷu nopuḷú bo waḷu kon pinomarentaan i Datu Asa kon Yohuda, ki Ahab ki adí i Omri in nobaḻí datu kon Israel bo nomarenta kon Samaria doyowa nopuḷú notaong in koonggotnea.

³⁰Dosanea kon tayowon i TUHAN in moraa-raat nongkon datu mita inta noiuna kon inia.

³¹Diápa doman tugat kon inia in mobiag momia kon dosa naonda bo ki Datu Yerobeam, sia in notonibuḷoidon i Izebel ki adí i datu Etbaal inta nongkon Sidon, bo nosumbadon in sia kon i Baal.

³²Noposindog in sia in baḷoi pososumbaan kon i Baal kon Samaria, bo kon bonu in baḷoi pososumbaan tatua nomia doman in sia kon mezbah sin pobogoian kon kuruban kon dewa tatua.

³³Nomia doman in sia kon patong i Dewi Asyera. Noiḻiu in dosa nongkon bayongan datu inta noiuna kon inia. Tuamai in sia nopomukádon kon torú i TUHAN, Allah inta musti sumbáan in intau in Israel.

³⁴Kon tungkuḷ in pinomarentaan i Ahab, kotá in Yerikho pinosindogdon bui i Hiel intau in Betel. Táe ná inta ain pinoguman muna i TUHAN pinongin i Yosua ki adí i Nun, ki Hiel kinobuḻian i adínea doyowa: ki Abiram inta guya-guyang in minatoi kon dodai in ki Hiel nogukatdon kon pondasi in kotá, bo ki Segub inta ai-ai in minatoi kon dodai in ki Hiel noposindogdon in bonawang mita in kotá tatua.