Read Mongondow DATU MITA IMITÁNEA 17 Bible Online

DATU MITA IMITÁNEA 17 - Mongondow bible

DATU MITA IMITÁNEA 17

¹Oyúon in nabi tangoinea in ki Elia. Sia in nongkon Tisbe, kotá tobatú kon butá in Gilead. Kon singgai tobatú namangoi in sia kon i Datu Ahab bo noguman, “Pinodoyon kon i TUHAN inta nobiag, Allah inta sinumba in intau in Israel bo inta pinogundoianku, akuoi in mopotaau in naa kon i Tuang, kon bonu in doyowa andeka toḷu notaong moiduduimai naa in diábí in oḷú andeka uyan tongopiḻikmai, koḻikudbí in aka pogumankudon.”

²Nopaḷut mako kon tua noguman in ki TUHAN kon i Elia,

³“Taḷaaidon in tampat tanaa, bayá in utuan kon ḷoḷan Ongkag in Yordan bo pogadopdon kon tua kon diug in Tapá in Kerit.

⁴Iko in mokouḻíbí kon tubig inumon nongkon tapá tatua, bo ḷagapan kawag in potabá-Ku modia kon kaanonmu.”

⁵Dinumudui in ki Elia kon parenta i TUHAN tatua, bo minayá in tapá in Kerit poḷat nogutun kon tua.

⁶Nonginum in sia nongkon tubig in tapá tatua, bo nokaan kon roti bo ponoyá inta dinia in ḷagapan kawag muḷoi in doḷo-doḷom bo ḷoḷabungnea.

⁷Naonda in noḻin onggotdon nongkon tua, noingkag domandon in tapá tatua sin diádon nonguya-nguyan.

⁸Onda intua noguman in ki TUHAN kon i Elia,

⁹“Tanaa musti in iko mayá in kotá in Sarpat, kon diug in Sidon bo mogutun kon tua. Akuoi in nopotabábí in boba-bobay tobatú sinbá ogoiannea in kaanon in iko.”

¹⁰Dá minayádon in Sarpat in ki Elia. Naonda in nodapotmai kon bonawang in kotá tatua, inontongnea in boba-bobay tobatú mopuyutmai kon kayu pondungú. Bo noguman in ki Elia kon boba-bobay tatua, “Iná, tuḷungaipa pogamáai kon tubig topilik inumonku.”

¹¹Naonda in boba-bobay tatua minayá sin mogamá kon tubig tatua, ki Elia in noguman doman, “Iná podiaaipa doman in akuoi kon roti topilik.”

¹²Boba-bobay tatua notubag, “Pinodoyon kon i TUHAN inta nobiag, Allah inta sinumba i Amá, akuoi in mongibot kon diábí in roti kon inakó. Kon inakó in dongkadon topong torigu toyoyakup kon bonu in palo, bo ḷana in zaitun topilik kon botoḷ. Akuoi in yogot mosipun kon kayu pondungú tanaa sin podungúan kon bahan tongopilikpa tatua, sinbá akuoi bo ki adíku in mongaanpa. Dongkadon tua in imbuitnea in kaanon nami, bo mopaḷut mako kon tua mogoḷatdon mako in kami kon kopatoian.”

¹³“Dika moḻia-ḻiaw in gina i Iná!” guman i Elia, “Aidaidon in kaanon i Iná bo in adí i Iná. Táe pounapa pogaidai kon roti mointok nongkon topong bo ḷana tatua, bo diádon mangoi.

¹⁴Sin ki TUHAN, Allah inta sinumba in intau in Israel, in noguman kon palo tatua in umuranbí doman kon bonu in topong, bo botoḷ tatua in umuranbí doman kon bonu in ḷana modapot kon singgai ki TUHAN mopoonagdon in uyan kon butá.”

¹⁵Bo minayádon in boba-bobay tatua nogaid kon onu inta pinoguman i Elia. Dá umurandon oyúon in kaanon nayatoḷu muḷoi in singgai.

¹⁶Bo ná inta pinoguman i TUHAN pinongin i Elia, palo tatua in umuranbí oyúon in topong kon bonunea, bo botoḷ in umuran doman oyúon in ḷana.

¹⁷Diá noonggot kon tua adí in boba-bobay tatua notakit. Koonggot-koonggot koyoyiga-koyoyiga in takitnea nodapot in minatoi.

¹⁸Bo boba-bobay tatua in noguman kon i Elia, “Mogogundoi i Allah, nongonu popoaidbí i Amá in tanaa kon inakó? Degá namangoi in ki Amá sinbá kotoropan i Allah in dosaku, noiyaput in matoi in ki adíku?”

¹⁹Ki Elia in notubag, “Dia mangoi in adí tatua.” Bo ginamá i Elia in adí ḷoḷaki tatua nongkon i inánea, bo dinianea kon gopot kon ḷundukan, kon gopot inta posiuganmai i Elia. Pinosiug i Elia in adí tatua kon tosiugan,

²⁰bo nosambayang noropot, “Oo TUHAN, Allahku, nongonu sin pinopoangoi-Mubí in bodito tanaa kon boba-bobay tanaa? Sia in nobogoidon in pogutunan kon inakó bo tanaa in iḻimod-Mubí in ki adínea!”

²¹Nopaḷut mako kon tua kotoḷu sinongkoban i Elia in adí tatua, poḷat doman nosambayang, “OoTUHAN, Allahku, biagpa kaasí in adí tanaa!”

²²Inindongogan i TUHAN in sambayang i Elia; adí tatua in nomangkoidon nogina bo buidon nobiag.

²³Bo noponagdon bui in ki Elia nongkon gopotnea bo nodia kon adí tatua inogoi kon inánea poḷat noguman, “Iná, naa in ki adí i Iná! Buidon nobiag in sia!”

²⁴Boba-bobay tatua in notubag, “Tanaa in kinotaauankudon kon ki Amá in mogogundoibí i Allah bo tosingogon i Amá in totuubí nongkon i TUHAN!”