Read Mongondow DATU MITA IMITÁNEA 19 Bible Online

DATU MITA IMITÁNEA 19 - Mongondow bible

DATU MITA IMITÁNEA 19

¹Ki Datu Ahab nongonguman kon i Izebel ki buḷoinea, in bayongan inta inaidan i Elia, bo inoumannea doman in naonda in pinoḷoḻimod i Elia kon bayongan in nabi Baal.

²Dá ki Izebel in nokidia in habar tanaa kon i Elia, “Igumon mako dewa mita in mohukum, poḷat bo moḻimod kon inakó, aka ikoḷom kon oras ná tanaa akuoi in diá mopoaid kon inimu ná inta pinopoaidmu kon nabi mita in Baal tatua.”

³Inagían in ondok in ki Elia, bo noḷagui in sia sinbá diá ḻimodon. Sia bo bobantungnea in minayá in Bersyeba inta kon Yohuda. Kon tua sinaḷáanneadon in bobantungnea tatua,

⁴bo minaya-mayá in sioḷ ná padang gurun tosinggai in koonggotnea bo nogogai kon siungon in kayu inta mobambar. Kon tua iḻimitú in sia bo ibogonnea in bá matoidon. “Diádon in akuoi monahang, o TUHAN,” gumannea kon i TUHAN. “Gamádon in nyawaku. Akuoi in diábí mopia-pia nongkon mogoguyangku!”

⁵Bo inumuḻid in sia kon siungon in kayu tatua bo noḷoḷot. Bo daḻídon in malaekat tobatú noḻiai bo noguman kon inia, “Pobangon Elia, pongaandon!”

⁶Ki Elia in nobobui magí mako, bo kinoontonganneadon kon oyúon in roti sinubá takin tampat in tubig inta kon bonu in tubig kon uḷuanneamai. Dá nongaan bo nonginumdon in sia, bo bui inumuḻid.

⁷Kon induaneadon malaekat i TUHAN in namangoi noḻiai kon inia bo noguman, “Pobangon, Elia, pongaandon, sinbá mokotahangpa in iko in mayá kon tampat inta moyayú.”

⁸Nobangon i ki Elia, poḷat nongaan bo nonginum. Dá noropotdon in sia bo nokobayádon in sia opat nopuḷú nosinggai in koonggotnea, minayá in Buḷud in Sinai,[16] tampat inta pinoki pogontongan i Allah.

⁹Kon tua in ki Elia nosiug in doḷom tua kon angob. Bo ki TUHAN in noguman kon inia, “Elia, onu in aidanmu kon naa?”

¹⁰Ki Elia notubag, “O TUHAN, Allah Inta Totok in Mokawasa, akuoi in umuran mogaid tongábí kon ini-Mu. Táe umat in Israel in iḻimimpat kon dodandian monia takin-Mu. Mosia in nongokai kon mezbah-Mu mita bo noḻimod kon nabi-Mu mita. Dongkadon akuoi in naa, bo tanaa in tayakondon monia ḻimodon in akuoi!”

¹¹“Ḷuaidon kon angob tanion,” guman i TUHAN kon inia, “bo sindogdon tayow kon i-Nakó kon tudu in buḷud.” Bo ki TUHAN sinumaḻib kon tua, inunaan in tompot inta nogirup noropot totok nodapot in buḷud mita nongo botak bo buḷud mita batu in nongoḷosi. Táe ki TUHAN in diábí nokipogontong kon bonu in tompot tatua. Naonda in tompot tatua nooyong, nobaḻídon in ḻinug, táe ki TUHAN in diábí doman nokipogontong kon bonu in ḻinug tatua.

¹²Noiduduimai kon tua namangoidon in tuḷú, táe diábí doman in ki TUHAN kon bonu in tuḷú tatua. Nopaḷut mako kon tua kaadaan noingongowdon totok, bo kinodongogandon in singog tobatú inta moḷukó totok.

¹³Naonda in kinodongogan i Elia in singog tatua, inoḻingoiannea in jubah in pogotnea, bo iḻumuai bo sinimindog kon bibig in angob tatua. Dá kinodongogandon in tosingogon noguman, “Elia, onu in aidanmu kon naa?”

¹⁴Ki Elia in notubag, “Oo TUHAN, Allah Inta Totok in Mokawasa, akuoi naa in umuran mogaid tongá kon ini-Mu. Táe umat in Israel in iḻimimpatdon kon dodandian monia takin-mu. Mosia in nongokaidon kon mezbah-Mu mita bo noḻimod kon nabi-Mu mita. Dongkadon akuoi in naa, bo tanaa in tayakon monia ḻimodon in akuoi!”

¹⁵Ki TUHAN in noguman, “Pobuidon kon padang gurun kon diug in Damsyik! Bo bayádon in kotá bo popobutakdon in ḷana kon uḷu i Hazael nobaḻí tomponuot kon pinoduían kon inia nobaḻí datu in Siria.

¹⁶Aidai doman in natua kon i Yehu ki adí i Nimsi, sinbá mobaḻí in sia datu in Israel, bo kon i Elisa ki adí i Sapat nongkon Abel-Mehola, sinbá sia in mobaḻí nabi monoḻiu kon inimu.

¹⁷Ki ineka in diá ḻimodon i Hazael, yo ḻimodonbí i Yehu, bo mosia inta mokoḷagui nongkon i Yehu yo ḻimodonbí i Elisa.

¹⁸Táe 7.000 in intau in Israel in posaḷamaton-Kubí, mosia inta umuran mosatia kon i-nakó bo inta diá kon dodai in onda in sinumungkud nosumba kon patong i Baal andeka mongayok kon tua.”

¹⁹Dá nobuatdon in ki Elia bo minayá kon i Elisa inta momajekomai. Mopuḷú bodoyowá nogapang in sapi kon munanea bo ki Elisa tontaní in nomajeko takin sapi togapang inta kon tumi totok. Naonda in ki Elia noitaḻib kon diug i Elisa, ki Elia noḷongkut kon jubahnea bo pinopotoḷompoi kon obaga i Elisa.

²⁰Dá ki Elisa in nonaḷámaidon kon sapinea mita tatua bo noribatuk in nogaḷow kon i Elia, poḷat noguman, “Ogoiaipa in wakutu akuoi mayá moguman kon guyangaku, bain tua bo dumudui in akuoi kon i Amá.” Tubag i Elia, “Aidaidon. Diábí in akuoi mongampag kon inimu.”[17]

²¹Ki Elisa in nobui kon gobánea bo noratá kon sapinea mita. Kayu puḷu in pajekonea binaḻínea kayu pondungú kon pinodungúan kon ponoyá in sapi mita tatua. Onda intua sinila-silaineadon mako in ponoyá mita tatua kon intaunea mita bo kinaan monia. Nopaḷut mako kon tua ki Elisa minayá dinumudui kon i Elia bo nobaḻí mototuḷungnea.