Read Mongondow DATU MITA IMITÁNEA 22 Bible Online

DATU MITA IMITÁNEA 22 - Mongondow bible

DATU MITA IMITÁNEA 22

¹Noiḻiu kon doyowa notaong diábí in parang kon sigad in intau in Israel bo Siria.

²Táe kon taong nogintoḷu, ki Yosapat datu in Yohuda minayá nokipodungkuḷ kon i Ahab datu in Israel.

³Munadon in ki Ahab noguman kon porwiranea mita, “Kinotaauandon monimu kon kotá in Ramot kon Gilead tua in kitabí in kitogi! Nongonu sin diábí bui agowon naton nongkon i datu in Siria?”

⁴Dá naonda in ki Yosapat namangoi, ki Ahab in noḻibó, “Moibog degá in moiko mayá moyotakinku monubu kon Ramot?” Ki Yosapat in notubag, “Mopia! Mayá moyotakin in kita. Tontaraku inta tumotakoi mita kon kabaḷo in dumugangdon kon tontaramu bo intaumu mita tumotakoi kon kabaḷo.

⁵Táe mopia-piabí kon munapa ḻibóon naton kon i TUHAN.”

⁶Dá ki Ahab in nosipun kon degá 400 in nabi bo noḻibó kon i monia, “Motaau degá in akuoi mayá monubu kon Ramot andeka diá motaau?” “Motaau!” tubag monia. “Ogoibí i TUHAN kon i tuang datu in kotá tatua.”

⁷Táe ki Yosapat in bui noḻibó, “Diá degá in kon naa in nabi ibanea inta motaau moḻibó kon i TUHAN sin kopontingan naton?”

⁸Ki Ahab notubag, “Tobatúpa, ki Mikha ki adí i Yimla. Táe mobú in akuoi kon inia, sin diábí kon dodai in onda in sia in moguman kon onu in mopia in mobaḻí kon inakó; tantúbí inta diá mopia.” “Uḻe, dikabí natua!” tubag i Yosapat.

⁹Dá ki Ahab in nogoiní kon pogawai in komaḻig tobatú bo nopotabá minayá nokigamá kon i Mikha.

¹⁰Kon dodai intua ki Ahab bo ki Yosapat, nogiḷambung in ḷambung in datu, iḻimitú kon kadera in dodatuan kon tampat poḷoḻintogan kon gandum kon tayowon in bonawang in Samaria, bo nabi mita in mamangoi kon tayowon monia bo mopotaau in onu in mobaḻí inta nongkon raian monia.

¹¹Nabi tobatú inta kon sigad in nabi mita tatua, inta ki Zedekia ki adí i Kenaana, nomia kon tungoi mita nongkon uatoi bo noguman kon i Ahab, “Naabí inta pinoguman i TUHAN, ‘Takin tungoi mita ná tanaa ki tuang datu in momongkug kon Siria bo morimumud kon i monia.’ ”

¹²Bayongan in nabi ibanea in noyopopog bo noguman, “Tubudon in Ramot, mouḻíbí i tuang datu. Popountungbí i TUHAN in ki tuang datu.”

¹³Bo totabá inta minayá nonontomu kon i Mikha, noguman kon i Mikha, “Bayongan nabi ibanea nogumandon kon ki datu in mountungbí. Igumon mako ki Amá in moguman doman kon inta mopia ná inta pinoguman monia.”

¹⁴Táe ki Mikha in notubag, “Pinodoyon kon i TUHAN inta nobiag, akuoi in tongábí mopotaau kon onu inta pinotaau i TUHAN kon inakó!”

¹⁵Naonda in ki Mikha nodapot kon tayowon i Datu Ahab, ki datu in noḻibó, “Motaau degá in akuoi bo ki Datu Yosapat mayá monubu kon Ramot, andeka diá motaau?” “Tubudon!” tubag i Mikha. “Motantúbí kon mouḻímubí. Popountungbí i TUHAN in ki tuang datu.”

¹⁶Ki Ahab in notubag, “Aka iko bo mosingog kon inakó podoyon kon tangoi i TUHAN, yo pogumandon onu inta totuu. Kotongonudon in iko inogoianku in tompoingat kon soaḷ tatua?”

¹⁷Ki Mikha in notubag, “Akuoi in nokoontong kon tontara in Israel noirarit kon buḷud mita. Mosia tua in naondadon bo domba inta diá in gombala, bo ki TUHAN in noguman kon i monia, ‘Intau mita tanaa in diádon ko itoi. Biódon mako mosia in mobui takin mosaḷamat.’ ”

¹⁸Bo ki Ahab in noguman kon i Yosapat, “Totuubí in gumanku! Diábí kon dodai in onda in sia mopotaau kon onu inta mopia in mobaḻí kon inakó! Umuranbí inta diá mopia!”

¹⁹Ki Mikha in noguman bui, “Tanaa in indongogai in onu inta pinoguman i TUHAN! Akuoi in nokoontong kon ki TUHAN in iḻimitú kon ḷoḻitúan-Nea kon soroga, bo bayongan in malaekat-Nea sinimindog kon diug-Nea.

²⁰Ki TUHAN in noḻibó, ‘Ki ine in modondouḷug kon i Ahab sinbá moibog in sia mayá moparang bo matoi kon parang kon Ramot kon Gilead?’ Tubag in malaekat mita tatua noyo-noyoposi.

²¹Imbuitnea namangoidon in dimukud tobatú. Dinimiug in sia kon i TUHAN bo noguman, ‘Akuoi in modondouḷug kon inia.’

²²‘Naonda in podondouḷugmu?’ ki TUHAN in noḻibó. Dimukud tatua in noguman, ‘Mayá in akuoi bo baḻíonku sinbá bayongan in nabi i Ahab in monguboḷ.’ Ki TUHAN in noguman, ‘Mopia, aidaidon intua, kodondouḷuganmubí in sia.’ ”

²³Onda intua ki Mikha in noguman, “Uḻe, tua in mobaḻí! Binaḻídon i TUHAN sinbá nabi mita i tuang datu in nonguboḷ kon i tuang datu sin sinantúdon i TUHAN kon mopoḷabú in bodito kon i tuang datu!”

²⁴Dá ki Nabi Zedekia in minayádon dinimiug kon i Mikha bo nonokap kon pogotnea poḷat noguman, “Diábí doman Roho i TUHAN monaḷámai kon inakó bo momaké kon inimu?”

²⁵Ki Mikha in notubag, “Bain indoianmu in mobaḻí kon tungkuḷ in iko tumuot kon gopot tobatú sin mogadop.”

²⁶“Domok in sia!” parenta i Datu Ahab, “bo diá in sia kon i Amon, walikota, bo kon i Pangeran Yoas.

²⁷Poki pobonudon kon i monia in sia kon ponjara, bo tongádon ogoian in kaanon bo inumon tumongo piḻik modapot in akuoi mobui mangoi takin mosaḷamat.”

²⁸Guman i Mikha, “Aka ki tuang datu bo mobui takin mosaḷamat, dá mangaḻenea kon tua kon ki TUHAN in diábí nosingog pinongin inakó! Bayongan intau kon naa in nobaḻí sakusi.”

²⁹Onda intua ki Ahab datu in Israel, bo ki Yosapat datu in Yohuda minayá nonubu kon kotá in Ramot kon Gilead.

³⁰Ki Ahab in noguman kon i Yosapat, “Mogiḷambung in ḷambung ibanea in akuoi bo tumakin moparang, táe iko in tantúdon paké in pakeang in datu.” Natuata in nobaḻí ki datu in Israel nomakédon in ḷambung ibanea kon dodai in sia minayá noparang.

³¹Kon dodai intua toḷu nopuḷú bo doyowa in panglima in tontara inta sinumakoi kon kereta in Siria aindon pinotabá kon tongádon monubu kon datu in Israel.

³²Dá, naonda in inontong monia in ki Datu Yosapat, kai monia kamai dá siabí tua in datu in Israel. Tuamai in sinubu monia in sia. Táe kinumarak in ki Yosapat,

³³dá kinotaauandon monia kon deemanbí ki datu in Israel in sia.

³⁴Noikoḷatbí totok tontara in Siria tobatú nopopiot in piotnea, bo diábí in pinopotanaan. Táe piot tatua in noipiotdon kon i Ahab bo noiḷambai kon ḷambung in parangnea noitongkaná kon tondoḷannea. “Kinotugatandon in akuoi!” guman i Ahab kon mododia kon keretanea. “Pomurow bo diádon in akuoi ḷumuai kon poparangan!”

³⁵Táe popisí in parang totokpa in tumagab, ki Datu Ahab in umurandon simindog mako bo kinadaian kon bonu in keretanea sinumayow kon tontara in Siria. Dugúnea in ḷumuai nongkon kekebnea, kinumontoidon kon taḷog in kereta. Naonda in noḷoḷabung minatoi in sia.

³⁶Naonda in tumoyopdon in mata in singgai bayongan in tontara in Israel pinarentadon kon mobui kon kotá bo kon butánea-butánea,

³⁷popisí in minatoidon in ki datu. Bo nobuidon in mosia bo noḷobong kon i Ahab kon Samaria.

³⁸Naonda in keretanea dinaritan kon tabang in Samaria, bobay mita sundaḷ moinggúmai kon tua, noitongkaná totok ná inta ain pinoguman i TUHAN.

³⁹Ouman ibanea kon i Datu Ahab, bo ouman komaḻig in gading in gajah bo bayongan in kotá inta pinosindognea, in pinaisdon kon bonu in buk Ouman in Datu mita in Israel.

⁴⁰Naonda in minatoi mako in ki Ahab, ki Ahazia ki adínea in nobaḻí datu nonoḻiu kon inia.

⁴¹Kon taong inggopatnea kon pinomarentaan i Ahab datu in Israel, ki Yosapat ki adí i Asa in nobaḻí datu kon Yohuda.

⁴²Kon dodai intua umurdon toḷu nopuḷú bo ḻima notaong in sia. Nomarenta in sia kon Yerusalem doyowa nopuḷú notaong in koonggotnea. Ki inánea in ki Azuba ki adí i Silhi.

⁴³Ná doman ki Asa, ki amánea, ki Yosapat in nogaid doman kon inta mopia kon tayowon i TUHAN. Iyompatnea nongkon dodatuan nea in bayongan sundaḷ ḷoḷaki bo bobay inta nopobayá in oaidan monia kon tampat mita pososumbaan kon berhala inta kinotaḷáan kon tungkuḷ i Asa, ki amánea. Táe tampat mita tatua in diábí irimumudnea. Rayat in tantúpabí doman moposumba in kuruban bo kamania kon tua. Ki Yosapat in nogaid kon kapaḷ mita in Tarsis sin pogakutan kon buḷawan kon Opir, táe kapaḷ mita tatua in diábí nobaḻí iḷumeag sin nogoguyaat kon Ezion-Geber. Ki Datu Ahazia nongkon Israel in nonotogmai sinbá intau mita in kapaḷnea in ḷumeagdon moyotakin in intau mita in kapaḷ i Yosapat, táe doí in ki Yosapat umpaka mopia in yoyobayat monia takin i datu in Israel. Onda intua ki Yosapat minatoi bo iḷobong kon poḷoḷobongan kon datu mita kon kotá i Daud. Ki Yoram ki adínea in nobaḻí datu nonoḻiu kon inia. Ouman ibanea mako kon i Yosapat, kobobaraninea bo pinoparangannea mita in pinaisdon kon bonu in buk O(...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²Kon taong impuḷú bo pitu kon pinomarentaan i Datu Yosapat nongkon Yohuda, ki Ahazia adí i Ahab in nobaḻí datu in Israel bo nomarenta kon Israel inta kon Samaria doyowa notaong in koonggotnea.

⁵³Sia in nogaid kon dosa kon i TUHAN sin dinumudui kon i amánea bo kon i inánea bo dinumayan kon oaid i Datu Yerobeam inta nokopopisí kon intau in Israel nogaid kon dosa.

⁵⁴Sia in nosumba kon Baal bo nogundoi kon inia. Bo notongkai ná ki amánea inta nomarenta kon dodai in deemanpa sia, sia in nokopomuká doman kon torú i TUHAN, ki Allah inta sinumba in intau in Israel.