Read Mongondow DATU MITA IMITÁNEA 3 Bible Online

DATU MITA IMITÁNEA 3 - Mongondow bible

DATU MITA IMITÁNEA 3

¹Ki Datu Salomo nobuḷoi kon i adí bobay i datu in Mesir. Ki adí bobay i datu in Mesir tatua in dinia i Salomo minayá in kotá i Daud bo nogutun kon tua nodapot in sia nopaḷut noposindog in komaḻig in datu bo baḷoi i TUHAN takin benteng in Yerusalem.

²Popisí in Baḷoi i TUHAN diápa noḷapat kon dodai intua, dá rayat in umuranpa noposumba in kuruban kon noyagi-yagimai in tampat.

³Ki Salomo in motabi kon i TUHAN bo dinumudui kon topotundú mita i amánea, táe umuranpa in sia noratá bo noposumba in biag kon bayongan tampat.

⁴Tampat pooibadaan inta totok in ponango-nangoian in kon Gibeon. Mokakit in ki Salomo moposumba in kuruban kon tua. Kon singgai tobatú, ná biasamai, minayá in sia bui intua.

⁵Doḷom tua ki TUHAN in nokipogontong kon inia kon bonu in togoindop bo noguman, “Salomo, igumdon onuka in koibogmu, ogoi-Kubí intua kon inimu!”

⁶Ki Salomo in notubag, “TUHAN, pinoontong-Mudon kon motabibí totok in Iko kon i amáku ki Daud, mogogundoi-Mu tua. Mopia in sia, motuḻid in gina bo mosatia kon ini-Mu. Bo inta nobaḻí tomponuot kon totabi-Mu in mononoi kon inia, dá inogoi-Mudon kon inia in adí ḷoḷaki inta tanaa nomarenta nonoḻiu kon inia.

⁷Oo TUHAN, Allahku, Iko noduí kon inakó nobaḻí datu nonoḻiu kon i amáku, umpaka akuoi noguodpa totok bo diá nonotaau mongo naonda in pomomarenta.

⁸Akuoi naa in kon yua-yuak in bangusa inta ain piniḻí-Mu nobaḻí umat-Mu tontaní. Mosia tua in bangusa moḷoben tobatú inta diádon koiapan in kobayongnea.

⁹Manangka intua, TUHAN, aka motaau yo ogoiaipa in akuoi in kabijaksanaan inta pakéon kon momarenta kon umat-Mu tanaa takin moadil bo motaau mopoyoposi onda inta mopia bo onda inta moraat. Aka diá natua, yo diábí in akuoi mokoparenta kon umat-Mu inta mobarong naa!”

¹⁰Nopia in gina i TUHAN kon onu inta pinoigum i Salomo tatua

¹¹bo noguman kon inia, “Popisí in iko noigum kon kabijaksanaan inta pakéon momarenta takin moadil, bo deemanbí umur moḷanggó andeka kaoyúonan kon inimu tontaní andeka kopatoian in musungmu mita,

¹²dá onu inta pinoigummu tatua in ogoi-Kubí. Baḻíon-Ku in iko mobija-bijaksana bo mopando-pandoi nongkon i inekabí doman, pinomayá kon dungkuḷmai andeka kon singgai moiduduimai.

¹³Nodapot in onu inta diá inigummu yo ogoi-Kubí doman kon inimu: kino ouput in kobiaganmu iko in mobiagdon mooyúon bo horomaton moiḻiu kon datu ibanea inta kon ondakabí.

¹⁴Bo aka iko naonda bo ki amámu ki Daud, motoindudui kon i-Nakó takin dumudui kon bayongan in hukum-Ku, yo ogoian-Ku in iko in kobiagan inta moonggot.”

¹⁵Naonda in nobangon, nosadardon in ki Salomo kon ki Allah ain nosingog kon inia kon bonu in togoindop. Dá nobuidon in sia kon Yerusalem bo sinimindog kon tayowon in Poti Dodandian i TUHAN bo noposumba in kuruban payongon bo kuruban dodamean. Onda intua nomia in sia kon rame kon bayongan in pogawainea.

¹⁶Kon singgai tobatú, bobay sundaḷ doyowa namangoi kon tayowon i Datu Salomo.

¹⁷Tobatú kon sigad nayadua tua in noguman, “tuang datu Inta Momulia, akuoi bo bobay tanaa in nogutun tobaḷoian. Diábí in intau ibanea in nogutun noyotakin nami. Tongonudon degá nosinggai naa, akuoi in nopononggadí in adí ḷoḷaki tobatú. Doyowa nosinggai noiduduimai kon tua bobay tanaa in nopononggadí doman in adí ḷoḷaki.

¹⁹Kon doḷom tobatú kon dodai in kami nosiug, bobay tanaa takin diá sinumuod noidantug kon i adínea mointok dapot in minatoi.

²⁰Noonggot kon doḷom kon dodai in akuoi nosiug, sia in nobangon bo nogamá kon adíku mointok inta kon diugku. Adíku mointok tatua inukatnea kon tosiugannea, bo adínea mointok inta ain minatoi tua in inukatnea kon tosiuganku.

²¹Nobangon monik doḷo-doḷom, naonda in akuoi nobangon bo kuma mopotetédon in adíku mointok tatua, indoiankumai yo minatoi bidon. Naonda in sinaridikumai, noniata magí yo deemanbí ki adíku.”

²²“Uboḷ!” guman in bobay ibanea tua, “Inta nobiag naa in adíkubí, inta minatoi tua in ki adímu!” “Diá!” tubag in bobay inta muna tatua. “Inta minatoibí tanaa in ki adímu, inta nobiag tatua in ki adíku!” Natuata in pinobobayowan monia kon tayowon i datu.

²³Bo ki Datu Salomo in noguman, “Moiko tumpaḷa moḷabit kon adí mointok inta nobiag tanaa in ki adímu bo deemanbí inta minatoi tatua.”

²⁴Naonda in noguman mako natua, ki datu nokigamá in kedang.

²⁵Bo nomarenta, “Pongkódon doyowa in adí mointok inta nobiagpa tatua bo ogoi tumongo pongkó kon bobay doyowa tatua.”

²⁶Nokodongogmai kon parenta tatua, ki iná totok in adí tatua noguman, “Ampung, Tuang datu, dika ḻimodon in adí tatua. Ogoidon mako kon inia.” Ki iná tatua noguman natua sin motabi totok in sia kon i adínea. Táe bobay ibanea tatua in noguman, “Oo, pongkódon mako, bá tumpaḷa diá in mokouḻí in kaminda!”

²⁷Dá nogumandon in ki Salomo, “Dika ḻimodon in adí tatua! Ogoidon kon bobay inta muna tatua — siabí in ki inánea.”

²⁸Kon dodai in bangusa in Israel nokodongog kon soaḷ bontow in tosingogon i Salomo kon bonu in pelekara tatua, nobangkaḷdon in mosia kon inia. Sin noniatadon kon ki Allah ain nobogoi kon inia in kabijaksanaan sin mopoaid in inta moadil.