Read Mongondow DATU MITA IMITÁNEA 5 Bible Online

DATU MITA IMITÁNEA 5 - Mongondow bible

DATU MITA IMITÁNEA 5

¹Ki Hiram, datu in Tirus, umuran noyobayat i Datu Daud. Naonda in kinodongogan i Hiram kon ki Salomo in nobaḻídon datu nonoḻiu kon i Daud, ki amánea, sia in nopotabá in intaunea namangoi kon i Salomo.

²Bo ki Salomo in nokidia doman in koyow tanaa kon i Hiram,

³“Datu Hiram Inta Momulia! Tantú kinotaauan bidon i Tuang kon ki amáku ki Daud in umuran pakisa moparang sin tubuonmai in musung nongkon butá mita inta kon diugmai nami. Bo popisí in ki TUHAN diápa nobogoi in kauntungan kon inia nongkon bayongan in musungnea, dá diápa in sia nokoposindog in tampat pososumbaan kon i TUHAN Allahnea.

⁴Táe tanaa in ki TUHAN Allahku ain nobogoi in kobiagan notompia kon bayongan in butá inta kon bonu in kawasaku. Bo diá bidon in musungku, bo diá doman in bodito in noiuma kon butáku.

⁵Ki TUHAN ain nodandi nanaa kon i amáku ki Daud, ‘Ki adímu ḷoḷaki inta duíon-Ku mobaḻí datu monoḻiu kon inimu in moposindog in tampat pososumbaan kon i-Nakó.’ Manangka intua, Tuang Hiram Inta Momulia, akuoi, ki Salomo, aindon nonantú kon moposindog in baḷoi tatua.

⁶Kinotaauan bidon i Tuang, kon sigad in rayatku mita diábí in intau inta mopandoi momupuḷ kon kayu ná rayat i Tuang. Tuamai, akuoi in mopoigum aka motaau dá potabápa i Tuang in intau mita i Tuang momupuḷ kon kayu mita in ḷokuyú in Libanon sin pakéonku. Potabákubí in rayatku mita moduḷu kon i monia, bo tongonukabí in tondan inta tantúon i Tuang ogoi kon intau mita i Tuang tua, uboḻiankubí.”

⁷Nopia totok in gina i Hiram naonda in nokodongog kon habar tatua. Sia in noguman, “Dinayo-dayowdon in ki TUHAN in singgai in naa, sin sia in nobogoidon kon i Daud in adí ḷoḷaki tobatú inta totuu mobijaksana mobaḻí datu kon bangusa inta moḷoben tua.”

⁸Bo ki Hiram nokidia in tubag tanaa kon i Salomo, “Sinarimakudon in habar inta pinoigum i Tuang, bo mosadiabí in akuoi mogaid kon onu inta pinoigum i Tuang. Bain posadiaanku kon kayu ḷokuyú Libanon bo kayu ḷokuyú biasa podudui in pinoigum i Tuang

⁹Intauku mita in modiabí kon kayu tatua mosiḻig nongkon Libanon mopobayá in dagat. Bain kon tua bo pangkoi mita in kayu tatua togoton monia tonggakiton bo iḻigon monia pongin dagat pobayá in tampat inta koibog i Tuang. Kon tua in gakit mita tatua kokaion bo ogoi kon intau mita i Tuang sin pogaid moiduduimai. Nongkon i Tuang, poigumonku sinbá ki Tuang moposadiadon in kokaanon kon intau mita inta kon komaḻigku.”

¹⁰Dá ki Hiram in nobogoidon kon i Salomo in bayongan kayu ḷokuyú in Libanon bo kayu ḷokuyú biasa inta paraḷu pakéon.

¹¹Bo ki Salomo in nobogoidon in kokaanon kon intau mita inta kon komaḻig i Hiram tua. Muḷoi in taong ogoi i Salomo kon i Hiram in 322.500 nokilo in gandum bo 4.400 noliter[5] in ḷana zaitun taakan.

¹²Ki TUHAN in nogintompod kon dandi-Nea bo nobogoi in pandoi kon i Salomo. Kon sigad i Hiram bo i Salomo nobaḻí in yoyobayatan inta mopia, bo taya dua ain nomia kon tontogot in dodandian.

¹³Ki Datu Salomo nopotabádon in 30.000 in intau ḷoḷaki nongkon bayongan in Israel sin mogaid diá tondanan,

¹⁴bo noduí kon i Adoniram nobaḻí moindoi kon i monia. Sinilai in Salomo in mosia nobaḻí toḷu nosilai, tumopopuḷú noribu in intau kon tongosilai. Toḷu notonsilai tua moyo-moyoḷuan in mogutun tumongo buḷan kon Libanon bo doyowa nobuḷan in kon baḷoi.

¹⁵Ki Salomo in nopotabá domandon in 80.000 in intau sin mongurig kon batu nongkon buḷud bo 70.000 in intau mogakut kon batu mita tatua.

¹⁶Noduí in sia kon 3.300 in mandor sin moindoi kon oaidan tatua.

¹⁷Podudui doman in parentanea mosia in nongurig kon batu mita mongoḷoben inta mongo gaga sin popoḻitúan in Baḷoi TUHAN.

¹⁸Natuata in mogogaid mita i Salomo bo mogogaid mita i Hiram takin intau mita nongkon kotá in Gebal noposadia in batu bo kayu sin pakéon pogaid kon Baḷoi i TUHAN tatua.