Read Mongondow DATU MITA IMITÁNEA 6 Bible Online

DATU MITA IMITÁNEA 6 - Mongondow bible

DATU MITA IMITÁNEA 6

¹Ki Salomo nomangkoi noposindog in Baḷoi TUHAN kon buḷan Ziw, tuata in buḷan nogindua, kon taong noginggopat kon pinomarentaannea, 480 notaong naonda in bangusa in Israel nonaḷámai kon Mesir.

²Ukuran in Baḷoi TUHAN, dotá in bonunea in nanaa: kobanatnea in 27 nometer, kooḷadnea in 9 nometer, bo koḷantudnea in 13,5 nometer.

³Kon dotá in muna in Baḷoi TUHAN tua oyúon in baḷoinea inta kobanatnea in 4,5 nometer bo kooḷadnea in 9 nometer, ná kooḷad in baḷoi tatua.

⁴Kon dinding in baḷoi tatua oyúon doman in bubú mita in jandela.

⁵Noiḻibu kon dotá in tumi in baḷoi tatua, kon dinding kon dotá in ḷuainea pinogaidan kon gopot mita inta iḷunduk. Toḷu noḷunduk, pomuḷoi in toḷunduk koḷantudnea in 2,2 nometer.

⁶Kon ḷundukan dungkuḷ, kooḷad in batúan in gopotnea in 2,2 nometer, kon ḷundukan nogindua 2,7 nometer bo kon ḷundukan nogintoḷu 3,1 nometer. Dinding kon ḷundukan kon ḻimonag in mobuno-bunod nongkon ḷundukan inta kon ḻimonikannea, dá saḷabaku mita in gopot indugangnea tatua in motaau poyoguputon in dinding Baḷoi TUHAN tatua takin diábí monombubú kon dinding tatua.

⁷Saḷabaku mita tatua in kayu mita ḷokuyú in Libanon. Ḷoḻingkop kon gopot mita indugangnea kon ḷundukan kon ḻimonag noiukat kon dotá in toḷatan, bo mopobayá ná ḷundukan nogindua bo nogintoḷu oyúon in tukad nomurow. Onda intua ki Salomo nomia kon ḷuntung in baḷoi tatua. Tuamai sia nomaké bilabag mita bo dopí nongkon kayu ḷokuyú Libanon. Koyogot pogaidan kon Baḷoi i TUHAN tatua, totokbí in diá kodongogan singog in popangkuḷ, boḻiung andeka pakakat mita uatoi, sin batu mita inta pinaké pinobaḷoi tatua ain sinadia muna kon dodai in kon tampatnea mita muna. Natuata in ki Salomo noposindog in Baḷoi i TUHAN tatua nodapot in noḷapat.

¹¹Dá nogumandon in ki TUHAN kon i Salomo,

¹²“Aka iko motoindudui kon bayongan in hukum bo parenta-Ku, aidan-Kubí kon inimu onu inta ain pinodandi-Ku kon i amámu ki Daud.

¹³Akuoi in mogutun kon bonu in baḷoi inta pinosindogmu tanaa kon yua-yuak in umat-Ku Israel. Akuoi in diá bidon monaḷámai kon i monia.”

¹⁴Nanaa in pinogoginḷapat i Salomo kon Baḷoi TUHAN tatua:

¹⁵Bayongan dinding kon dotá in bonunea inaipan in kayu ḷokuyú in Libanon, pinangkoi kon taḷog nodapot kon ḷuntung. Taḷognea in pinomia nongkon kayu ḷokuyú biasa.

¹⁶Kon bonu in baḷoi tatua, kon dotá in tumi pinomiaan kon gopot takin pinomiaan kon dinding pinonigad nongkon kayu ḷokuyú, pinangkoi kon taḷog nodapot kon ḷuntung. Gopot tatua in sinangoian Yuang Totok in Motusi; kobanatnea in siow nometer.

¹⁷Yuang kon tayowon in Yuang Inta Totok in Motusi tatua sinangoian Yuang Moḷoben, bo kobanatnea in 18 nometer.

¹⁸Dinding kon dotá in bonu in baḷoi tatua inaipan in kayu ḷokuyú in Libanon, dá batu mita in dindingnea totokbí in diá koontongan. Aipnea tatua iḷambáan in kurigan in bungai in baḷongká bo bungang mita nongomungai.

¹⁹Yuang Totok Motusi inta pinomia kon bonu in Baḷoi i TUHAN tatua in sinadia sin potagúan kon Poti Dodandian i TUHAN.

²⁰Yuang tatua kobanatnea, kooḷadnea bo koḷantudnea in notongkai, tumongo siow nometer. Mezbah kon tayowon in Yuang Totok in Motusi tatua pinomia nongkon kayu ḷokuyú in Libanon. Kon ngara tumuot in yuang tatua pinopobandai in rante buḷawan. Bayongan bonu in Baḷoi i TUHAN tatua noitakin doman in Yuang Totok in Motusi bo mezbahnea inaipan in buḷawan taakan.

²³Kon bonu in Yuang Totok Motusi tatua sinagú doman in patong in kerub [6] inta pinomia nongkon kayu zaitun. Patong doyowa tatua koḷantudnea in tumpaḷa 4,4 nometer;

²⁴ukuran bo batangannea in notongkaibí. Tumpaḷa tododoyowa in koḻikipnea, batúan in koḻikip tatua 2,2 nometer in kobanatnea. Sigad in popod in koḻikip doyowa tatua nongkon batúan in patong in 4,4 nometer.

²⁷Patong doyowa tatua in inukat pinoyodiug kon bonu in Yuang Totok Motusi dá koḻikip tumongo batu in patong tatua noiḻiai kon dinding, bo koḻikipnea ibanea in noyoḻiai kon yua-yuak in yuang tatua.

²⁸Patong in kerub doyowa tatua in inaipan in buḷawan.

²⁹Bayongan in dinding kon dotá in bonu in Baḷoi i TUHAN in iḷambáan in kerub mita inta kinurig, pangkoi mita in palem, bo bungang mita inta nosokar.

³⁰Taḷog kon bonu in Baḷoi i TUHAN tatua in komintan inaipan in buḷawan.

³¹Kon ngara tumuot kon bonu in Yuang Totok in Motusi tatua pinakéan in ḷoḻingkop doyowa noḷosi inta nongkon kayu zaitun. Ngara tatua dotá in ḻimonikannea in pinomia noboyuk notonggoruit kon yua-yuaknea.

³²Dopí in ḷoḻingkop doyowa tatua iḷambáan in kerub inta kinurig, pangkoi in palem bo bungang mita inta nosokar. Dopí ḷoḻingkop, patong in kerub bo kurigan in pangkoi mita in palem, komintan inaipan in buḷawan.

³³Kon ngara tumuot kon bonu in yuang kon muna, inta yuang moḷoben, pinakéan in bongkow in ḷoḻingkop nongkon kayu zaitun, notonggopat.

³⁴Bo pinomiaan doman ḷoḻingkop sinongkabaya nongkon kayu ḷokuyú biasa, inta tumpaḷa motaau kopíon.

³⁵Dopí ḷoḻingkop mita tatua iḷambáan in kurigan kerub, pangkoi in palem bo bungang mita inta nosokar. Bayongan in kurigan tatua inaipan in buḷawan.

³⁶Kon muna in Baḷoi TUHAN tatua pinomiaan kon pelataran kon bonunea. Pelataran tatua in iḻibu in dinding inta noyogai-gaip: kon ḻimonik in pomuḷoi in toḷu nogaip in batu, tuduan in togaip in kayu ḷokuyú in Libanon.

³⁷Orotan in Baḷoi TUHAN tatua in pinomia kon buḷan Ziw, tuata in buḷan nogindua, kon bonu in taong noginggopat kon pinomarentaan i Salomo.

³⁸Bo kon buḷan Bul, inta buḷan noginwaḷu, kon bonu in taong impuḷú bomitá kon pinomarentaannea, noḷapatdon in Baḷoi TUHAN tatua pinosindog i Salomo, noitombutung ná inta ain sinomayá. Pinomiaan kon baḷoi tatua pitu notaong in koonggotnea.