Read Mongondow DATU MITA IMITÁNEA 7 Bible Online

DATU MITA IMITÁNEA 7 - Mongondow bible

DATU MITA IMITÁNEA 7

¹Ki Salomo in noposindog doman in komaḻignea tontaní. Pinoposindogan in komaḻig tatua koonggotnea in mopuḷú bo toḷu notaong.

²Kon komaḻig tatua ki Salomo in nomia kon yuang inta sinangoian “Baḷoi Kayuon in Libanon”.[7] Ukurannea: Kobanatnea in 44 nometer, kooḷadnea in 22 nometer, bo koḷantudnea in 13,5 nometer. Baḷoi tatua in toḷu nopipid in oigi nongkon kayu ḷokuyú in Libanon: pomuḷoi in pipidan in tumopopuḷú bo ḻima in oigi bo kon ḻimonikannea in pinakéan in bilabagnea mita inta nongkon kayu ḷokuyú in Libanon. Ḷuntungnea in pinomia nongkon kayu inta notongkai bo noikaḻeaw kon bilabagnea mita tatua.

⁴Kon dinding koḷoigi bo koḷanan baḷoi tatua oyúon in jandela mita: toḷu nopipid kon dinding inta toḷosi in noyogintayow in toḷu nopipidan kon dinding ibanea. Bongkow in ngara mita bo jandelanea mita notonggopat.

⁶Ki Salomo in noposindog doman in “Baḷoi Pal”. Kobanat in baḷoi tatua in 22 nometer bo kooḷadnea in 13,5 nometer. Kon tayowon in baḷoi tatua oyúon in dangkuḷon inta oyúon in pal bo tukadnea.

⁷Baḷoi ibanea in “Baḷoi Ḷoḻitúan” inta sinangoian doman Baḷoi Pongadilan. Baḷoi tanaa in nongkon taḷog nodapot in kayu mita inta pinobilabag inaipan in kayu ḷokuyú in Libanon. Kon baḷoi tanaa monantú in ki Salomo kon pelekara mita in pongadilan.

⁸Pogogutunan i Salomo pinomia naonda bo baḷoi mita ibanea bo noiukat kon palas ibanea kon tumi in Baḷoi Pongadilan. Bo kon i buḷoinea, inta ki adí bobay i datu in Mesir, pinomiaan i Salomo kon baḷoi ná tatua doman.

⁹Bayongan in bangunan tatua, noitakin doman in palas koḷobennea, nongkon orotannea nodapot in atopnea, pinomia nongkon batu mita inta mongogaga. Batu mita tatua in sinadia kon tampat pongongaḻian kon batu, bo pinongkó pinodudui kon ukurannea; dotá in bonunea bo ḷuainea sinondodai in garagaji.

¹⁰Orotan in bangunan tatua pinomia nongkon batu mita moḷoben inta momahaḷ. Batu mita tatua oyúon in 3,5 nometer in kobanatnea, oyúon doman in 4 nometer.

¹¹Kon tudunea in pinakéan in batu mita ibanea inta momahaḷ bo pinongkó pinodudui in ukurannea, bodongka inoḻingoian in kayu ḷokuyú in Libanon.

¹²Dinding in palas in komaḻig bo dinding in palas kon bonu in Baḷoi i TUHAN takin dinding in baḷoi kon dotá in muna in Baḷoi i TUHAN, tumpaḷa inaipan in tumongo gaip in kayu ḷokuyú in Libanon kon tudu in pomuḷoi in toḷu nogaip in batu.

¹³Kon kotá in Tirus oyúon in ḷoḷaki tobatú ki Huram in tangoinea. Sia in monotaau totu-totuu kon oaidan bo kopongalamandon totok momia kon bayongan yagi-yagi nongkon bitú. Boḻeket ki amánea in intau in Tirus bo motaau doman totok momia kon pakakat mita nongkon bitú. Ki inánea in nongkon suku in Naptali. Ki Datu Salomo in nopotabádon in intau minayá nokigamá kon i Huram sin mamangoi bo mobaḻí tongguḷu momia kon bayongan in pakakat inta nongkon bitú. Dá namangoidon in ki Huram bo nomia kon onu inta pinoki aid i Salomo.

¹⁵Ki Huram in nomia kon oigi doyowa nongkon bitú inta kon batúannea koḷantudnea in 8 nometer, koḷobennea in 5,3 nometer, bo kobunod in bitúnea in 7,4 nosenti. Oigi mita tatua nokumbang in bonunea.

¹⁶Kon oigi mita tatua pinogaidannea doman kon uḷunea doyowa nongkon bitú, kon batúannea koḷantudnea in 2,2 nometer

¹⁷notombatangan in bungang koḷantudnea in 1,8 nometer. Kon batúan in uḷu in oigi tatua iḷambáan in doyowa nosimpungoi in bungai in delima nongkon bitú. Kobayongnea komintan in doyowa nogatut in bungai in delima kon batúan in uḷu in oigi. Bo ki Huram in nonuḷapid kon rante nongkon bitú bo pinopouḷaknea kon tudu in oigi mita tatua. Pitu in tuḷapid in rante kon batúan in oigi, bo kon ḻimonik in tuḷapidan in rante tatua oyúon doman in aip tobatú inta noḻimbung. Kon tudu in aip noḻimbung tanaaya

²¹uḷu mita in oigi inta ná batangan in bungang tatua pinoḷutud kon oigi mita tatua. Oigi mita tatua in inukat kon tayowon in ngara tumuot kon Baḷoi i TUHAN — tobatú in kon dotá in toḷatan, bo tobatú in kon dotá in utuan. Inta kon dotá in toḷatan sinangoian Yakhin,[8] bo inta kon dotá in utuan sinangoian Boas.[9] Natuata ki Huram noginḷapat kon oigi mita tatua.

²³Noiduduimai kon tua ki Huram in nomia kon bejana bitú tobatú inta noḻimbung, naa in ukurannea: bonunea 2,2 nometer, botok kon yuaknea in 4,4 nometer bo ḻimbungnea in 13,2 nometer.

²⁴Kon ḻibunea inta kon dotá in ḷuainea iḷambáan in bungai in baḷongká doyowa nopipid, inta cinor noyotakin in bejana tatua.

²⁵Bejana tatua in pinopotudu kon ḻikud in sapi bitú inta mopuḷú bodoyowá — toḷu in sinumayow ná utuan, toḷu in ná toḷatan, toḷu in ná toyopan, bo toḷu in ná pomukaan.

²⁶Kobunod in bejana tatua in 75 nomili. Bingkínea in naonda bo bingkí in galas inta binoyuk ná ḷuai naonda bo bungang inta nosokar. Bonu in bejana tatua in degá 40.000 noliter.

²⁷Ki Huram in nomia doman kon kereta mopuḷú nongkon bitú, kon batúannea in kobanatnea 1,8 nometer, kooḷadnea in 1,8 nometer bo koḷantudnea in 1,3 nometer.

²⁸Kereta mita tatua in pinomia nongkon dopí mita inta notonggopat inta pinopoḷutud kon bongkownea.

²⁹Dopí mita tatua iḷambáan in kurigan in singa, sapi bo kerub. Kon bongkownea mita — kon ḻimonik bo kon ḻimonag in gambar mita in singa bo sapi tatua — noibambé in kurigan in bungang mita.

³⁰Batúan in kereta tatua opat in bolanea inta nongkon bitú bo asnea in bitú doman. Kon siku opat in kereta tatua oyúon doman in oigi inta pogopod kon baskom inta nongkon bitú takin ḷambá inta bungang mita kon dotá in ḷuainea.

³¹Kon ḻimonikan in oigi pogopod tatua in pinoyoguput in bongkow noḻimbung tobatú sin pogopod kon baskomnea. Oigi mita pogopod tatua noiḷontú monik 44 nosenti kon ḻimonik in dopí inta notonggopat tatua, bo 22 nosenti in kon ḻimonagannea. Kon bibig in bongkow tatua oyúon in kurigan.

³²Koḷantud in bolanea mita tatua in 66 nosenti; noiukat kon ḻimonag in dopí mita. As in bolanea bo keretanea in notobatúbí.

³³Bolanea mita tatua in notombatangan in bola in kereta in parang; koḷoben in bolanea, tralinea mita, as bo toyuak in tralinea mita in komintanbí pinomia nongkon bitú.

³⁴Opat in oigi pogogopod inta kon sikunea kon ḻimonag in kereta tatua. Oigi mita tatua in notobatúbí in keretanea.

³⁵Noiḻibu kon kereta tatua oyúonbí in bingkínea inta 22 nosenti in koḷobennea. Oigi opodnea bo dopínea mita komintanbí notobatú in keretanea.

³⁶Oigi mita pogogopod bo dopí mita tatua iḷambáan in gambar in kerub, singa, bo pangkoi in palem kon ondaka in tampat inta nokosong, sinakinan in bungang mita inta pinoḻibu.

³⁷Natuata in pinomomia kon kereta tatua. Komintan notombatangan — batangannea bo ukurannea.

³⁸Ki Huram in nomia doman kon ḷodokan moḷoben mopuḷú, tumongo batu in kon batúan in kereta. Kon batúan in ḷodokan tatua bares toyuaknea in 1,8 nometer bo motaau bonuan in 800 noliter in tubig.

³⁹Inukat i Huram in kereta ḻima kon dotá in toḷatan kon Baḷoi TUHAN, ḻima in kon dotá in utuan. Bejana bitú in inukat kon sikunea kon dotá in tenggara.

⁴⁰Ki Huram in nomia doman kon rumping mita, sikop mita bo palo mita. Onda intua noḷapatdon in bayongan oaidannea kon i Datu Salomo sin kopontingan in Baḷoi TUHAN. Naa in pakakat mita inta ain pinomianea: Oigi moḷoben doyowa Tongguḷu in oigi doyowa inta ná batangan in palo inta inukat kon ḻimonik in oigi doyowa tatua Rante sinuḷapid inta kon batúan in tongguḷu in oigi Opat nogatut in delima bitú inta pinipid doyowa nopipid kon ḻibu in tuḷapidan in rante kon batúan in oigi totokanea Kereta mopuḷú Ḷodokan moḷoben mopuḷú Bejana bitú Sapi bitú mopuḷú bodoyowá inta noguntu kon bejana tatua Rumping mita, sikop mita bo palo mita. Bayongan touḷut in Baḷoi TUHAN tatua, inta pinomia i Huram kon i Datu Salomo, pinomia nongkon bitú, bo iradat nodapot in mopouḻi-uḻinag.

⁴⁶Ki Datu nokiaid in pakakat mita tatua kon tampat pococoran kon logam inta kon sigad in Sukot bo Sartan kon Ḷopá in Yordan.

⁴⁷Diábí in ki Salomo nokisimbang in pakakat mita nongkon bitú tatua, sin totuu modamaḷ. Dá, diábí kinotaauan in kobogat in pakakat mita tatua.

⁴⁸Ki Datu Salomo in nokimia doman in touḷut mita ibanea nongkon buḷawan sin pakéon kon Baḷoi TUHAN. Naa in pakakat mita inta pinomianea tatua: Mezbah Meja pogukatan kon roti inta posumba kon i Allah Sioḷ totuduan in togá mopuḷú inta inukat kon tayowon in Yuang Totok Motusi, ḻima in kon dotá in toḷatan bo ḻima in kon dotá in utuan Bungang mita Togá mita Totupit mita Galas mita Pakakat pomomiong kon togá Palo mita Pindan mita pogukatan kon dupa Pindan mita inta pogukatan kon baga in tuḷú Engsel mita inta pakéon kon Yuang Inta Totok in Motusi bo ḷoḻingkop mita dotá in ḷuai in Baḷoi TUHAN.

⁵¹Naonda in ki Datu Salomo nopaḷut noposindog in Baḷoi TUHAN, sinagúnea kon bonu in gudang mita in baḷoi tatua in bayongan saḷaka, buḷawan, bo pakakat mita ibanea inta ain pinosumba i Daud ki amánea kon i TUHAN.