Read Mongondow DATU MITA IMITÁNEA 8 Bible Online

DATU MITA IMITÁNEA 8 - Mongondow bible

DATU MITA IMITÁNEA 8

¹Nopaḷut mako kon tua ki Datu Salomo nopotabá kon bayongan itoi in suku bo inanakan nongkon bangusa in Israel namangoi kon inia kon Yerusalem sin momamping kon Poti Dodandian i TUHAN nongkon Sion, kotá i Daud, pobayá in Baḷoi TUHAN.

²Dá namangoidon in mosia komintan kon Singgai Moḷoben in Pondok Daun kon buḷan Etanim.

³Naonda in bayongan itoi tatua noyosipun, imang mita nobuat kon Poti Dodandian tatua,

⁴bo dinia kon Baḷoi i TUHAN. Ḷoḷaigan i TUHAN bo bayongan in pakakatnea pinamping doman in imang mita bo in intau in Lewi kon Baḷoi TUHAN.

⁵Ki Datu Salomo bo bayongan rayat in Israel noyosipun kon tayowon in Poti Dodandian tatua bo noposumba kon i TUHAN in domba bo sapi inta diádon koiapan in kobayongnea.

⁶Nopaḷut mako kon tua imang mita nodia kon Poti Dodandian tatua pinotuot kon Baḷoi TUHAN bo inukat kon ḻimonag in patong mita in kerub kon bonu in Yuang Totok Motusi.

⁷Koḻikip in patong mita tatua nobuká noioḻiung kon poti tatua takin kayu mita pononombuḻigan.

⁸Kayu pononombuḻigan tatua totuu mobanat, dá popodnea mita in koontongan nongkon tayowon in Yuang Totok Motusi. (Umaai naa umuranpabí kon tua in kayu mita tatua.)

⁹Kon bonu in Poti Dodandian tatua diábí in ibanea mako koḻikudbí in batu doyowa. Batu mita tatua in binonu i Musa kon poti tatua tungkuḷ kon Buḷud in Sinai, kon dodai in ki TUHAN nomia kon dodandian takin bangusa in Israel kon tungkuḷ in mosia kon binayáan nongkon Mesir minayá in butá in Kanaan.

¹⁰Kon dodai in imang mita iḻumuai nongkon Baḷoi TUHAN tatua indoianmai daḻídon in baḷoi tatua kinokoḷoban in goḷom.

¹¹Goḷom tatua mopouḻi-uḻinagdon in kamuliaan in kinoangoian i TUHAN dá imang mita tatua in diádon motaau tumuot bui mogaid kon oaidan monia.

¹²Dá nosambayangdon in ki Salomo, kainia, “Iko inta nonampat kon mata in singgai kon ḷangit, o TUHAN. Tongá moibo-ibogbí in Iko mogutun kon bonu in sindip in goḷom.

¹³Tanaa in pinosindogkudon kon ini-Mu in baḷoi inta mogaga, inta pogutunan-Mu mononoi.”

¹⁴Naonda in nosambayang mako ki Datu Salomo in nobobuidon kon bayongan in rayat inta sinimindog mako kon tua, bo nopoigum sinbá ki Allah momarakat kon i monia.

¹⁵Sia in nosingog, “Koḻipod in ki TUHAN in nodandidon kon i amáku ki Daud nanaa, ‘Pinangkoi Akuoi nodia kon umat-Ku iḻumuai nongkon Mesir, kon bayongan in butá in Israel diábí in tobatúmai in kotá inta piniḻí-Ku nobaḻí tampat poposindogan in baḷoi tampat poibadaan kon i-Nakó. Táe Iko, Daud, piniḻí-Ku sin momarenta kon umat-Ku.’ Dinayo-dayowdon in ki TUHAN Allah in Israel inta ain nogintompod kon dandi-Nea tatua!”

¹⁶

¹⁷Noiduduimai kon tua ki Salomo in nosingog, “Ki amáku ki Daud ain nonomayá kon moposindog in baḷoi pososumbaan kon i TUHAN Allah in Israel.

¹⁸Táe ki TUHAN in noguman kon inia, ‘Mopiabí in makusudmu tatua.

¹⁹Tongá, deemanbí iko, táe ki adímubí in moposindog in baḷoi-Ku tatua.’

²⁰Tanaa in ki TUHAN in nogintompodon kon dandi-Nea. Akuoi ain nobaḻí datu in Israel nomaḷui kon i amáku, bo akuoi in noposindog domandon in baḷoi pososumbaan kon i TUHAN, Allah in Israel.

²¹Kon bonu in Baḷoi TUHAN tatua aindon sinadiaku in tampat in Poti Dodandian inta pinotagúan kon batu inta pinomaisan kon dodandian i TUHAN takin mogoguyang naton kon tungkuḷ in Sia nodia kon i monia iḻumuai nongkon Mesir.”

²²Nopaḷut mako kon tua, kon tayowon in rayat inta kon tua, ki Salomo sinimindog sinumayow kon mezbah bo notonggó kon ḻimanea doyowa nosimpaḷ

²³bodongka nosambayang, “TUHAN, Allah in Israel! Kon ḷangit andeka kon butá diábí in ná Iko! Iko in nogintotuu kon dandi-Mu bo nopoontong in tabi-Mu kon umat-Mu inta mosatia bo motoindudui takin ḻimbatú in gina kon ini-Mu.

²⁴Iko in nogintompodon kon dandi-Mu kon i amáku ki Daud. Onu inta pinodandi-Mu tatua aindon inaidan-Mu singgai in naa.

²⁵Iko in nodandi domandon kon i amáku kon aka buínea totu-totuu motoindudui kon ini-Mu ná sia, dá umuranbí oyúon in intau tobatú nongkon buínea in mobaḻí datu kon Israel. Tanaa, o TUHAN Allah in Israel, intompodaidon komintan in bayongan inta ain pinodandi-Mu kon i amáku ki Daud, mogogundoi-Mu tua.

²⁶

²⁷Tongá, o Allah, totuu degá kon Iko in mogutun kon butá naa? Umpaka ḷangit inta námai tua in kobanat bo kooḷadnea yo diábí tugatan kon ini-Mu, apapa doman baḷoi inta pinosindogku tanaa!

²⁸Oo TUHAN Allahku, akuoi naa in mogogundoi-Mu! Tongá indongogaipa kaasí in sambayangku, bo duduiaipa in oigumku singgai in naa.

²⁹Poigumon mako singgai doḷom Iko moḷukad kon baḷoi tanaa inta ain piniḻí-Mu nobaḻí tampat pososumbaan kon ini-Mu. Igumon mako nongkon tampat pogogutunan-Mu kon soroga Iko mokidongog bo mongampung kon inakó takin umat-Mu aka kami mamangoi tumayow kon baḷoi tanaa bo mosambayang kon ini-Mu.

³⁰

³¹Aka intau tobatú pinoponapudan kon nogaid kon taḷá kon intau ibanea bo dinia kon mezbah-Mu kon bonu in baḷoi pososumbaan tanaa sin mongibot kon sia in diá kotaḷá,

³²o TUHAN, igumon mako indongogan-Mudon nongkon soroga bo tantúdon in pelekara in bobantung-Mu mita tanaa. Hukum inta kotaḷá podudui in oaidnea bo poḷuatdon kon hukuman in intau inta diá kotaḷá.

³³Aka umat-Mu Israel taḷowon in musung-Nea mita popisí in mosia nomia kon dosa, bo mosia in nobuidon mangoi kon ini-Mu bo mohoromat kon ini-Mu saḷaku TUHAN, onda intua mamangoi kon baḷoi pososambayangan tanaa poḷat mosambayang mopoigum in ampung kon ini-Mu,

³⁴yo igumon mako indongogan-Mupa kon soroga kaasí in mosia. Igumon mako in ampungan-Mupa in dosa in umat-Mu tanaa, bo diaan in mosia mobui kon butá inta ain inogoi-Mu kon mogoguyang monia.

³⁵Aka umat-Mu baradosaan kon ini-Mu bo hukumon-Mu in mosia pongin diá mobogoi in uyan bo mosia in mogogaidon in mogaid kon dosa bo mohoromatdon kon ini-Mu saḷaku TUHAN, onda intua tumayowdon kon baḷoi pososumbaan tanaa poḷat mosambayang kon ini-Mu,

³⁶igumon mako in nongkon soroga in Iko moibogpa mokidongog kon i monia. Bo ampungaipa kaasí in dosa in umat-Mu Israel bo in datu monia. Tundúdon in mosia momia kon onu inta moitutui. Mopaḷut mako kon tua, o TUHAN, popoangoidon in uyan kon butá-Mu tanaa, butá inta inogoi-Mu kon umat-Mu sin mobaḻí kapunyaan monia mononoi.

³⁷Aka butá tanaa koantugan in malarat in gogoy ande kotugatan in yampoi, bo pinomuḷa mita poguyaaton in tompot bo patú in singgai, mahaḷuk andeka pangkoḷá, andeka aka umat-Mu tubuon in musung, andeka kotugatan in takit,

³⁸igumon mako moibogpa in Iko mokidongog kon sambayang monia. Aka nongkon sigad in umat-Mu Israel oyúon in takin kuyang in gina mosambayang kon ini-Mu poḷat motonggó kon ḻimanea popotundú ná baḷoi pososumbaan tanaa,

³⁹yo igumon mako in Iko nongkon tampat-Mu kon soroga moibogpa mokidongog bo mongampung poḷat motuḷung kon i monia. Tongábí Iko in nonotaau kon bonu in gina in intau. Tuamai in popoaidon kon intau podudui doman kon oaid monia tontaní,

⁴⁰sinbá umat-Mu in umuran motoindudui kon ini-Mu kon bonu in mosia mogutun kon butá inta inogoi-Mu kon mogoguyang nami.

⁴¹Aka intau ango-angoi tobatú kon butá inta moyayú mokodongogdon kon kokokawasa-Mu bo inta mokoherang mita inta ain pinomia-Mu kon umat-Mu, bo sia in momangoi in baḷoi pososumbaan tanaa sin mohoromat kon ini-Mu bo mosambayang kon ini-Mu,

⁴²

⁴³yo igumon mako in nongkon tampat-Mu kon soroga moibogpa in Iko mokidongog kon sambayangnea bo mobogoipa doman kon onu inta pinoigumnea. Pongin natua dá bayongan in bangusa kon dunia naa in monotaaudon kon ini-Mu bo motoindudui kon ini-Mu ná umat-Mu Israel. Kotaauandon monia kon baḷoi inta pinosindogku tanaa in tampatbí pososumbaan kon ini-Mu.

⁴⁴Aka Iko momarenta kon umat-Mu mayá moparang monayow kon musung, bo kon ondaka in mosia, mosia in tumayow kon kotá inta piniḻí-Mu tanaa bo mosambayang tumayow kon baḷoi tanaa inta ain pinosindogku kon ini-Mu,

⁴⁵igumon mako kon soroga in Iko mokidongogdon kon sambayang monia tatua, bo mopountung kon i monia.

⁴⁶Aka umat-Mu binaradosadon kon ini-Mu — totuu kon diábí in tobatúmai in intau in diá binaradosa — bo popisí in torú-Mu pinomayá-Mudon mako in mosia sinaḷow in musung, bo dinia nobaḻí intau inta sinokodomok kon parang pinobayá in butá ibanea inta moyayú andeka inta modiug,

⁴⁷igumon mako in Iko in moibog mokidongog kon sambayang monia. Aka kon butá tatua bo taḷaandon monia in dosa mita monia, bo mosambayang kon ini-Mu poḷat doman mongaku kon mosia in binaradosa bo nogaidon kon inta moraat, yo indongogaipa kaasí in sambayang monia, o TUHAN.

⁴⁸Aka kon butá tatua gina monia in nobayagbí bo totu-totuu monaḷámai kon dosa mita monia, bo mosambayang kon ini-Mu poḷat tumayow kon butá tanaa inta inogoi-Mu kon mogoguyang nami, tumayow ná kotá inta piniḻí-Mu bo baḷoi pososumbaan inta ain pinosindogku kon ini-Mu naa,

⁴⁹dá nongkon tampat-Mu kon soroga igumon mako Iko in moibogpa mokidongog kon sambayang monia bo monotabi kon i monia.

⁵⁰Ampungaidon in bayongan dosa bo aid monia inta moraat kon ini-Mu, bo baḻídon in musung mita monia mopoaid in mopia kon i monia.

⁵¹Mosia in umat-Mubí tontaní inta ain dinia-Mu iḻumuai nongkon Mesir butá inta pinononggataan kon i monia.

⁵²Igumon mako in Iko, o TUHAN Allah, umuran moindoimai kon umat-Mu Israel takin datunea. Bo moibogpa kaasí in Iko mokidongog kon sambayang monia pomuḷoi in mosia mokuani mokituḷung kon ini-Mu.

⁵³Iko, o TUHAN Allah, ain nomiḻí kon i monia nongkon sigad in bayongan bangusa sin baḻíon umat-Mu tontaní, ná inta ain pinoguman-Mu kon i monia pinongin mogogundoi-Mu ki Musa, kon tungkuḷ in Iko nodia kon mogoguyang nami iḻumuai nongkon Mesir.”

⁵⁴Naonda in ki Salomo nopaḷut mako nopoyaput in sambayang bo oigum kon tayowon in mezbah i TUHAN takin notonggó kon ḻima, sinimindogdon in sia

⁵⁵bo takin singog noropot nopoigum kon barakat i Allah kon kopontingan in bayongan intau inta noyosipun kon tua, gumannea,

⁵⁶“Dinayo-dayowdon in ki TUHAN inta ain nobogoi in kobiagan notompia kon umat-Nea ná inta pinodandi-Nea pinongin i Musa mogogundoi-Nea. Bayongan inta mopia inta pinodandi-Nea ain inintompodan-Nea.

⁵⁷Igumon mako in ki TUHAN Allah naton in koyota-yotakin naton ná doman kon mogoguyang naton. Igumon mako in diá taḷaan-Nea in kita.

⁵⁸Igumon mako in baḻíon-Nea in kita intau mita inta mosatia kon i-Nia sinbá kita in umuran mobiag podudui in ibog-Nea bo motoindudui kon bayongan in hukum bo parenta inta ain inogoi-Nea kon mogoguyang naton.

⁵⁹Igumon mako in ki TUHAN, Allah naton, umuran mokotorop kon sambayang bo oigum inta ain pinoyaputku tanaa kon i-Nia. Igumon mako in Sia umuran mopoontong in kopopia in gina-Nea kon umat in Israel bo kon datu monia takin mobogoi kon i monia kon onu inta paraḷu monia muḷoi in singgai.

⁶⁰Pongin natua dá bayongan in bangusa kon dunia in monotaaudon kon tongábí ki TUHAN tontaní in Allah, diábí in ibanea mako.

⁶¹Moiko umat-Nea in mustibí umuran mosatia kon i TUHAN, Allah naton bo motoindudui kon hukum mita bo parenta-Nea mita ná inta pinomia monimu singgai naa.”

⁶²Nopaḷut mako kon tua ki Datu Salomo bo bayongan in intau inta nosipun kon tua noposumba in kuruban kon i TUHAN.

⁶³Inogoi nobaḻí kuruban dodamean, ki Salomo in noposumba in 22.000 in sapi bo 120.000 in domba. Natuata in ki datu takin bayongan rayat nomia kon upacara pinonoguḷapatan kon baḷoi i TUHAN.

⁶⁴Singgai tatua doman ki Salomo nonoguḷapat kon dotá in yuak in palas inta kon tayowon in Baḷoi TUHAN tua. Onda intua kon palas tatua sia in noposumba in kuruban payongon, kuruban gandum bo ḷongó in mahaḷuk ogoi nobaḻí kuruban dodamean. Bayongan tua in pinosumbanea kon tua sin mezbah bitú diádon tugat pobonuan kon bayongan in sosumba tatua.

⁶⁵Kon Baḷoi TUHAN tatua ki Salomo bo bayongan umat in Israel nomia kon rame Pondok Daun pitu nosinggai in koonggotnea. Totuu mobarong in intau inta noyosipun kon tua. Mosia in namangoi nongkon butá Hamat kon utuan nodapot in pinosigadan in Mesir kon toḷatan.

⁶⁶Kon singgai noginwaḷu pinotabádon i Salomo nobui in intau mita tatua. Mosia komintan in nodayow kon inia bodongka nobui kon baḷoi monia takin pia in gina, sin bayongan in barakat inta ain inogoi i TUHAN kon mogogundoi-Nea ki Daud bo kon bangusa Israel umat-Nea.