Read Mongondow DATU MITA IMITÁNEA 9 Bible Online

DATU MITA IMITÁNEA 9 - Mongondow bible

DATU MITA IMITÁNEA 9

¹Naonda in nopaḷut mako in ki Salomo noposindog in Baḷoi TUHAN bo komaḻig takin bayongan inta sinomayánea,

²nokipogontong bui in ki TUHAN kon inia ná inta nobaḻí kon Gibeon.

³Ki TUHAN in noguman kon inia, “Sambayangmu inindongogan-Kudon, dá tanaa in baḷoi inta pinosindogmu tanion poniata-Kudon kon mobaḻí tampat mokudus inta umuran mononoi pakéon posumbaan kon i-Nakó. Umuran-Kubí indoian mako bo ḷukadan in tampat tanaa.

⁴Aka iko mogundoi kon i-Nakó takin gina motuḻid bo mobanar ná ki Daud ki amámu, bo iko in motoindudui kon bayongan hukum bo parenta-Ku,

⁵dá intompodan-Kubí in dandi-Ku kon i amámu ki Daud kon adí bo ompunea namonag in umuranbí momarenta kon Israel.

⁶Táe aka iko bo buímu monoḻikud kon i-Nakó bo diá motoindudui kon bayongan in hukum bo parenta-Ku poḷat doman in iko mosumba kon ilah mita ibanea,

⁷dá poguntunon-Ku in umat-Ku Israel nongkon butá inta ain inogoi-Ku kon i monia. Taḷaan-Ku domandon in baḷoi tanaa inta ain sinantú-Ku mobaḻí tampat pososumbaan kon i-Nakó. Kon ondakabí in intau in Israel singkuḻeonbí bo kosingan.

⁸Baḷoi pososumbaan tanaa in mogoguyaatdon dá pomuḷoi in intau inta moitaḻib kon tua in moitaḻikokogdon bo mokoningkim. Mosia in mogumandon, ‘Nongonu sin pomiaanbí i TUHAN natua in butá bo baḷoi tanaa?’

⁹Bo intau in motubag, ‘Popisí in mosia nonaḷámai kon i TUHAN, Allah monia, inta ain nogatod kon mogoguyang monia iḻumuai nongkon Mesir. Mosia in nosumbadon kon ilah mita ibanea. Manangka intua pinopouma i TUHAN in bodito kon i monia.’ ”

¹⁰Ki Salomo noposindog in Baḷoi TUHAN bo komaḻig in datu kon bonu in doyowa nopuḷú notaong.

¹¹Bayongan in kayu ḷokuyú in Libanon bo kayu ḷokuyú biasa takin bayongan in buḷawan inta paraḷu i Salomo pinogaid kon tua in inogoibí i Datu Hiram kon inia. Naonda in oaidan tatua noḷapat, ki Datu Salomo in nobogoi kon i Hiram in doyowa nopuḷú in kotá kon butá in Galilea.

¹²Dá binayádon inindoian i Hiram intua, táe diá nosanang in ginanea in nokoontongmai kon onu inta inogoi tatua.

¹³Noguman in sia kon i Salomo, “Utatku, nábí nion uḻe in batangan in kotá mita inta inogoimu tua kon inakó?” Tuamai butá tatua sinangoianpa Kabul.[10]

¹⁴Noiḻiudon kon 4.000 nokilo in buḷawan in pinoki dia i Hiram kon i Salomo.

¹⁵Ki Datu Salomo in nomakisa nokiaid in Baḷoi TUHAN, takin komaḻig in datu, dinding in Yerusalem bo nopomumbun in butá kon dotá in toḷatan in Baḷoi TUHAN. Sia in nomakisa doman nokiaid bui in kotá in Hazor, Megido bo Gezer. (

¹⁶Kotá in Gezer naa in kotá inta koḻipod sinubu bo sinaḷow i datu in Mesir, bo intau mita inta nogutun kon tua in sinokoḻimod bo kotánea in sinurub. Kon singgai noiduduimai kotá tatua inogoi i datu in Mesir kon i adínea bobay nobaḻí tombuinag kon singgai pinonikaannea takin i Salomo.

¹⁷Bo ki Salomodon in noposindog bui in kotá tatua.) Nopomaké doman in ata in ki Salomo nokiposindog bui in Bet-Horon-Hilir,

¹⁸Baalat, Tamar kon padang gurun Yohuda,

¹⁹Kotá mita inta pinotagúan kon tongkaaḷ, bo kotá mita inta nobaḻí pososipunan kon kereta in parang bo kabaḷonea. Bayongan in tomayá pobangonan kon Yerusalem, Libanon, bo kon bayongan in butá inta kon bonu in kawasanea aindon inaidannea.

²⁰Kon pinogaidan tatua ki Salomo nomaké in intau mita buí in intau Amori, Het, Peris, Hewi bo Yebus. Mosia tua in intau mita buí in bangusa Kanaan inta diá motaau daiton ḻimodon in intau in Israel kon dodai in mosia ḻimitúdon kon butá tatua. Umaai naa buí monia tantúpa nobaḻí ata.

²²Intau in Israel diábí binaḻí i Salomo ata; mosia in binaḻí tontara, porwira, tongguḷu totok in tontara, komandan in kereta in parang, bo tontara inta tumakoi kon kabaḷo.

²³Ḻima nogatut bo ḻima nopuḷú in pogawai in pinoki indo-indoian in intau mita inta pinakisa mogaid kon oaidan i Salomo.

²⁴Butá kon dotá in toḷatan in Baḷoi TUHAN binumbunan i Salomo naonda in ki buḷoinea, inta ki adí i datu in Mesir, nomamping nongkon kotá i Daud minayá in komaḻig inta inaidan i Salomo kon inia.

²⁵Kotoḷu in totaong in ki Salomo moposumba in kuruban payongon bo kuruban dodamean kon tudu in mezbah inta ain pinosindognea kon i TUHAN. Motubá doman in sia kon dupa kon i TUHAN. Natuata in ki Salomo noginḷapat kon Baḷoi TUHAN.

²⁶Kon totubuan in kapaḷnea, nomia doman in ki Datu Salomo kon kapaḷ mita kon Ezion-Geber, kon diug in Elot kon pintad Ḷuok in Akaba, butá in Edom.

²⁷Ki Datu Hiram nopoangoi doman in intau mita inta mododia kon kapaḷnea inta kopongalaman sin ḷumeag moyotakin in intau mita in kapaḷ i Salomo.

²⁸Nokoimontandon in mosia iḷumeag kon butá in Opir sin mogamá kon buḷawan 14.000 nokilo bo diaan kon i Salomo.