Read Mongondow DATU MITA 2 11 Bible Online

DATU MITA 2 11 - Mongondow bible

DATU MITA 2 11

¹Naonda in kinotaauan i Atalya kon ki Datu Ahazia, ki adínea in minatoidon, pinarentaanneadon sinbá bayongan in ginaḷum motoḷuadí i Ahazia in ḻimodon.

²Ki Yoas adí i Ahazia in gogió bo kinoḻimodan doman pinoyotakin in adí mita ḷoḷaki ibanea i datu, táe nokoḷagui in sia sin pinoḷagui i Yoseba pokuináanea. Ki Yoas takin moḷoḷukadnea in dinia bo binuni kon bonu in gopot tobatú kon Baḷoi TUHAN.

³Onom notaong in koonggotnea in pinomiagan i Yoseba kon adí tatua kon bonu in Baḷoi TUHAN kon tungkuḷ in ki Atalya nobaḻí datu.

⁴Kon taong noginpitu, porwira mita moḷoḷukad tontaní i datu bo moḷoḷukad mita kon komaḻig inoiní i Imang Yoyada sin moyodungkuḷnea kon Baḷoi TUHAN. Kon tua pinoki pongibotannea in mosia kon mogaid kon tombayánea. Pinoontongnea kon i monia in ki Yoas, ki adí ḷoḷaki i Datu Ahazia,

⁵bo nobogoi in parenta tanaa, “Aka moiko mopobayá in oaidan monimu kon singgai in Sabat, yo tongosilai kon i monimu in musti moḷukad kon komaḻig,

⁶tongosilai doman in kon bonawang in Sur, bo ki agatnea in kon bonawang kon tumi in moḷoḷukad mita ibanea.[13]

⁷Doyowa nopaanan inta noiḷuatdon kon oaidan kon singgai in Sabat in mustibí moḷukad kon Baḷoi TUHAN takin kedang inta ain kokada-kadai sin moḷukad kon i Datu Yoas. Mustibí ḷukadan monimu in sia kon ondakabí in bayáannea, bo pomuḷoi in intau inta monungkuḷ dimiug kon i monimu, mustibí ḻimodon monimu.”

⁹Porwira mita tatua in dinumudui kon parenta i Yoyada bo nodia mangoi kon inia in intau monia inta musti mopobayá in oaidan bo inta noiḷuat kon oaidan monia kon singgai in Sabat tatua.

¹⁰Ki Yoyada in nobogoi kon porwira mita tatua in pandong mita bo kaḻeaw mita i Datu Daud inta sinagú kon Baḷoi TUHAN.

¹¹Bo Moḷoḷukad mita, kon batúannea in nokadaidon kon kedang mita bo nogamá kon tampat monia kon ḻibumai inta kon dotá in muna kon Baḷoi TUHAN sin moḷukad kon i datu.

¹²Nopaḷut mako kon tua ki Yoyada in nodia mangoi kon i Yoas, bo pinopo bongkowan in mahkota in datu kon uḷunea, bo inogoian in buk in sia Hukum i Allah. Ki Yoas in dinuí nobaḻí datu bo tua in pinotaaudon kon bayongan in rayat. Komintan nonggoḷokap bo norogiow, “Kobiag datu!”

¹³Kinodongogan i Ratu Atalya in giow in moḷoḷukad mita bo rayat. Iḻimikat in sia minayá kon Baḷoi TUHAN, kon tampat inta pinosipunan in intau nobayong.

¹⁴Inontongnea in datu inta nobagu tatua sinimindog kon ngara tumuot in Baḷoi TUHAN kon tampat pinoduían kon inia, iḻibu in porwira mita bo mogogirup mita kon torompet. Bayongan in rayat norogiow takin pia in gina sindaḷan nogirup kon torompet. Takin yaat in gina ki Atalya nomerak kon ḷambungnea, bo nomaḷú, “Bangkang! Bangkang!”

¹⁵Diá inogoi i Yoyada in ki Atalya ḻimodon kon diugmai in Baḷoi TUHAN, dá noguman in sia kon porwira mita, “Diadon in sia ḷumuai pongin pipidan in moḷoḷukad bo ḻimod in ki inekabí inta moḷongasi moposaḷamat kon inia.”

¹⁶Dinomok monia in sia, bo dinia kon komaḻig. Kon tua iḻimod in sia kon tayowon in Bonawang Kabaḷo.

¹⁷Ki Imang Yoyada in nopotabá kon i Datu Yoas bo rayat nomia kon dodandian takin i TUHAN kon mosia in mobaḻíbí umat i TUHAN. Sia in nokiaid doman kon i datu in dodandian takin rayat.

¹⁸Nopaḷut mako kon tua rayat in nonubu bo nogumpag kon kuil Baal. Mezbah takin patongnea mita in irimumud, bo ki Matan, imang in Baal iḻimod kon tayowon in mezbah mita tatua. Ki Yoyada in nopotabá kon moḷoḷukad sin moḷukad kon Baḷoi TUHAN,

¹⁹bo sia takin porwira mita, moḷoḷukad tontaní kon i datu bo moḷoḷukad mita kon komaḻig bo bayongan in rayat nodia kon i Datu Yoas nongkon Baḷoi TUHAN minayá in komaḻig. Ki Yoas in sinumuot nongin Ngara in Moḷoḷukad bo iḻimitú kon ḷoḻitúan in datu.

²⁰Nosanang in gina in bayongan in rayat, bo nobiag doman notompia in intau kon kotá bo ki Atalya in iḻimodon.

²¹Ki Yoas in umur pitu notaong kon dodai in nobaḻí datu in Yohuda.