Read Mongondow DATU MITA 2 15 Bible Online

DATU MITA 2 15 - Mongondow bible

DATU MITA 2 15

¹Kon taong nogindoyowa nopuḷú bo pitu kon pinomarentaan i Datu Yerobeam II kon Israel, ki Uzia[15] ki adí i Amazia in nobaḻí datu in Yohuda.

²Kon dodai intua sia in umur 16 notaong bo nomarenta kon Yerusalem in 52 notaong in koonggotnea. Ki inánea in ki Yekholya, bobay in Yerusalem.

³Ná ki amánea, ki Uzia in nogaid doman kon onu in mokosanang kon gina i TUHAN.

⁴Táe nokomanasaḷan, diábí irumbunnea in tampat mita pososumbaan kon dewa, dá rayat in umuranpabí doman moposumba in kuruban bo motubá kon dupa kon tua.

⁵Pinopoumaan i TUHAN in sia in takit kuḻit inta mokoondok, bo nodapot in sia minatoi, takit tatua in diá bidon nopia-pia. Sia in pinotontanídon kon baḷoi tobatú pinopoyayú bo pinoḷuat kon oaidannea mita. Ki Yotam ki adínea ḷoḷaki in nomarenta saḷaku oḻitnea.

⁶Ouman ibanea kon i Datu Uzia in pinais kon bonu in buk Ouman in Datu mita in Yohuda.

⁷Ki Uzia in minatoi bo iḷobong kon poḷoḷobongan kon datu mita kon Kotá i Daud. Ki Yotam ki adínea ḷoḷaki in nobaḻí datu nonoḻiu kon inia.

⁸Kon taong nogintoḷu nopuḷú bo waḷu kon pinomarentaan i Datu Uzia kon Yohuda, ki Zakharia ki adí i Yerobeam II in nobaḻí datu kon Israel bo nomarenta kon Samaria onom nobuḷan in koonggotnea.

⁹Notongkai doman in datu mita inta nomarenta noiuna kon inia, sia in binaradosa doman kon i TUHAN. Sia in dinumudui kon aid moraat i Datu Yerobeam I, inta ain nokopopisí kon intau in Israel binaradosa.

¹⁰Ki Salum ki adí i Yabesh, noyopopog moḷawang kon i Datu Zakharia, bo noḻimod kon inia kon Yibleam, bo nobaḻí datu nomaḷui kon inia.

¹¹Dá nobaḻídon in onu inta pinodandi muna i TUHAN kon i Datu Yehu kon adí bo ompunea noidapot in buí noginggopat[16] in mobaḻí datu kon Israel. Ouman ibanea kon i Datu Zakharia, in pinais kon bonu in buk Ouman in Datu mita in Israel.

¹³Kon taong intoḷu nopuḷú bo siow kon pinomarentaan i Datu Uzia kon Yohuda, ki Salum ki adí i Yabesh in nobaḻí datu in Israel. Sia in nomarenta kon Samaria tongá tobuḷan

¹⁴sin ki Menahem ki adí i Gadi in namangoi nongkon Tirza bo minayá in Samaria, bo noḻimod kon i Salum, bo nobaḻí datu nomaḷui kon inia.

¹⁵Kon daḷan nongkon Tirza, ki Menahem in nomoguyaatdon totok kon kotá in Tipsah bo butá mita inta kon diugneamai poḷat noyopú kon bayongan in intau inta nogutun kon tua. Popisí in kotá tatua in doí tumungkud kon inia, dá binotaknea in sian in bobay mita inta nonogusian kon bonu in kotá tatua. Ouman ibanea kon i Datu Salum, noitakin doman in pinoyopopogannea, in pinais kon bonu in buk Ouman in Datu mita in Israel.

¹⁷Kon taong intoḷu nopuḷú bo siow kon pinomarentaan i Datu Uzia kon Yohuda, ki Menahem ki adí i Gadi in nobaḻí datu in Israel, bo nomarenta kon Samaria mopuḷú notaong in koonggotnea.

¹⁸Kinoouput in kobiagannea binaradosa in sia kon i TUHAN sin dinumudui kon aid moraat i Datu Yerobeam I, inta nokopopisí kon intau in Israel binaradosa.

¹⁹Naonda in ki Pul[17] datu in Asyur nonubu kon Israel, ki Menahem nobogoi kon inia in 34.000 nokilo in saḷaka sinbá sia in motuḷung moginrigon kon kawasa i Menahem kon Israel.

²⁰Pinototayak i Menahem kon doit tatua in nomakisa kon intau mita inta nooyúon kon Israel kon batúannea mobogoi in ḻima nopuḷú in doit saḷaka. Tuamai in ki Pul nonaḷámai kon butá tatua bo nobui kon butánea tontaní.

²¹Ouman ibanea kon i Datu Menahem in pinais kon bonu in buk Ouman in Datu mita in Israel.

²²Minatoi in sia bo iḷobong, bo ki Pekhaya ki adínea nobaḻí datu nonoḻiu kon inia.

²³Kon taong noginḻima nopuḷú kon pinomarentaan i Datu Uzia kon Yohuda, ki Pekhaya ki adí i Menahem in nobaḻí datu in Israel bo nomarenta kon Samaria doyowa notaong in koonggotnea.

²⁴Binaradosa in sia kon i TUHAN sin dinumudui kon aid moraat i Datu Yerobeam I, inta nokopopisí kon intau in Israel binaradosa.

²⁵Tobatú kon sigad in porwiranea, inta ki Pekah adí i Remalya, noyopopog in intau ḻima nopuḷú inta nongkon Gilead. Bo kon bonu in benteng tobatú kon komaḻig in Samaria mosia in noḻimod kon i Pekhaya takin intau doyowa ibanea inta ki Argob bo ki Arye in tangoi monia. Onda intua ki Pekah in nobaḻí datu nomaḷui kon i Pekhaya.

²⁶Ouman ibanea kon i Datu Pekhaya in pinais kon bonu in buk Ouman in Datu mita in Israel.

²⁷Kon taong noginḻima nopuḷú bodoyowá kon pinomarentaan i Datu Uzia kon Yohuda, ki Pekah ki adí i Remalya in nobaḻí datu in Israel. Sia in nomarenta kon Samaria doyowa nopuḷú notaong in koonggotnea.

²⁸Binaradosa in sia kon i TUHAN sin dinumudui kon aid moraat i Datu Yerobeam I inta nokopopisí kon intau in Israel binaradosa.

²⁹Kon tungkuḷ in pinomarentaan i Pekah, ki Tiglat-Pileser Datu in Asyur nogagow kon kotá in Iyon, Abel-Bet-Maakha, Yanoah, Kedes, Hazor, butá in Gilead, Galilea bo Naptali. Intau mita inta nogutun kon tua in dinianea doman nobaḻí intau mita inta dinakop bo dinia kon Asyur.

³⁰Kon taong indoyowa nopuḷú kon pinomarentaan i Datu Yotam adí i Uzia kon Yohuda, ki Hosea ki adí i Ela in noyopopog noḷawang kon i Datu Pekah bo noḻimod kon inia, bo nobaḻí datu nomaḷui kon inia.

³¹Ouman ibanea kon i Datu Pekah in pinais kon bonu in buk Ouman in Datu mita in Israel.

³²Kon taong nogindua kon pinomarentaan i Datu Pekah adí i Remalya kon Israel, ki Yotam ki adí i Uzia in nobaḻí datu in Yohuda.

³³Kon dodai intua umurnea in bagu 25 notaong bo nomarenta in sia kon Yerusalem mopuḷú bo onom notaong in koonggotnea. Ki inánea in ki Yerusa ki adí i Zadok.

³⁴Ki Yotam in nogaid kon inta mokosanang kon gina i TUHAN, naonda bo ki Uzia ki amánea.

³⁵Táe nokomanasaḷan tampat mita pososumbaan kon dewa in diábí irumbunnea dá rayat in umuranbí doman moposumba in kuruban bo notubá kon dupa kon tua. Ki Yotam naa inta noposindog in Bonawang kon dotá in Utuan kon Baḷoi TUHAN.

³⁶Kon tungkuḷ in ki Yotam nomarenta, ki TUHAN in nomangkoidon nokidia kon i Rezin datu in Siria bo kon i Pekah datu in Israel sin monubu kon Yohuda. Ouman ibanea kon i Datu Yotam in pinais kon bonu in buk Ouman in Datu mita in Yohuda.

³⁸Minatoi in sia bo iḷobong kon poḷoḷobongan kon datu mita kon kotá i Daud. Ki Ahas ki adínea in nobaḻí datu nonoḻiu kon iná.