Read Mongondow DATU MITA 2 17 Bible Online

DATU MITA 2 17 - Mongondow bible

DATU MITA 2 17

¹Kon taong noginpuḷú bo doyowa kon pinomarentaan i Datu Ahas kon Yohuda, ki Hosea ki adí i Ela in nobaḻí datu in Israel, bo nomarenta in sia kon Samaria siow notaong in koonggotnea.

²Binaradosa in sia kon i TUHAN, táe dosanea tua in diábí ná kobayong in dosa in datu mita in Israel inta nomarenta noiuna kon inia.

³Sia in sinubu bo pinotungkud i Salmaneser datu in Asyur, dá muḷoi in taong musti in sia moguboḻi kon iba kon inia.

⁴Táe kon wakutu tobatú, ki Hosea in nopotabá in totabá kon i So datu in Mesir sin mopoigum in totuḷungnea. Bo ki Hosea in nogogaidon in noguboḻi kon iba taongan kon i Asyur. Naonda in kinotaauan i Salmaneser in aid i Hosea tatua, dinomoknea in ki Hosea bo binonunea kon ponjara.

⁵Onda intua ki Salmaneser datu in Asyur[19] nonubu kon Israel bo nongopung kon Samaria. Kon taong intoḷunea kon pinongopungan tatua,

⁶— inta taong noginsiow kon pinomarentaan i Hosea — ki Salmaneser nogagow kon Samaria. Bo intau in Israel in dinianea nobaḻí intau mita inta sinoko dakop pinobayá in Asyur. Tongosilai kon i monia pinobayánea in kotá Halah, tongosilai in kon diug in Ongkag in Habor kon butá in Gozan, bo tongosilai doman in kon kotá mita in butá in Madai.

⁷Samaria in noḷabú sin intau in Israel binaradosa kon i TUHAN, Allah monia, inta ain noposaḷamat kon i monia nongkon datu in Mesir bo nodia kon i monia iḻumuai nongkon butá tatua. Mosia in nosumba kon ilah mita ibanea

⁸bo dinumudui kon kabiasaan in bangusa mita inta ain pinoguntun i TUHAN kon tungkuḷ in bangusa in Israel minayá nomarang kon bangusa mita tatua. Bangusa in Israel in dinumudui kon adat inta sinantúdon in datu mita in Israel,

⁹bo nogaid kon inta diá inogoi i TUHAN Allah monia aidan. Noposindog in mosia in tampat pososumbaan kon dewa kon bayongan in kotá monia, pinomayá kon kotá mointok andeka kon kotá moḷoben.

¹⁰Kon tudu in batúan buḷud bo kon siungon in bayongan in kayu inta mongobambar, noposindog in mosia in tugu mita bo patong mita i Dewi Asyera.

¹¹Notubá doman in mosia kon dupa kon bayongan in mezbah sin mosumba kon dewa, ná kabiasaan in bangusa mita inta ain pinoguntun i TUHAN nongkon butá in Kanaan. Nosumba in mosia kon berhala umpaka ain inimaḷowan i TUHAN. Bayongan in aid monia inta moraat nokopomuká kon torú i TUHAN.

¹²

¹³Ki TUHAN in nopotabá in totabá mita bo nabi-Nea mita namangoi kon umat in Israel bo Yohuda sin mopotaau in tompoingat tanaa: “Pogogaidon in mogaid kon inta moraat bo duduiaidon in bayongan in parenta bo hukum inta inogoi-Ku kon mogoguyangmu bo kon inimu pinongin nabi mita, mogogundoi-Ku mita tatua.”

¹⁴Táe Israel bo Yohuda in doíbí mokidongog. Motogat in gina in mosia naonda bo mogoguyang monia inta diá mopirisaya kon i TUHAN, Allah monia.

¹⁵Israel bo Yohuda in doíbí dumudui kon parenta mita i TUHAN bo diá mosatia kon dodandian inta ain pinomia-Nea takin mogoguyang monia. Diábí in pandungonmai monia in toboḷow mita táe tongábí mosumba kon berhala mita inta diá in mangaḻenea. Dá mosiadon tontaní in nobaḻí diá in mangaḻenea. Dinumudui in mosia kon oaid in bangusa mita kon diugmai monia, umpaka ain inimaḷowan i TUHAN.

¹⁶Mosia in iḻimimpat kon bayongan in hukum i TUHAN, Allah monia, bo nomia kon sapi doyowa nongkon logam sin sumbáan. Mosia in nomia kon patong i Dewi Asyera, mosumba kon tundi mita bo moibada kon i Dewa Baal.

¹⁷Noposumba in mosia kon i adí monia nobaḻí kuruban payongon kon i dewa. Mosia in momaké in totaau bo mopoigum in topotundú nongkon mogogoiní kon dimukud mita. Totok in motoindudui in mosia in mogaid kon bayongan inta diá mokosanang kon gina i TUHAN

¹⁸dá sinumorúdon totok in Sia kon i monia bo diá noindoimai kon i monia. Iḷumbú-Nea in mosia nongkon butá inta inogoi-Nea kon i monia; dongkadon dodatuan in Yohuda in sinaḷáan.

¹⁹Intau mita in Yohuda in diádon dinumudui kon hukum mita i TUHAN, Allah monia. Mosia in dinumudui kon kabiasaan mita in intau in Israel,

²⁰dá inindoídon i TUHAN in bayongan in umat in Israel. Ihukum-Nea bo inogoi-Neadon in mosia kon musung mita monia inta mongoraat totok. Diá bidon inindoian-Neamai in mosia, táe iḻumbú-Neadon in mosia nongkon butá inta inogoi-Nea kon i monia.

²¹Onda intua ki TUHAN in nopoyotondídon kon Israel bo Yohuda, intau in Israel in noduídon kon i Yerobeam ki adí i Nebat nobaḻí datu monia. Ki Yerobeam in nodia kon i monia nonaḷámai kon i TUHAN bo nogaid kon dosa mita inta moḷoben.

²²Mosia in dinumudui kon oaid i Yerobeam bo umuran mogaid kon bayongan in dosa inta inaidannea,

²³dá kon imbuitnea ki TUHAN in doídon noindoimai kon i monia, noidapotdon in iḷumbú in mosia nongkon butá inta inogoi-Nea kon i monia. Tua in nobaḻí notongkai ná tompoingat inta ain inogoi i TUHAN kon i monia pinongin mogogundoi-Nea mita, inta nabi mita. Natuata in nobaḻí intau in Israel in dinia iḻumbú kon butá in Asyur, bo kon tuadon in pinogutunan monia noidapot in tanaa.

²⁴Nobaḻí toḻiu in intau in Israel inta ain dinia kon pinoḷumbúan tatua, ki datu in Asyur nokipogutundon kon kotá mita in Samaria,[20] intau mita nongkon Babel, Kuta, Awa, Hamat, bo Separwaim. Intau mita tatua in iḻimitúdon kon kotá mita tatua bo nogutundon notantú kon tua.

²⁵Kon tungkuḷ in mosia momangkoidon mogutun kon tua diábí in mosia mohoromat kon i TUHAN; tuamai in ki TUHAN nopoangoi in singa mita sin modomok kon tongosilai in intau nongkon i monia.

²⁶Bo pinotaau in intau kon i datu in Asyur kon intau mita inta sinampatnea kon kotá mita in Samaria in diá nonotaau kon hukum mita in dewa kon butá tatua. Tuamai in dewa tatua nopoangoidon i singa sin modomok kon i monia.

²⁷Manangka intua ki datu Asyur in nomarenta sinbá imang tobatú nongkon sigad in intau mita inta sinokodakop inta ain iḻumbú kon Asyur, pokidiadon bui mayá in Samaria. “Pokipobuiaidon in sia bo mogutun kon tua sinbá motaaudon in sia motundú kon intau mita kon tua in hukum mita in dewa kon butá tatua,” guman i datu.

²⁸Dá imang in Israel, inta ain dinia nongkon Samaria pinobayá in Asyur, in nobui bo nogutun kon Betel. Kon tua in sia notundú kon rayat kon naonda in pososumba kon i TUHAN.

²⁹Táe intau mita inta nogutun kon Samaria tua in umuranbí doman momia kon berhala mita monia tontaní bo ukaton monia kon kuil inta pinosindog in intau in Israel inta dungkuḷmai nogutun kon kotá tatua. Kon batúan in suku momia kon berhalanea tontaní kon kotá inta pinogutunan monia:

³⁰Intau in Babel nomia kon patong i Dewa Sukot-Benot, intau in Kuta nomia kon patong i Nergal, intau in Hamat patong i Asima,

³¹Intau in Awa in patong i Nibhas bo i Tartak, bo intau in Separwaim in noposumba in adí mita monia nobaḻí kuruban payongon kon i Dewa Adramelekh bo kon i Anamelek.

³²Koḻikud in mosumba kon dewa mita tatua, mosia in mosumba doman kon i TUHAN. Mosia in momiḻí doman kon sigad monia in noyagi-yagimai in intau sin mopobayá in oaidan imang sin moposumba in kuruban kon kuil mita in berhala.

³³Dá, mosia tua in mosumba kon TUHAN, táe mosumba doman kon dewa mita monia tontaní, podudui in adat kabiasaan kon butá monia.

³⁴Umaai in singgai naa mosia in umuranpabí doman mopobayá in adat kabiasaan monia. Mosia in diábí moibada kon i TUHAN bo diá doman motoindudui kon hukum mita bo parenta-Nea mita inta inogoi-Nea kon buí i Yakub, inta sinangoian-Nea doman Israel.

³⁵Ki TUHAN ain nomia kon dodandian noiduduimai takin umat in Israel, “Dika moibada kon ilah mita ibanea mako; dika tumungkud mosumba kon i monia andeka mogundoi kon i monia, andeka moposumba in kuruban kon i monia.

³⁶Horomatbí in Akuoi, ki TUHAN, inta ain nodia kon i monimu iḻumuai nongkon Mesir takin kawasa inta moḷoben; sumbadon in Akuoi bo posumbadon in kuruban kon i-Nakó.

³⁷Umurandon duduiai in hukum mita bo parenta mita inta ain pinais-Ku kon inimu. Dika moibada kon ilah mita ibanea mako,

³⁸Bo dika ḻiongon monimu in dodandian kon sigad-Ku bo i monimu.

³⁹Duduiaidon in Akuoi, ki TUHAN Allahmu, dá poḷuaton-Kudon in moiko nongkon musung mita monimu.”

⁴⁰Táe intau mita in Samaria tatua in doíbí mokidongog; mosia in umuranbí kumadai kon adat kabiasaan monia.

⁴¹Dá, mosia in mosumba kon i TUHAN, táe mosumbabí doman kon berhala mita monia. Dapotpabí doman in singgai naa in buí monia tantúpa doman momia kon natua.