Read Mongondow DATU MITA 2 22 Bible Online

DATU MITA 2 22 - Mongondow bible

DATU MITA 2 22

¹Ki Yosia in umur 8 notaong kon dodai in sia nobaḻí datu in Yohuda, bo nomarenta in sia kon Yerusalem 31 notaong in koonggotnea. Ki inánea in ki Yedida ki adí i Adaya, nongkon Bozkat.

²Ki Yosua in nomia kon onu inta kinosanang in gina i TUHAN. Dinumudui in sia kon aid i Datu Daud mogoguyangnea, bo dinumudui kon bayongan in hukum i Allah diá in sinaḻiban.

³Ki Datu Yosia in binantungan in momomais in negara tobatú inta tangoinea in ki Sapan adí i Azalya, ki ompu i Mesulam. Kon taong impuḷú bo waḷu kon pinomarentaan i Datu Yosia, ki datu in nobogoi in parenta tanaa kon momomaisnea tatua, “Bayádon kon i Imang Moḷoben ki Hilkia kon Baḷoi TUHAN, bo poigumdon kon inia mopoyaput in lapuran in kobayong doit inta ain sinipun in imang mita inta nopobayá in oaidan kon ngara tumuot kon Baḷoi TUHAN.

⁵Potabádon in sia mobogoi in doit tatua kon moḷoḷukad mita kon oaidan kon Baḷoi TUHAN. Mosia in mustibí mopomaké in doit tatua sin poguboḻi kon pogaidan

⁶in mogogimok, bo mogogaid kon bangunan bo bas in batu, bo motaḷui kon kayu bo batu inta pakéon.

⁷Moḷoḷukad mita kon oaidan tatua in motuḻid totok in gina, dá diá bidon paraḷu poiguman kon lapuran in doit nongkon i monia.”

⁸Ki Sapan in nopotaau in parenta i datu kon i Hilkia, bo ki Hilkia in nongonguman kon i Sapan kon sia in nokouḻídon kon buk in hukum mita i TUHAN kon Baḷoi TUHAN. Ki Hilkia in nobogoi in buk tatua kon i Sapan, bo binaca i Sapan.

⁹Nopaḷut mako kon tua ki Sapan nobuidon minayá kon i datu bo nopotaau kon doit inta sinagú kon Baḷoi TUHAN in ginamádon bo inogoi in bobantung mita i datu kon moḷoḷukad mita kon oaidan monompia kon Baḷoi TUHAN.

¹⁰Onda intua ki Sapan in noguman, “Ki Hilkia in nobogoi in buk tanaa kon inakó.” Bo ki Sapan in nobaca kon buk tatua kon tayowon i datu.

¹¹Nokodongogmai kon bonu in buk tatua, ki datu in nomera-merak kon ḷambungnea sin norobonoḷ in ginanea.

¹²Bo ki datu in nobogoi in parenta tanaa kon i Imang Hilkia, ki Ahikam ki adí i Sapan, ki Akhbor ki adí i Mikha, ki Sapan momomais in negara, bo ki Asaya totabá i datu:

¹³“Bayádon poḻibó kon i TUHAN sin kopontinganku bo kopontingan in bayongan in rayat in Yohuda soaḷ tombonu in buk tanaa. Ki TUHAN in sinumorú kon i naton sin mogoguyang naton in diá nopobayá in parenta mita inta pinais kon bonunea.”

¹⁴Dá minayádon in ki Hilkia, ki Ahikam, ki Akhbor, ki Sapan bo ki Asaya nopoigum in totundú kon bobay tobatú inta ki Hulda in tangoinea. Sia in nabi inta nogutun kon ḻipú mobagu kon Yerusalem. Ki buḷoinea in ki Salum adí i Tikwa, ki ompu i Harhas; sia in mononoḻisí kon pakeang in ibada kon Baḷoi TUHAN. Naonda in ki Hulda nokodongog kon katarangan monia,

¹⁵nopotabá in sia kon i monia nobui kon i datu bo nopotaau

¹⁶in tosingogon i TUHAN tanaa: “Akuoi in mohukumbí kon Yerusalem bo bayongan in intau inta nogutun kon tua ná inta pinais kon bonu in buk inta bagu binaca i datu.

¹⁷Mosia in nonaḷámaidon kon i-Nakó bo noposumba in kuruban kon ilah mita ibanea. Bayongan inta inaidan monia tua in nokopomukádon kon torú-Ku. Akuoi in sinumorú kon Yerusalem, bo torú-Ku in diábí motaau poonowon.

¹⁸Táe kon i Datu Yosia, naa in koyow-Ku, ki TUHAN Allah in Israel, ‘Naonda in iko nokodongog kon onu inta pinais kon bonu in buk tatua,

¹⁹nomanasaḷ in iko bo inumompá kon tayowon-Ku. Ginogondok-Kudon kon mohukum kon Yerusalem bo intaunea mita. Aidan-Ku kon kotá tatua in oontongon inta mokoondok, bo tangoi in Yerusalem in baḻíon-Ku tangoi kutukon. Táe naonda in kinodongoganmu in gogondok-Ku tatua, nongombaḷ in iko bo nomerak kon ḷambungmu nobaḻí tomponuot kon morobonoḷ in ginamu. Dinongog-Kudon in sambayangmu,

²⁰tuamai hukuman kon Yerusalem in diábí popoḷabú-Ku kon dodai in mobiagpa in iko. Iko in matoibí pia-pia mako.’ ” Dá nobuidon in totabá mita tatua kon i datu bo nopotaau in koyow tatua.