Read Mongondow DATU MITA 2 3 Bible Online

DATU MITA 2 3 - Mongondow bible

DATU MITA 2 3

¹Kon taong noginpuḷú bo waḷu kon pinomarentaan i Yosapat datu in Yohuda, ki Yoram ki adí i Ahab in nobaḻí datu in Israel bo nomarenta kon Samaria mopuḷú bodoyowá notaong in koonggotnea.

²Nogaid in sia kon onu inta moraat kon mata i TUHAN, táe koraatnea in diábí ná moraat i Ahab bo i Izebel, guyanganea. Patong inta pinomia i amánea sin mosumba kon Baal in inumpagneadon.

³Tongá, ná ki Datu Yerobeam ki adí i Nebat inta nomarenta noiuna kon inia, sia in nokopopisí domandon kon intau in Israel binaradosa bo diá nogogai in nogaid kon natua.

⁴Ki Datu Mesa nongkon Moab in nonombobiagon kon domba inta moantó. Nobaḻí pajak kon i datu in Israel, muḷoi in taong musti in sia mobogoi in 100.000 in ki adí in domba bo bubuḷ doman in domba nongkon domba koḷakian 100.000.

⁵Táe naonda in ki Datu Ahab minatoi, Ki Mesa in nomarontak kon Israel.

⁶Tuamai in ki Datu Yoram in ḷagidon nonaḷámai kon Samaria bo minayá noposadia in tontaranea mita.

⁷Nokidia in sia in koyow kon i Datu Yosapat nongkon Yohuda, “Datu in Moab in nomarontakdon kon inakó; moibog degá in iko moparang moyotakinku monayow kon inia?” “Mopia,” tubag i Datu Yosapat. “Akuoi bo intauku takin tontara inta tumakoi kon kabaḷo in tumakinbí kon inimu.

⁸Mongin onda in kita in mayá monubu?” “Kita in mongindaḷan inta moitaḻib kon padang gurun Edom,” tubag i Yoram.

⁹Dá nobuatdon in ki Datu Yoram noyotakin i datu in Yohuda bo i datu in Edom. Naonda in pitudon nosinggai in binayáan, kinodaitan in tubig in mosia, dá tontara monia bo bobiagon mogogakut kon pakakat monia in kinodaitandon in inumon.

¹⁰“Mobodito in kita!” guman i Datu Yoram. “Ki TUHAN ain nonomayá moposarakan kon i naton toḷu kon i datu in Moab!”

¹¹Ki Datu Yosapat in noḻibó, “Diá degá in nabi kon naa inta motaau moḻibó kon i TUHAN mongo onu in musti aidan naton?” Porwira tobatú inta nongkon tontara i Datu Yoram in notubag, “Oyúon in ki Elisa ki adí i Sapat! Dungkuḷmai sia tua in mobobantung i Elia.”

¹²“Totuu! Totuu, ki TUHAN in nosingogbí pinongin inia,” guman i Datu Yosapat. Dá minayádon in datu taya toḷu tatua kon i Elisa.

¹³“Nongonu sin mopoigumbí in totuḷung kon inakó?” guman i Elisa kon i datu in Israel. “Bayádon mako kon nabi mita in guyangamu!” “Diá!” tubag i Yoram. “Sin ki TUHANbí inta ain nonomayá kon moposarakan kon inami toḷu kon i datu Moab.”

¹⁴Ki Elisa in notubag, “Podoyon kon i TUHAN inta nobiag, inta inundoiku, pogumankudon kosilangon kon aka deeman popisí in ki Datu Yosapat inta ihoromatku, yo doíbí in akuoi mopandungmai kon i Tuang Datu.

¹⁵Tanaa in diádon mangoi in intau tobatú inta motaau mopogogitog in kecapi.” Kon dodai in intau tatua mopogogitogmai in kecapinea, ki Elisa in kinawasa in Roho i TUHAN,

¹⁶dá noguman in sia, “Naabí in pinoguman i TUHAN: ‘Pomiadon kon got mita kon bandungan[3] tanaa.

¹⁷Umpaka in moiko diá mokoontong kon uyan moḷabú andeka tompot mogirup, táe tubig in moiḻebetbí in kon ongkag tanaa. Moiko takin biag bo bobiagon inta modiamai kon pakakatmu in mokouḻíbí kon tubig inta tugat inumon monimu imibo-ibog.’ ”

¹⁸Bo ki Elisa in noguman bui, “Táe tua in tongábí pelekara mointok i TUHAN. Popountungneabí in moiko nongkon intau mita in Moab.

¹⁹Bayongan in kotá monia inta dininding bo inta mongogaga in umpagonbí monimu; bayongan pangkoi in ayop pupuḷon monimu, bayongan in bokaká in bumbunan monimu, bo bayongan in gobá monia inta mongopia in anduronbí monimu in batu modapot in mogoguyaatdon totok.”

²⁰Nopoikoḷomai, kon dodai in moposumbadon in kuruban doḷo-doḷom, noiḻigdon in tubig nongkon dotá in Edom nomuḻing kon bandungan.[4]

²¹Naonda in kinodongogan in intau in Moab kon datu taya toḷu tatua namangoi monubu, dá bayongan in intau — pinangkoi kon inta nogoguyangdon totok dapot inta noguodpa totok — inta mokopotaandon kon pakakat in parang; pinotabádon bo pinoki ḷukadan kon posigadan.

²²Nopoikoḷomai, naonda in mosia nobangon doḷo-doḷom, mata in singgai nonindar kon tubig tatua dá koontongan nopura naonda bo dugú.

²³Nomaḷú in mosia, “Dugú! Tantú tontara mita in musung inta toḷu nopaanan noropatoidon bo noḷoḻimodan! Koḻigai mayá in kita mogagow kon pinononḷoḷaigan monia!”

²⁴Táe naonda in intau mita in Moab tatua nodapot kon pinononḷoḷaigan tatua, mosia in inuntun in intau in Israel inta tantú mayá monubu kon i monia sindaḷan moḻimod kon i monia

²⁵bo nomoguyaat kon kotá monia. Bayongan in gobá inta mopia inta kotaḻiban monia, anduron monia in batu. Imbuitnea bayongan in gobá kinobumbunandon in batu. Intau mita in Israel in nomumbun domandon kon bayongan bokaká bo nomupuḷ kon bayongan pangkoi in ayop. Inta kinotaḷáan in dongkadon kotá in Kir-Hareset, ibukotá in Moab. Imbuitnea kotá tatua iḻibutan bo inandur in batu in intau mita inta momaké in popakot.[5]

²⁶Naonda in kinomangaḻeanneadon kon diádon in sia mokotongod, ki datu Moab in nodiadon kon 700 in tontaranea inta mopandoi moparang momaké in kedang, bo moḷongasi tumuot kon poḷoḷukadan in datu Edom, táe diá nokodapot.

²⁷Tuamai in ginamáneadon in ki adínea ḷoḷaki inta guya-guyang bo pinosumbanea kon tudu in dinding in kotá nobaḻí sosumba kon i dewa in Moab. Dá noondokdon[6] intau mita in Israel, dá inoinídon monia inumundok in tontara monia nongkon kotá tatua bo nobui kon butá monia.