Read Mongondow DATU MITA 2 6 Bible Online

DATU MITA 2 6 - Mongondow bible

DATU MITA 2 6

¹Kon singgai tobatú nabi mita inta sinundú i Elisa, nogamui kon inia. Noguman in mosia, “Pogogutunan naton naa in noiḻiudon in intok!

²Ogoipa in kami mayá momupuḷ kon kayu kon diug in Ongkag in Yordan, bo moposindog in pogogutunan naton kon tua.” “Mopia,” tubag i Elisa.

³Tobatú kon sigad monia tua in nomakisa sinbá ki Elisa in tumakin doman kon i monia. Noibog in ki Elisa,

⁴bo minayádon noyotakin in mosia. Naonda in noiyaput kon bingkí in Ongkag in Yordan, nomangkoidon in mosia nomupuḷ kon kayu.

⁵Bo daḻídon mata in boḻiung in intau tobatú inta kon sigad monia tua noḷabú kon tubig. “Ado, Amá!” gumannea kon i Elisa, “Tua in tongábí boḻiung iḷuanan!”

⁶“Kon onda in kinoḷabúannea?” iḻibó i Elisa. Sinundú in intau tatua in kinoḷabúannea, bo nomongkó in ki Elisa kon kayu topongkó bo pinogarab kon tampat tatua. Dá iḷumantakdon mata in boḻiung tatua kon tudu in tubig.

⁷Ki Elisa in noguman, “Gamá!” Dá ginawaddon poḷat ginamá in intau tatua in boḻiung tatua.

⁸Kon singgai tobatú intau in Siria noparang takin intau in Israel. Naonda in noyosingog takin itoi mita in tontaranea, datu in Siria in nonantúdon kon onda in pononḷoḷaigan monia.

⁹Táe ki Elisa in nokidia in habar kon i datu in Israel sin mobogoi in tompoingat sinbá diá mayá in tampat tatua, sin intau mita in Siria in biasamai in mayá mongin daḷan tatua.

¹⁰Dá ki datu in Israel nobogoidon in tompoingat kon intau mita inta nogutun kon diug intua sinbá tantú kiḷuka-ḷukadmai. Natuata in nobaḻí kotongonumaidon in ki Elisa nobogoi in tompoingat kon i datu.

¹¹Aidnea tatua totok in nokoyaat kon gina i datu in Siria, dá nogoinídon in sia kon itoi mita in tontaranea bo noḻibó, “Notantú bidon kon sigad naton naa oyúon in nongaḻedow. Ki ine? Potaaudon mangoi!”

¹²Tobatú kon sigad in itoi mita in tontara tatua in notubag, “Diábí in tobatúmai, Tuang Datu. Ki Nabi Elisabí tua in nokopopisí tatua! Siabí in nopotaau kon i datu in Israel onu inta siningog i Tuang Datu, umpakabí siningog intua kon bonu in gopot.”

¹³“Tayakdon mongo kon onda in sia,” parenta i datu, “sinbá kodomokanku in sia.” Pinotaau in intau kon inia kon ki Elisa in kon Dotan.

¹⁴Bo nopotabádon in ki datu in Siria kon tontara mita inta mobayong sinakinan in kabaḷo bo kereta in parang. Kon doḷom tobatú noyaput in mosia kon kotá tatua bo poḷat kinopung monia.

¹⁵Nopoikoḷomai kon singgai, doḷo-doḷom totok naonda in bobantung i Elisa nobangon bo iḻumuai, inontongnea in tontara in Siria nongopung kon kotá tatua notouḷut doman in kabaḷo bo kereta in parang monia. Dá, nobui minayá in sia kon i Elisa bo noguman, “Mobodito in kita, Tuang! Onu in aidan naton?”

¹⁶“Dika moondok,” tubag i Elisa. “Inta kon dotábí naton in mobayo-bayong nongkon intau mita inta kon dotá monia.”

¹⁷Bo ki Elisa in nosambayang, “TUHAN, igumon mako bukatanmu in mata in bobantungku sinbá mokoontong in sia!” Dinuduian i TUHAN in sambayang i Elisa dá naonda in bobantungnea tatua nobobui, inontongnea in buḷud tatua nopuḻing in kabaḷo bo kereta takin tuḷú noḻibu noḷukad kon i Elisa.

¹⁸Naonda intau mita in Siria tatua nonubu, nosambayang in ki Elisa, “TUHAN bilogaipa in intau mita tanaa!” Dinuduian i TUHAN in sambayang i Elisa, bo nobilogdon komintan in mosia.

¹⁹Ki Elisa in namangoi kon i monia bo noguman, “Moiko nion in noiḷangkam. Naa in deemanbí kotá inta sinayak monimu. Koḻigai dudui kon inakó bain atodonku kon intau inta sinayak monimu.” Bo inatod i Elisa in mosia kon Samaria.

²⁰Kon tungkuḷ in mosia tumuotdon kon kotá tatua, ki Elisa in nosambayang, “TUHAN, bukápa in mata monia sinbá mokoontongdon in mosia.” Dinuduian i TUHAN in sambayang i Elisa, binuká-Neadon in mata in intau mita tatua dá noherangdon in mosia in nonotaaumai kon mosia in kon kotádon in Samaria.

²¹Naonda in inontong i datu in Israel in intau mita in Siria, noḻibó in sia, “Elisa, degá ḻimodonku in intau mita tanaa?”

²²“Dika,” tubag i Elisa. “Sin umpaka tontara inta dinakop i Tuang Datu kon parang in diábí doman iḻimod i Tuang datu, apa doman tanaa. Ogoiaidon in kaanon bo inumon in mosia, bo pomayádon mako in mosia mobui kon i datu monia.”

²³Dá pinogaidan i datu in Israel kon rame moḷoben in mosia. Nopaḷut mako in mosia nongaan bo nonginum, pinotabáneadon in mosia nobui kon i datu in Siria. Pinangkoi kon tua intau mita in Siria nogogaidon in nonubu kon intau mita in Israel.

²⁴Diá noonggot kon tua ki Benhadad datu in Siria nodia kon bayongan in tontaranea sin monubu kon Israel. Kinopung monia in kotá in Samaria,

²⁵bo nokopopisí kon nomukádon in gogoy motoyang kon kotá, nodapot in uḷu in keledai tobatú boḻinea in doyowa nopuḷú in doit saḷaka bo doyowa no ons in taai in paḷoma[9] ḻima in doit saḷaka.

²⁶Kon singgai tobatú kon tungkuḷ in ki datu minaya-mayá kon tudu in dinding in kotá, bobay tobatú in nomaḷú, “Tuang Datu, tuḷungaipa!”

²⁷Ki datu in notubag, “Aka diá tuḷungan i TUHAN in iko, yo naondabí in akuoi mokotuḷung kon inimu? Diá in gandum andeka tubig in anggur kon inakó!

²⁸Onu in mokororiga kon inimu?” Bobay tatua in notubag, “Yobayatku tanaa in nonongganutdon kon inakó sinbá kaanondon nami muna in ki adíku, bo ikoḷom in ki adíneadon in kaanon nami.

²⁹Tuamai in dinungúdon nami in ki adíku bo kinaan nami. Nopoikoḷomai kon singgai naonda in inigumku sinbá dungúondon nami in ki adínea, binunineadon in adí tatua!”

³⁰Nokodongogmai kon natua, nomerak in ki datu kon ḷambungnea sin noajar in ginanea. Intau mita inta sinimindog kon diug in dinding tatua nokoontong kon ḷambung dotá in bonunea in sosapibí.

³¹Ki datu in nomaḷú, “Singgai doman naa ki Elisa in mustibí matoi. Pobiódon mako ki Allah in mohukum kobogaton totok aka diá ḻimodonku in ki Elisa!”

³²Bo ki datu in nopotabá in intau tobatú inumuna kon inia minayá in baḷoi i Elisa. Kon dodai intua ki Elisa in kon baḷoi, bo tongonumai in intau mita inta ihoromat in kon tua doman namangoi nokipodungkuḷ. Kon dodai diápa noyaput in totabá i datu tatua, ki Elisa in noguman kon intau mita tatua, “Indoiaika! Intau inta moḷoḻimod in nopotabádon mangoi in intau sin moḻimod kon inakó. Aka moyaputdon in intau tatua, yo ḻingkopaidon in ngara bo dikabí pomayá mako in sia tumuot. Kon tuminea tua in ki datu.”

³³Diápa nopaḷut in ki Elisa nosingog, ki datu[10] noidapotdon intua bo noguman, “Roriga tanaa ki TUHANbí in nopoḷabú kon inaton! Dá onupabí in mangaḻenea in akuoi moharap mako kon totuḷung-Nea?”