Read Mongondow DATU MITA 2 7 Bible Online

DATU MITA 2 7 - Mongondow bible

DATU MITA 2 7

¹Ki Elisa in notubag, “Indongogaipa in onu inta pinoguman i TUHAN! Ikoḷom, degá ná orasmai tanaa, takin tongá momaké in doit saḷaka tobatú intau in mokotaḷuibí kon toḷu nokilo in gandum inta totok in mopia andeka onom nokilo in gandum ibanea mako.”

²Itoi in tontara inta moḷoḷukad kon i datu in notubag, “Naondabí! Diábí kumaan kon akaḷ intua, umpakabí kon tanaa mako doman ki TUHAN in mopoangoi in uyan morogot nongkon ḷangit!” “Bain indoianmu tontaní in kobaḻían intua, táe iko in diábí moikaan kon kaanon tatua umpaka tongá topiḻikmai,” tubag i Elisa.

³Kon singgai tatua opat in intau inta kinotugatan in takit in kuḻit inta mokoondok sinimindog mako kon bonawang in Samaria. Nosigumanan in mosia, “Onu in mangaḻenea ḻitúan mako naton kon naa mogoḷat kon matoi?

⁴Aka tumuot in kita kon kotá, yo matoi in kita in gogoy; bo aka umuran doman kon naa in kita, yo matoibí doman. Maníka bo mayádon in kita kon pinononḷoḷaigan in intau in Siria. Paling-paling ḻimodonbí monia in kita. Táe kamungkinan doman diábí onuon monia in kita.”

⁵Naonda in motoyontomdon minayá in mosia kon pinononḷoḷaigan in intau in Siria, táe diábí in intau tobatúmai in inontong monia kon tua.

⁶Sin, ain binaḻí i TUHAN intau mita in Siria nokodongog kon singog naonda bo ponubuan in paanan in tontara inta mobarong totok inta sinumakoi kon kabaḷo bo kereta. Intau mita in Siria tua in norai kon ki datu in Israel ain nonondan kon i datu in Het bo Mesir takin tontaranea sin monubu kon i monia.

⁷Tuamain in doḷom domandon tua noḷagui in mosia noposaḷamat in awak, bo nonaḷámaidon mako natua kon ḷoḷaigan, kabaḷo, bo keledai monia kon pinononḷoḷaigan.

⁸Intau opat inta pinayaki kuḻit tatua in noiyaputdon kon bingkí in pinononḷoḷaigan tatua, bo sinumuot kon ḷoḷaigan tobatú. Nongaan bo nonginum in mosia kon tua bo nogamá kon buḷawan, saḷaka takin ḷambung mita bo binayá binuni. Nopaḷut mako kon tua nobui mangoi in mosia bo sinumuot kon ḷoḷaigan ibanea, bo nogaid doman kon natua.

⁹Nosigumanan in mosia, “Dodia naton naa in diábí mopia. Habar tanaa in habarbí mopia bo mustibí potaau naton! Aka oḷaton naton dapot in ikoḷom, yo notantúbí kon hukumondon in kita. Mopia-piabí kon bayáandon naton potaau kon komaḻig in onu inta nobaḻí tanaa.”

¹⁰Tuamai in nobuidon in mosia kon Samaria bo nomaḷú kon moḷoḷukad kon bonawang in kotá, “Minayádon in kami kon pinononḷoḷaigan in intau in Siria, bo noniata magí diá bidon in intau in kon tua. Kabaḷo bo keledai monia kinobayáanmai nami in noitogotpabí mako kon pototogotannea, bo ḷoḷaigan mita in tongádon sinaḷáan mako natua.”

¹¹Moḷoḷukad mita tatua in nopobaḷú doman in habar tatua, dá pinotaaudon in intau kon komaḻig.

¹²Kon tungkuḷ intua nodoḷompa, táe ki datu in iḻumuai domandon kon gopotnea bo noguman kon pogawainea mita, “Indongogaika! Kinotaauankubí in tomayá in intau mita in Siria tua! Kinotaauanbí monia kon kita naa in ginogoidon, tuamai in sinaḷáandon monia in ḷoḷaigan bo minayá nogadop kon dogami sin mobayat kon inaton ḷumuai motayak kon kaanon. Onda intua domokon monia in kita bo ḻitúandon monia in kotá.”

¹³Pogawai tobatú i datu in noguman, “Tuang Datu, kita inta kon bonupa in kotá tanaa in notongkaibí in kaadaan ná i monia inta ain minatoi. Tuamai in mopia-piabí kon mopotabá in kita in tongonumai intau tumakoi kon kabaḷo ḻima inta kon sigad in kabaḷo mita inta nobiagpa, bo mayá intua sin moindoi mongo onu inta ain nobaḻí.”

¹⁴Dá nomiḻídon in mosia kon tongonumai in intau, bo pinoki diaandon i datu in mosia in kereta in parang doyowa bo minayá nonaridi mongo onu in nobaḻí kon tontara mita in Siria.

¹⁵Minayá in mosia nodapot kon Ongkag in Yordan. Kinoouput in daḷan nokoontong in mosia kon pakeang bo pakakat mita positabud. Bayongan intua pinogambatdon mako natua in intau mita in Siria kon dodai in mosia noḷagui. Totabá mita tatua in nobui bo nopotaau intua kon i datu.

¹⁶Dá intau mita in Samaria noribatuk iḻumuai in kotá bo minayá nogagow kon pinononḷoḷaigan in intau in Siria. Pinodudui ná inta pinoguman i TUHAN, nobaḻídon kon toḷu nokilo in gandum inta totok in mopia andeka onom nokilo in gandum ibanea, boḻinea in doit saḷaka tobatú.

¹⁷Noitongkaná kon tua intau inta moḷoḷukad kon i datu noḷukadmai kon bonawang in kotá. Minatoi in sia kon tua sin kinoritakan in intau mita. Tua in nobaḻí ná inta ain siningog i Elisa kon i datu kon dodai in ki datu namangoi kon inia.

¹⁸Ki Elisa in nogumandon kon degá orasmai ná tatua mopoikoḷomai kon singgai, toḷu nokilo in gandum inta totok in mopia andeka onom nokilo in gandum ibanea in potaḷui kon Samaria tongá momaké in doit saḷaka tobatú.

¹⁹Bo kon dodai intua moḷoḷukad i datu in nogumandon, “Naondabí! Diábí kumaan kon akaḷ intua, umpakabí kon tanaa mako doman ki TUHAN in mopoangoi in uyan morogot nongkon ḷangit!” Bo sinubagan i Elisa, “Bain koontonganmu intua mobaḻí, táe diábí in iko moikaan kon tua topiḻikmai.”

²⁰Natuata in nobaḻí kon intau tatua — minatoi in sia kinoritakan in intau mita kon bonawang.