Read Mongondow DATU MITA 2 8 Bible Online

DATU MITA 2 8 - Mongondow bible

DATU MITA 2 8

¹Kon wakutu tobatú ki TUHAN nopoangoi in bodito malarat in kaanon kon butá in Israel inta nobaḻí pitu notaong in koonggotnea. Kon tungkuḷ in diápa nobaḻí intua munadon pinotaau i Elisa intua kon bobay nongkon Sunem inta ki adínea in biniagneadon bui. Pinoki pomampingan domandon i Elisa in sia takin motoḷuadínea kon ḻipú ibanea.

²Inaidan in bobay tatua onu in pinoguman i Elisa, bo nobuat in sia minayá in butá in Pilistin sin mogutun kon tua.

³Naonda in nouputdon in pitu notaong tatua nobuidon mangoi in sia kon Israel. Bo minayá in sia takin i adínea kon i datu bo nopoigum sinbá baḷoi bo gobánea in pobuiondon kon inia.

⁴Kon dodai intua ki Gehazi bobantung i Elisa pinoki oumanandon i datu kon bayongan inta mokoherang inta inaidan i Elisa.

⁵Bo noitongkaná kon dodai in bobay nongkon Sunem tatua namangoi kon i datu sin mopotaau in oigumnea, ki Gehazi in koyogot mongonguman kon naonda in pinomomiag bui i Elisa kon adí inta ain minatoi tua. Dá ki Gehazi in noguman, “Tuang Datu inta momulia, naa in bobay tatua, bo naa in ki adínea inta biniag bui i Elisa!”

⁶Bo noḻibó in ki datu bo inouman in bobay tatua in soaḷ adí tatua. Nopaḷut mako kon tua ki datu in nogoiní kon pogawainea tobatú bo nomarenta sinbá bayongan in kapunyaan in bobay tatua daitondon pobuion kon inia, noitakin doman in boḻi in bayongan bungai in boyó inta nongkon gobánea kon bonu in pitu notaong kon tungkuḷ in sia diá in kon naa.

⁷Kon wakutu tobatú minayá in ki Elisa in Damsyik. Noitongkanábí kon ki Datu Benhadad notakit. Naonda in kinodongogan i datu kon ki Elisa in kon Damsyik,

⁸noguman in sia kon i Hazael, pogawainea tobatú, “Podiaaidon kon tombuinag in ki nabi tatua, bo poigumdon kon inia sinbá ḻibóonneapa kon i TUHAN mongo mopiapa andeka diádon in akuoi naa.”

⁹Ki Hazael in nogamá kon unta 40 bo dinatogannea in noyagi-yagimai in onu inta kon kotá in Damsyik, bodongka minayá kon i Elisa. Naonda in noiyaputmai kon tampat i Elisa, ki Hazael in noguman, “Bobantungmu ki datu Benhadad, in nopotabá mangoi kon inakó sin moḻibó mongo mopiapa andeka diá in sia.”

¹⁰Ki Elisa in notubag, “Ki TUHAN in noguman kon inakó kon matoidon in sia. Táe pogumandon kon inia kon sia in mopiapabí.”

¹¹Onda intua ki Elisa noindoi kon i Hazael bo sinontongannea totok dá noḻia-ḻiawdon in gina i Hazael. Bo daḻídon in ki Elisa noguang.

¹²“Nongonu sin ki Tuang in mongombaḷbí?” iḻibó i Hazael. “Kinotaauanku in moraat inta pomiaanmu kon intau in Israel,” guman i Elisa. “Turubonmu in kotá mita inta oyúon in poḷoḷukadan, moḻimod kon tayow mobiag mita inta totok in mongopia, bo monagang kon adí mita mointok bo momotak kon sian in bobay mita inta nonogusian.”

¹³“Uḻe, akuoi naa in intau inta diá in mangaḻenea,” tubag i Hazael, “diábí in kawasa inta námai tua in kotoyang!” “Pinoontongdon i TUHAN kon inakó kon iko in mobaḻí datu kon Siria,” tubag i Elisa.

¹⁴Naonda in ki Hazael nobui kon komaḻig, noḻibódon in ki Benhadad, “Onu in pinoguman i Elisa?” “Sia in noguman kon ki Tuang Datu in mopiapabí,” tubag i Hazael.

¹⁵Táe nopoikoḷomai kon singgai ki Hazael in nogamá kon daing tobatú, bo binobatannea bodongka pinomompon kon ngiung i datu dá minatoidon iḷumungkoyó in ki datu. Bo ki Hazael in nobaḻí datu in Siria nomaḷui kon i Benhadad.

¹⁶Ki Yehoram ki adí i Yosapat in nobaḻí datu kon Yohuda kon tungkuḷ in ki Datu Yoram ki adí i Ahab ḻimadon notaong in nomarenta kon Israel.[11]

¹⁷Kon dodai intua ki Yehoram umurdon toḷu nopuḷú bo doyowa notaong, bo sia in nomarenta kon Israel waḷu notaong in koonggotnea.

¹⁸Sia in notonibuḷoi takin i adí i Ahab, bo ná inta pinomia in motoḷuadí i Ahab, sia in binaradosa doman kon i TUHAN ná datu mita in Israel.

¹⁹Táe ki TUHAN in doíbí moyopú kon Yohuda sin nongibotdon in Sia kon i Daud mogogundoi-Nea, kon buínea in umuranbí mobaḻí datu.

²⁰Kon bonu in pinomarentaan i Yehoram, Edom in nomarontak kon Yohuda bo nomia kon dodatuan tontaní.

²¹Tuamai, iḷumuaidon in ki Yehoram takin bayongan in kereta in parangnea nopobayá ná Zair. Kon tua kinopung in sia in tontara in Edom, táe naonda in nodoḷom monag sia takin tongguḷu totokan in tontara inta sinumakoi kon kereta nondangat kon kopungan in musung, bo tontara mita monia in noḷagui poḷat nobui kon baḷoinea-baḷoinea.

²²Nongkon dodaidon intua Edom diádon mokidongogmai kon Yohuda. Kon tungkuḷ doman intua kotá in Libna in nomarontak domandon.

²³Ouman ibanea soaḷ ki Yehoram in pinais kon bonu in buk Ouman in Datu mita in Yohuda.

²⁴Minatoi in sia bo iḷobong kon poḷoḷobongan kon datu mita kon Kotá i Daud. Ki Ahazia ki adínea in nobaḻí datu nomaḷui kon inia.

²⁵Ki Ahazia ki adí i Yehoram in nobaḻí datu in Yohuda kon tungkuḷ in ki Datu Yoram adí i Ahab ain nomarenta kon Israel mopuḷú bo doyowa notaong.

²⁶Kon dodai intua ki Ahazia umur doyowa nopuḷú bodoyowá notaong, bo nomarenta in sia kon Yerusalem totaong in koonggotnea. Ki inánea in ki Atalya, ki adí i Datu Ahab, ki Ompu i Omri inta datu in Israel.

²⁷Popisí in pinotonibuḷoiannea tatua dá oyúondon in togot in motoḷuadí i Ahazia bo in motoḷuadí i Datu Ahab. Ki Ahazia in binaradosa kon i TUHAN notongkai ná inta inaidan in motoḷuadí i Ahab.

²⁸Ki Datu Ahazia in sinumakin doman noparang noyotakin i Yoram datu in Israel nonayow kon i Hazael datu in Siria. Noparang in mosia kon Ramot, butá in Gilead. Kinekeban in ki Yoram kon pinoparangan tatua,

²⁹bo nobuidon in sia kon kotá in Yizreel sin undaman, bo minayá in ki Ahazia noḷongow kon inia kon tua.