Read Mongondow TAWARIKH 1 10 Bible Online

TAWARIKH 1 10 - Mongondow bible

TAWARIKH 1 10

¹Intau in Pilistin in noparang takin intau in Israel. Mosia in noparang kon buḷud in Gilboa. Nobarong in intau in Israel in minatoi kon tua bo ki agatnea noitakin doman in ki Datu Saul bo ki adínea mita ḷoḷaki in noḷagui.

²Táe mosia in inaḷowan in intau in Pilistin bo toḷu kon sigad in adí mita ḷoḷaki i Saul in iḻimod, inta ki Yonatan, ki Abinadab bo ki Malkisua.

³Totok in motoyang in pinoparangan inta kon diug i Saul, bo sia tontaní in kinotugatan doman in piot mita in musung dá kinekebandon.

⁴Dá ki Saul in noguman kon tayow mobiag inta nodia kon pakakat in parangnea, “Rabutdon in kedangmu bo tumbukdon in akuoi sinbá diá in akuoi yagi-yagionmai in intau i Pilistin inta diá nonotaau kon i TUHAN tua.” Táe tayow mobiag tatua doíbí monumbuk kon i Saul sin sia in moondokbí totok. Tuamai in ki Saul nogamá kon kedangnea tontaní bo inumumpag kon kedangnea tatua.

⁵Naonda in inontong in tayow mobiag tatua kon ki Saul in minatoidon, dá sia in inumumpag domandon kon kedangnea, bo minatoidon doman.

⁶Dá minatoidon in ki Saul takin ki adínea ḷoḷaki taya toḷu, dá nopaḷut domandon in pinomarentaannea.

⁷Kon dodai in bayongan intau in Israel inta nogutun kon ḷopá in Yizreel in nokodongog kon tontara in Israel ain noḷagui, bo ki Saul bo ki adínea mita ḷoḷaki in minatoidon, dá noḷagui in mosia nonaḷámai kon kotá mita monia. Bo iḻitúan in intau mita in Pilistin in kotá mita tatua.

⁸Nopoikoḷomai kon singgai kon dodai in intau in Pilistin namangoi sin mogagow kon mayat mita, nouḻídon monia in ki Saul bo ki adínea ḷoḷaki taya toḷu minatoidon kon buḷud in Gilboa.

⁹Iḷongkut monia in ḷambung parang i Saul, bo iningguḷuan, bodongka dinia monia minayá. Onda intua mosia in nopotabá in totabá minayá in bayongan butá in Pilistin sin mopotaau in habar mopia tatua kon bangusa bo dewa mita monia.

¹⁰Ḷambung i Saul tatua in sinagú kon bonu in kuil monia tobatú, bo uḷunea in binambé kon bonu in baḷoi Dagon, dewa monia.

¹¹Naonda in intau inta kon Yabesh inta kon Gilead nokodongog kon onu inta ain inaidan in intau in Pilistin kon i Saul,

¹²intau mita inta totok in mongobarani kon sigad monia in minayá nogamá kon mayat i Saul bo i adínea mita ḷoḷaki bo dinia monia kon Yabesh. Iḷobong monia in tuḷannea mita kon siungon in pangkoi in kayu moḷoben onda intua mosia nopuasa pitu nosinggai in koonggotnea.

¹³Ki Saul in minatoi popisí in diá in sia mosatia kon i TUHAN, bo diá doman dinumudui kon parenta-Nea mita. Diábí in sia nopoigum in topotundú mita nongkon i TUHAN, táe nopoigumbí kon dimukud mita in intau mita inta ain minatoi. Tuamai in ki TUHAN nohukum kon inia bo noposarakan in tampat pomomarentaannea kon i Daud adí i Isai.