Read Mongondow TAWARIKH 1 13 Bible Online

TAWARIKH 1 13 - Mongondow bible

TAWARIKH 1 13

¹Ki Datu Daud in noyosingog takin bayongan porwiranea inta nobaḻí itoi kon pinonobatúan in 1.000 in intau bo pinonobatúan in 100 in intau.

²Bo noguman in sia kon bayongan in intau tatua, “Aka ki utat mita moibog, bo ogoi i TUHAN, Allah naton, yo mopi-piabí in kita mopotabá in totabá mayá kon imang mita bo intau mita in Lewi kon ḻipú mita monia, bo bayongan bangusa naton ibanea sin mopotabá kon i monia mamangoi moyosipun takin i naton kon naa.

³Onda intua mayá in kita mogamá kon Poti Dodandian i Allah inta pinomayádon mako natua kon bonu in pinomarentaan i Datu Saul.”

⁴Bayongan in intau Israel inta noyosipun tatua nosanang in gina in nokodongog kon singog tatua bo noibog in mosia.

⁵Dá ki Daud in nosipun kon rayat in Israel kon bayongan in butá, nongkon pinosigadan in Mesir kon toḷatan nodapot kon daḷan in Hamat kon utuan, sin mogamá kon Poti Dodandian tatua nongkon Kiryat-Yearim bo diaan pobayá in Yerusalem.

⁶Bo ki Daud in minayá noyotakin monia kon kotá in Baala, inta kon Kiryat-Yearim, kon butá in suku Yohuda sin mogamá kon Poti Dodandian i Allah. Poti tatua sinangoian “TUHAN Inta iḻimitú kon tudu in kerub”.

⁷Naonda in noiyaput kon Baala, mosia in nogamá kon Poti Dodandian tatua nongkon baḷoi Abinadab, bo pinodatog kon roda tobatú inta nobagupa. Ki Uza bo ki Ahyo in dumuduianmai kon roda tatua,

⁸bo ki Daud takin bangusa in Israel notayok bo nodondong takin pia totok in gina, sin mohoromat kon i Allah bo sinakinan in kecapi, rebana, simbal[23] bo torompet.

⁹Naonda in mosia nodapot kon tampat poḷoḻidokan kon gandum kapunyaan i Kidon, sapi mita inta nogugut kon roda tatua noigaboḷ, dá ki Uza nopotonggó in ḻimanea bo nokadai kon Poti Dodandian tatua sinbá diá moḷabú.

¹⁰Kon dodai doman intua ki TUHAN sinumorú kon i Uza sin aidnea tatua in naonda bo mopoompámai kon i TUHAN. Bo iḻimod-Nea kon tua in ki Uza. Dá nongkon dodaidon intua tampat tatua sinangoian “Peres-Uza”.[24] Ki Daud in sinumorú sin ki TUHAN noyopú kon i Uza.

¹²Táe noondokbí doman in ki Daud kon i Allah bo noguman, “Tanaa in naondadon in pododiaku kon Poti Dodandian tatua?”

¹³Tuamai in diádon notuoi dinia i Daud in poti tatua pinobayá in Yerusalem, tongádon sinagúnea kon bonu in baḷoi i Obed-Edom, intau in Gat.

¹⁴Poti tatua in sinagú kon tua toḷu nobuḷan in koonggotnea bo ki TUHAN in nomarakat kon motoḷuadí i Obed-Edom takin bayongan in intau kon bonunea.