Read Mongondow TAWARIKH 1 15 Bible Online

TAWARIKH 1 15 - Mongondow bible

TAWARIKH 1 15

¹Ki Daud noposindog in baḷoi mita kon inia kon Kotá i Daud, bo noposadia in tampat potagúan kon Poti Dodandian i Allah bo noposindog in ḷoḷaigan pogukatan kon Poti tatua.

²Ki Daud noguman, “Tongábí intau in Lewi in motaau mobuat kon Poti Dodandian i TUHAN, sin mosiabí tua inta piniḻí i TUHAN momotaan kon Poti tatua bo mogundoi kon i-Nia[27] moidapot in mononoi.”

³Dá ki Daud in nogoiní kon bayongan in intau Israel namangoi kon Yerusalem sin momamping kon Poti Dodandian i TUHAN pobayá in tampat inta ain sinadianea.

⁴Bo ki Daud in nopotabá kon buí i Harun bo intau in Lewi noyosipun.

⁵Dá nongkon inanakan i Kehat, suku Lewi, namangoidon in ki Uriel inta nonongganut kon 120 in intau inta inanakannea.

⁶Nongkon inanakan i Merari namangoi in ki Asaya inta nonongganut kon 220 in intau.

⁷Nongkon inanakan i Gerson namangoi in ki Yoël inta nonongganut kon 130 in intau.

⁸Nongkon inanakan i Elsapan namangoi in ki Semaya inta nonongganut kon 200 in intau.

⁹Nongkon inanakan i Hebron namangoi in ki Eliel inta nonongganut kon 80 in intau.

¹⁰Bo nongkon inanakan i Uziel namangoi in ki Aminadab inta nonongganut kon 112 in intau.

¹¹Bo ki Daud in nogoiní kon i Imang Zadok bo ki Imang Abyatar takin intau in Lewi taya onom tatua, inta ki Uriel, ki Asaya, ki Yoël, ki Semaya, ki Eliel bo ki Aminadab.

¹²Guman i Daud kon i monia, “Moiko in itoi in inanakan kon bonu in suku Lewi. Tuamai, musti in moiko bo intau mita in Lewi ibanea mopotusi in awak sinbá motaau momamping kon Poti Dodandian i TUHAN, Allah in Israel, kon tampat inta ain sinadiaku.

¹³Kon dodai in Poti tatua kon imitánea totok pinamping, moiko in diá in kon tua sin modia kon tua. Tuamai ki TUHAN, Allah naton, nohukum kon inaton sin kita in nosumba kon-Nia táe diá noidudui kon ibog-Nea.”

¹⁴Dá imang mita bo intau in Lewi nopotusidon in awak sinbá motaaudon momamping kon Poti Dodandian i TUHAN, Allah in Israel.

¹⁵Bo kon dodai in Poti tatua pinamping, mosia in nomotaan takin kayu pobobuḻigan podudui in atorang inta inogoi i TUHAN kon i Musa.

¹⁶Ki Daud in nopotabá doman kon itoi mita in intau mita in Lewi tatua sinbá mopotabá kon tongonumai in intau nongkon suku monia sin mopodondong bo mopogogitog in dondong mita pia in gina takin kecapi bo simbal.

¹⁷Nongkon sigad in motoḷuadí mita inta mododondong mosia in nomiḻí kon intau mita noiduduimai naa sin mopogogitog in simbal bitú: Heman adí i Yoël takin ginaḷumnea inta ki Asap adí i Berekhya, bo ki Etan adí i Kusaya nongkon inanakan i Merari. Tumakin kon i monia takin mopogogitog in kecapi inta koḷantudon in nadanea piniḻídon in intau mita in Lewi inta noiduduimai tanaa: ki Zakharia, ki Yaaziel, ki Semiramot, ki Yehiel, ki Uni, ki Eliab, ki Maaseya, bo ki Benaya. Mopogogitog in kecapi inta noompá in nadanea piniḻídon in intau mita in Lewi noiduduimai: ki Matica, ki Elipele, ki Mikneya, ki Azazya, bo doyowa in moḷoḷukad kon Baḷoi TUHAN, inta ki Obed-Edom bo ki Yeiel.

²²Ki Kenanya in piniḻí sin mobaḻí tongguḷu in intau mita inta mopogogitog in musik nongkon suku Lewi, sin sia in totok in motaau in musik.

²³Ki Berekhya bo ki Elkana takin i Obed-Edom bo ki Yehia in piniḻí nobaḻí moḷoḷukad kon Poti Dodandian i TUHAN. Imang mita moiduduimai naa: ki Sebanya, ki Yosapat, ki Netaneel, ki Amasai, ki Zakharia, ki Benaya bo ki Eleazer in piniḻí sin moposingog in torompet kon tayowon in Poti tatua.

²⁵Dá minayádon in ki Datu Daud takin itoi mita in Israel bo porwira mita kon baḷoi Obed-Edom sin mogamá kon Poti Dodandian tatua takin pinoramean moḷoben.

²⁶Pitu in sapi koḷakian bo pitu doman in domba in pinosumba kon i Allah sin Sia in notuḷungdon kon intau in Lewi inta nobuat kon Poti Dodandian tatua.

²⁷Kon dodai intua ki Daud nomaké in jubah nongkon kaeng linen moaḷus, natua doman in intau mita inta mopogogitog in musik bo ki Kenanya in nonongganut kon i monia takin intau mita in Lewi inta nobuat kon Poti Dodandian tatua. Ki Daud in nogiḷambung doman in ḷambung epod.[28]

²⁸Bayongan umat in Israel minayá dinumudui kon Poti Dodandian noidapot in Yerusalem takin giow pia in gina, singog in torompet, napiri, simbal bo kecapi.

²⁹Kon dodai in Poti tatua diaan tumuot kon kotá, ki Mikhal ki adí bobay i Saul iḷumongow nongkon jandela bo nokoontong kon i Datu Daud notayok takin pia in gina. Noyaat in gina i Mikhal in nokoontong kon i Daud.