Read Mongondow TAWARIKH 1 16 Bible Online

TAWARIKH 1 16 - Mongondow bible

TAWARIKH 1 16

¹Poti Dodandian tatua inukat kon bonu in ḷoḷaigan inta ain sinadia i Daud kon potagúan kon poti tatua. Bo noposumba in mosia kon i Allah in kuruban payongon bo kuruban dodamean.

²Naonda in ki Daud nopaḷut noposumba in kuruban mita tatua, nomarakat in sia kon rayat pinodoyon kon tangoi i TUHAN,

³bo nosilai kon kaanon kon i monia komintan. Kon batúan in intau inta kon tua pinomayá ḷoḷaki andeka bobay nokouḻí kon ponoyá tobonsig inta ain inangag, roti bo kukis kismis.

⁴Ki Daud in noduí kon tongonumai in intau in Lewi sin mopobayá in upacara ibada kon i TUHAN, Allah in Israel, kon tayowon i Poti Dodandian tatua, takin dondong bo dodayow.

⁵Ki Asap in piniḻí nobaḻí itoi inta tongguḷu totok bo ki Zakharia in oḻitnea. Ki Yeiel, ki Semiramot, ki Yehiel, ki Matica, ki Eliab, ki Benaya, ki Obed Edom bo ki Yeiel in pinoki gogitogan in kecapi. Ki Asap in pinoki bongkugan in Simbal,

⁶bo imang doyowa, inta ki Benaya bo ki Yahaziel in sinantúdon tongá mogirup kon torompet kon tayowon in Poti Dodandian tatua.

⁷Tuata inta dungkuḷ totok ki Daud nopotabá kon i Asap bo yobayatnea mita sin mopodondong in dodayow kon i TUHAN.

⁸Posukurdon kon i TUHAN, potaaudon in kamuliaan-Nea, oumandon in oaidan-Nea kon sigad in bangusa mita.

⁹Podondongdon in dodayow kon i TUHAN, oumandon in bayongan inta inaidan-Nea inta mokoherang.

¹⁰Siabí in ki TUHAN inta tuḷong; koḷungangadon, sin kita naa Siabí in kitogi; bayongan inta mosumba kon i-Nia in koḷungangadon.

¹¹Poigumdon kon ropot nongkon i-Nia, umurandon sumba in Sia.

¹²Ei buí i Yakub, mogogundoi i Allah! Ei buí i Israel, umat inta piniḻí-Nea! Toropdon in bayongan inta mokoherang inta inaidan-Nea, dika mokoḻiong kon kaputusan-Nea mita.

¹⁴Ki TUHAN in Allah naton, kaputusan-Nea in popoaid kon sinangkub in dunia.

¹⁵Sia in umuranbí monorop kon dodandian-Nea, dandi-Nea tua in mononoibí.

¹⁶Dodandian tatua in pinomia-nea takin i Abraham, bo noiduduimai takin i Ishak,

¹⁷bo inirigonan takin i Yakub nobaḻí dodandian inta mononoi kon umat in Israel.

¹⁸Guman-Nea, “Butá in Kanaan in ogoi-Kubí kon inimu mobaḻí budel kapunyaanmu.”

¹⁹Dungkuḷmai umat i TUHAN nobiag nobaḻí ango-angoi kon tua mosia in tongábí topiḻik.

²⁰Mosia in nodondaḷoi nongkon bangusa tobatú minayá in bangusa ibanea, nomamping nongkon butá tobatú mayá in butá ibanea.

²¹Táe diábí pinomayá i TUHAN in ki ineka in mopororiga kon i monia; popisí in mosia, datu mita inogoian-Nea in tompoingat,

²²“Dika monuyayow kon intau mita inta piniḻí-Ku, dika mogaid kon inta moraat kon nabi-Ku mita.”

²³Podondongdon kon i TUHAN, ei bayongan butá, muḷoi in singgai potaaudon in habar mokosanang kon gina sin Sia in noposaḷamatdon kon i naton.

²⁴Oumandon in kamuliaan-Nea kon bangusa mita, bo bayongan inta inaidan-Nea inta motoyang kon umat intau naa.

²⁵Sin moḷobenbí in ki TUHAN bo dinayow totok; Sia in mustibí koondok moiḻiu kon bayongan in dewa.

²⁶Dewa mita in bangusa ibanea in tongábí patong berhala táe ki TUHAN in inta nomaḻí kon toḷungayá naa.

²⁷Sia in iḻibu in koagungan bo kamuliaan, baḷoi-Nea in nopuḻing in kawasa bo ḷunganga in gina.

²⁸Dayowdon in ki TUHAN, ei umat intau! Dayowdon in koagungan bo ropot-Nea.

²⁹Dayowdon in tangoi-Nea inta momulia, bo diádon in kuruban kon bonu in baḷoi-Nea. Sumbadon in ki TUHAN takin mogiḷambung in ḷambung ibada!

³⁰Kourotdon kon tayowon-Nea, ei bayongan in intau kon dunia! Butá in noroton diá kodandúan.

³¹Ei ḷangit bo butá, pokosanangdon! Potaaudon kon bangusa mita kon ki TUHAN tua in datu!

³²Pobokoḷdon ei dagat bo bayongan in tombonunea! Pokoḷungangadon ei bayongan in rawang bo bayongan in pinomuḷanea!

³³Pangkoi mita in kayu kon kayuon in morogiowdon mita sin ki TUHAN in namangoidon sin momarenta kon dunia.

³⁴Posukurdon kon i TUHAN sin mopia in Sia; tabi-Nea in mononoi.

³⁵Singogdon, “Oo Allah, Mopoposaḷamat nami, posaḷamatdon in kami nongkon kawasa in bangusa mita bo sipundon bui in kami sinbá motaaudon in kami mopoyaput in sukur bo modayow kon tangoi-Mu inta motusi!”

³⁶Dayowdon in ki TUHAN Allah Israel, tanaa mako modapot in mononoi! Onda intua bayongan in umat in Israel moguman, “Amin”. bo nodayow in mosia kon i TUHAN.

³⁷Onda intua ki Datu Daud nonantúdon kon i Asap bo intau mita in Lewi ibanea kon umuran monompia kon soaḷ mita inta noyotogot in ibada kon tampat inta pinotagúan kon Poti Dodandian i TUHAN. Muḷoi in singgai mosia in mustibí mopobayá in oaidan monia kon tua,

³⁸bo binantungan i Obed-Edom inta ki adí i Yedutum, bo in intau 68 ibanea inta toinanakannea. Ki Obed-Edom bo ki Hosa in moḷoḷukad kon bonawang mita.

³⁹Táe ki Zadok bo imang mita ibanea in pinotabá umuran monompia kon ibada kon tampat pooibadaan kon Gibeon.

⁴⁰Muḷoi in doḷo-doḷom bo moḷoḷabung mustibí in mosia moposumba in kuruban payongon kon tudu in mezbah podudui in hukum mita inta inogoi i TUHAN kon intau in Israel.

⁴¹Ki Imang Zadok bo imang mita tatua in binantungan i Heman bo i Yedutun bo intau mita ibanea inta ain sinantú piniḻí sin mopodondong in dodayow kon i TUHAN sin tabi-Nea inta mononoi.

⁴²Ki Heman bo ki Yedutum in mogirup doman kon torompet, simbal bo pakakat in musik ibanea inta pinogogitog sin monakin kon dondong mita dodayow. Intau mita in inanakan i Yedutun in pinoki ḷukadan in bonawang mita.

⁴³Onda intua nobuidon in bayongan intau kon baḷoinea-baḷoinea. Natua domandon ki Daud nobui sin moindoi kon motoḷuadínea.