Read Mongondow TAWARIKH 1 19 Bible Online

TAWARIKH 1 19 - Mongondow bible

TAWARIKH 1 19

¹Diá noonggot kon tua ki Nahas datu in Amon minatoi, bo ki Hanun ki adínea ḷoḷaki in nobaḻí datu.

²Bo nogumandon in ki Datu Daud, “Ki Nahas tua in yobayatku inta mosatia, dá mustibí doman natua in akuoi kon i Hanun, ki adínea.” Tuamai in ki Daud nopotabá in totabá minayá in butá in Amon sin noḻipoi kon i Hanun popisí in kinopatoian i amánea. Naonda in mosia noyaput kon Amon,

³itoi mita in butá tatua noguman kon i datu Hanun, “Dikabí in ki Tuang Datu morai kon ki Daud tua in nopotabá mangoi in totabánea tatua sin moibog in sia mohoromat kon i amá i Tuang Datu! Sia in nopotabá kon intau mita tatua namangoi nobaḻí toḻindap sin monaridi kon butá naton, sinbá koagowannea!”

⁴Ki Datu Hanun in nodomok kon totabá mita i Daud tatua, bo kinarugan in tampeng monia, bo nomongkó kon ḷambung monia kinodapot in kayang, bo pinotabá in mosia minayá.

⁵Táe mooyá in mosia in mobui, dá minayá in mosia kon Yerikho. Naonda in pinotaau kon i Daud intua, nokidia in sia in koyow sinbá totabá mita tatua mogutunpa kon Yerikho moidapot in mobiagdon bui in tampeng monia.

⁶Bo ki Datu Hanun bo intau in Amon nonotaaudon kon aid monia tua in nokopopisídon kon i Daud nosaturu kon i monia. Tuamai in nokidiadon in mosia kon 34.000 nokilo in saḷaka kon butá in Mesopotamia Ḻimonik, bo kon Maakha bo Zoba kon Siria sin monondan kon 32.000 in kereta in parang bo tontara inta tumakoi kon kabaḷo. Dá namangoidon in tontara i Datu Maakha takin bayongan in kereta in parang inta sinondanan tatua bo nononḷoḷaigan kon diug in Medeba. Intau in Amon in namangoi domandon nongkon bayongan in kotá monia sin moparang.

⁸Naonda in kinodongogan i Daud intua nopotabá in sia kon i Yoab takin bayongan in tontaranea minayá noparang nonayow kon musung.

⁹Intau in Amon iḻumuai bo nonompia kon pipidan monia kon tayowon in bonawang in Raba, ibukotá monia, bo datu mita inta ain namangoi sin motuḷung kon i monia, nonompiadon kon pipidan monia kon rawang.

¹⁰Inontong i Yoab kon kinogupitan in sia in tontara mita in musung inta nongkon tayowonmai bo kon tumimai. Dá tuamai nomiḻí in sia kon tontara in Israel inta totok in mopia bo sinampatnea in mosia pinoyogintayow in tontara in Siria.

¹¹Ḻiunea kon tontara in Israel in inogoinea kon i Abisai inta ki ai-ainea, bo nonompia kon pipidan monia pinoyogintayow in tontara in Amon.

¹²Ki Yoab in noguman kon i ai-ainea tatua, “Aka diádon in akuoi mokotongod in monayow kon tontara in Siria, yo koḷamemetdon angoi bo tuḷungai in akuoi. Natua doman, aka iko bo diádon mokotongod in monayow kon tontara in Amon, dá bayáanku bantungan in iko.

¹³Pokorigon in gina! Koḻigai in kita moḷongasi takin mokopobarani sin kasaḷamatan in bangusa naton bo kasaḷamatan in kotá mita i Allah. Igumon mako ki TUHAN in mogaid kon onu inta kinoibog-Nea.”

¹⁴Ki Yoab bo tontaranea in minayá nonubu, dá noḷagui in tontara in Siria.

¹⁵Naonda inontong in intau in Amon kon tontara in Siria noḷaguidon, noḷagui domandon in mosia kon i Abisai bo inumundok minayá in kotá. Nopaḷut mako nomarang kon intau in Amon, Ki Yoab nobui kon Yerusalem.

¹⁶Intau in Siria nonotaaudon kon mosia in sinaḷowdon in intau in Israel. Dá nogoiní in mosia kon tontara monia inta nongkon butá kon dotá in pomukaan kon Ongkag in Eprat bo nopotabá kon tontaranea tatua minayá noparang kon bonu in tongganut i Sobakh tongguḷu totok in tontara i Hadadezer datu in Zoba.

¹⁷Nokodongogmai kon tua, nosipun in ki Daud kon bayongan in tontara in Israel, bo iḷumoḷan kon Ongkag in Yordan bo nonompia kon pipidannea pinoyogintayow in intau in Siria. Dá noparangdon in mosia,

¹⁸bo tontara in Siria sinaḷow in tontara in Israel. Ki Daud bo tontaranea in nokoḻimod kon 7.000 in intau inta nodia kon kereta in parang bo 40.000 in tontara inta minaya-mayá in sioḷ. Ki Sobakh tongguḷu totok in tontara in Siria tatua in iḻimod doman.

¹⁹Kon dodai in datu mita inta kinawasa i Datu Hadadezer, nokoontong kon mosia in sinaḷowdon in tontara in Israel, mosia in nopoigum sinbá modamedon takin i Daud, bo motoguondok kon inia. Nopaḷut mako kon tua intau in Siria doídon mobantung bui kon intau in Amon.