Read Mongondow TAWARIKH 1 21 Bible Online

TAWARIKH 1 21 - Mongondow bible

TAWARIKH 1 21

¹Moibog in Ibilis mopobodito kon intau in Israel; tuamai in dinondouḷugannea in ki Daud sinbá mogiapdon kon intau.

²Dá ki Daud in noguman kon i Yoab bo porwira mita in tontaranea, “Iyapdon in bayongan umat in Israel moidapot kon inta nongoako mako, sinbá kotaauankudon in kobayong in rayat in Israel.”

³Tubag i Yoab, “Igumon mako guntuḷondon i TUHAN in rayat in Israel moidapot in kogatut in ná kobayong monia tanaa. Inta Momulia, noniata bidon kon mosia tua in notogu ondok bidon kon i Tuang Datu! Dá nongonu sin mustipabí iyapon? Dika-dika, tongá popisí in taḷá tatua, bayongan in bangusa mobaba kon bungainea!”

⁴Táe ki datu in umuranbí kumadai kon parentanea tatua, dá minayádon in ki Yoab kon bayongan in Israel, noidapot kon ḻipú mita inta noako, bodongka nobui kon Yerusalem,

⁵bo nopotaau kon i Datu Daud in kobayong in intau inta iniap tatua. Kobayong in ḷoḷaki inta motaaudon baḻíon tontara kobayongnea in 1.100.000 kon Israel bo 470.000 in kon Yohuda.

⁶Táe suku in Lewi bo suku in Benyamin in diábí pinoyoiap kon tua. Ki Yoab in diábí nogiap kon i monia sin doí in sia mopobayá in parenta i datu tua.

⁷Kinodoíbí i Allah in pinogiapan tatua bo ihukum-Nea in intau in Israel.

⁸Bo nosambayangdon in ki Daud kon i Allah kainia, “Oo Allah, akuoi naa in totokdon in binaradosa, ampungaipa kaasí in akuoi naa sin aidku tatua in nopompuḷongdon totok.”

⁹Ki TUHAN in noguman kon i Nabi Gad, inta nobaḻí tondoḷ in singog kon sigad i Daud bo i TUHAN,

¹⁰“Bayádon bo poguman kon i Daud kon toḷu in pokipiḻí-Ku kon inia. Onukabí in piḻíonnea tuabí in aidan-Ku.”

¹¹Bo minayádon in ki Gad kon i Daud bo nopotaau in koyow i TUHAN tua, gumannea, “Onda in piḻíon i Tuang Datu:

¹²Butá tanaa in kotugatan in bodito kodaitan in kaanon kon bonu in toḷu notaong, andeka ki Tuang Datu in moḷagui magí-mako sin aḷo-aḷowan mako in musung kon bonu in toḷu nobuḷan, andeka bayongan in butá tanaa kon bonu in toḷu nosinggai tubuon i TUHAN in pitownea inta pinongin yampoi in takit, bo malaekat-Nea in modia kon popatoi kon ondaka in bayáannea. Tantú in tanaa mako mongo onu in musti potaauku kon i TUHAN.”

¹³Ki Daud in notubag, “Kaasí ah, moboditodon in akuoi! Táe dika in hukumon in intau maníka ki TUHAN in mohukum kon inakó sin moḷoben in totabí-Nea.”

¹⁴Dá pinoangoidon i TUHAN in yampoi takit kon intau in Israel dá 70.000 in intau kon sigad monia tua in minatoi.

¹⁵Bo ki TUHAN in nopotabá kon malaekat tobatú sin moyopú kon Yerusalem. Táe kon dodai in malaekat tatua noidapotdon kon diug in pororipúan kon gandum i Arauna intau in Yebus, ki TUHAN nomaḷui kon kaputusan-Nea mohukum kon bangusa tatua. Noguman in Sia kon malaekat tatua, “Tugatdon! Pogogaidon!”

¹⁶Inontong i Daud in malaekat tatua iḷumayug magí mako kon toḷungayá takin kokada-kadai in kedang, malaekat tatua in nosadiadon moyopú kon Yerusalem. Dá ki Daud bo itoi mita in rayat, inta kon dodai in tua nogiḷambung in karong nobaḻí tomponuot kon nomanasaḷ, sinumungkud kon butá.

¹⁷Ki Daud in nosambayang, kainia, “Oo Allah, akuoibí in kitogi taḷá. Akuoibí in nopotabá nokiiap kon intau mita tatua. Bangusa tanaa in totokbí in diá kotaḷá! Oo TUHAN, Allahku, hukumdon in akuoi bo motoḷuadíku, táe poyayúdon in bodito tanaa kon umat-Mu.”

¹⁸Bo malaekat i TUHAN in nopotabá kon i Gad mopotaau kon i Daud kon sia in mustibí moponik kon tampat pororipúan kon gandum i Arauna bo moposindog in mezbah kon i TUHAN kon tua.

¹⁹Dá nobuatdon in ki Daud podudui in parenta i TUHAN inta pinotaau kon inia pinongin i Gad.

²⁰Kon tampat pororipúan kon gandum tatua ki Arauna bo adínea opat inta ḷoḷaki koyogot in moripúmai kon gandum. Nokoontongmai kon malaekat tatua, ki adí i Arauna taya opat tatua noḷagui minayá nogadop.

²¹Naonda in inontong i Arauna kon ki Datu Daud namangoi, namangoi in sia nokipodungkuḷ kon i Daud bo sinumungkud kon tayowonnea.

²²Guman i Daud kon inia, “Moibog in akuoi moposindog in mezbah kon tampat tanaa sin posumbaan kon i TUHAN, sinbá yampoi tanaa in mogogaidon. Tuamai in potaḷuidon in butá tanaa kon inakó. Pogumandon mongo tongonu in boḻinea, uboḻiankudon.”

²³“A, gamádon mako, Tuang Datu,” tubag i Arauna, “bo aidaidon in bayongan in onu inta mopia ontongon i Tuang Datu. Naa in sapi mita baḻíon kuruban payongon, bo aka kayu inta pondungú yo motaaubí pakéon i Tuang in dopí mita inta pororipúan tanaa. Pogamá domandon kon gandum sin baḻíon sosumba. Tongábí ogoiku intua komintan, dikabí uboḻian i Tuang intua.”

²⁴Táe ki datu in notubag, “Dika! Taḷuoionkubí intua podudui in boḻinea. Doíbí in akuoi moposumba kon i TUHAN in onu in kapunyaanmu andeka onu inta nouḻíku diá siniḷopían.”

²⁵Dá inuboḻian i Daud kon i Arauna onom nogatut in doit buḷawan in tampat tatua.

²⁶Bo ki Daud in noposindog in mezbah tobatú kon tua sin posumbaan kon i TUHAN, bo noposumba in kuruban payongon bo kuruban dodamean. Onda intua sia nosambayang bo inindongogan i TUHAN in sambayangnea tatua takin nopoangoi in tuḷú nongkon ḷangit inta nomokak kon kuruban mita kon tudu in mezbah tatua.

²⁷Bo ki TUHAN in nopotabá in malaekat tatua notungkog bui kon pitownea, dá dinuduian doman in malaekat tatua in parenta i TUHAN tua.

²⁸Naonda in inontongdon i Daud kon ki TUHAN in notubag kon sambayangnea sin sosumbanea tatua, dá bui in sia noposumba in kuruban kon mezbah tatua.

²⁹Kon dodai intua ḷoḷaigan i TUHAN inta pinomia i Musa kon padang gurun, bo mezbah pobogoian kon kuruban payongon in kon tampatpa pooibadaan kon Gibeon.

³⁰Táe diá mokobaḻí in ki Daud mayá intua mongonguman takin i Allah, sin moondok in sia kon kedang in malaekat i TUHAN.