Read Mongondow TAWARIKH 1 24 Bible Online

TAWARIKH 1 24 - Mongondow bible

TAWARIKH 1 24

¹Ki Harun in kogadí kon adí ḷoḷaki opat: ki Nadab, ki Abihu, ki Eleazar bo ki Itamar. Ki Nadab bo ki Abihu in minatoi noiuna kon i amá monia bo diápa kogadí. Tuamai in ki Eleazar bo ki Itamar inta ki utat monia in nobaḻí imang. Ki Daud in nosilai kon buí i Harun kon bonu in tongonu notonsilai podudui in oaidan monia. Kon bonu in oaidan podudui in kolompó tatua ki Daud in binantungan i Zadok buí i Eleazar bo i Ahimelek buí i Itamar.

⁴Buí i Itamar in sinilai nobaḻí waḷu notonsilai, bo buí i Eleazar in nobaḻí mopuḷú bo onom notonsilai, sin kon bonu in buí i Eleazar nobarong in ḷoḷaki tongguḷu in motoḷuadí.

⁵Sin pinomayá kon bonu in buí i Eleazar andeka kon bonu in buí i Itamar oyúon in pojabat mita in Baḷoi TUHAN bo itoi mita in agama, dá kon mosilai kon oaidan in nomaké in undian.

⁶Buí i Eleazar bo buí i Itamar in moyo-moyoḷuan in morabut kon undi bo tangoi mita monia in paison in momomais tobatú inta tangoinea in ki Semaya adí i Netaneel intau in Lewi. Bayongan intua inaidan kon tayowon in datu takin bayongan in pogawainea mita. Ki Imang Zadok, ki Ahimelek ki adí i Abyatar bo tongguḷu mita in motoḷuadí i imang bo tongguḷu mita in motoḷuadí i Lewi.

⁷Naa in nomor noyodudui podudui in wakutu monia mopobayá in aidan inta sinundú in undian kon doyowa nopuḷú bo opat in kolompó tatua: 1. Ki Yoyarib — 13. Ki Hupa 2. Ki Yedaya — 14. Ki Yesebeab 3. Ki Harim — 15. Ki Bilga 4. Ki Seoirim — 16. Ki Imer 5. Ki Malkia — 17. Ki Hezir 6. Ki Miyamin — 18. Ki Hapizes 7. Ki Hakos — 19. Ki Petahya 8. Ki Abia — 20. Ki Yehezkiel 9. Ki Yesua — 21. Ki Yakhin 10. Ki Sekhanya — 22. Ki Gamul 11. Ki Elyasib — 23. Ki Delaya 12. Ki Yakim — 24. Ki Maazya

¹⁹Tangoi in intau mita tatua in pinais pinodudui in wakutu monia tumuot kon Baḷoi TUHAN bo mopobayá in oaidan monia kon ibada inta ain sinantú i Harun, mogoguyang monia, podudui in parenta i TUHAN, Allah in Israel.

²⁰Koḻikud intua kon bonu in buí i Lewi noituotpa kon tongguḷu mita in motoḷuadí mita noiduduimai naa: Ki Yehdea, buí i Amram nongkon pipidan in buí i Subael; Ki Yisia, buí i Rehabya; Ki Yahat, buí i Yizhar nongkon pipidan in buí i Selomot; Ki Yeria, ki Amarya, ki Yehaziel bo ki Yekameam ki adí mita i Hebron podudui in umur monia; Ki Samir, buí i Uziel nongkon pipidan in buí i Mikha; Ki Zakharia, buí i Uziel nongkon pipidan in buí i Yisia utat i Mikha; Ki Mahli, ki Musi, bo ki Yaazia, buí i Merari.

²⁷Ki Yaazia in kogadí kon adí ḷoḷaki toḷu: ki Syoham, ki Zakur bo ki Hibri.

²⁸Ki Mahli in kogadí kon adí ḷoḷaki doyowa tangoinea in ki Eleazar bo ki Kish. Ki Eleazar in diá kogadí kon ḷoḷaki, táe ki Kish in kogadí kon adí ḷoḷaki tobatú tangoinea in ki Yerahmeel.

³⁰Ki adí ḷoḷaki i Musi in taya toḷu: ki Mahli, ki Eder bo ki Yerimot. Tuata in motoḷuadí mita in suku Lewi.

³¹Kon dodai in mosia mopobayá in oaidan monia, kon batúan in tongguḷu in motoḷuadí takin ki ai-ainea tobatú inta ḷoḷaki morabut kon undi ná inta inaidan in ginaḷum monia, inta imang mita buí i Harun. Porabutan kon undi tatua inindoian mako i Datu Daud takin i Zadok, i Ahimelek bo tongguḷu mita in motoḷuadí nongkon golongan in imang mita bo nongkon golongan in intau in Lewi.