Read Mongondow TAWARIKH 1 25 Bible Online

TAWARIKH 1 25 - Mongondow bible

TAWARIKH 1 25

¹Noiduduimai kon tua, ki Datu Daud bo itoi mita in intau in Lewi in nomiḻí kon inanakan i Lewi sin mopobayá in oaidan upacara mita in ibada, noiduduimai naa in tangoi monia: ki Asap, ki Heman bo ki Yedutun. Mosia in inogoian in oaidan mopotaau in koyow nongkon i Allah takin kokuti-kuti in musik kecapi, gambus bo simbal. Bo mobaḻí itoi kon ibada bo upacaranea in kon batúannea, piniḻí in paanan mita noiduduimai naa:

²Ki adí ḷoḷaki i Asap taya opat: ki Zakur, ki Yusup, ki Netanya bo ki Asarela. Itoi monia in ki Asap, inta mopotaau in koyow nongkon i Allah, aka pokiaidan i datu.

³Ki adí ḷoḷaki i Yedutun inta taya onom: ki Gedalya, ki Zeri, ki Yesaya, ki Simei, ki Hasabya bo ki Matica. Kon bonu in tongganut i amá monia, mosia in mopotaau in koyow nongkon i Allah takin kokuti-kuti in musik kecapi, bo mosia in mopodondong in dondong dodayow bo sukur kon i TUHAN.

⁴Ki adí ḷoḷaki i Heman inta taya mopuḷú bo opat: ki Bukia, ki Matanya, ki Uziel, ki Sebuel, ki Yerimot, ki Hananya, ki Hanani, ki Eliata, ki Gidalti, ki Romamti-Ezer, ki Yosbekasa, ki Maloti, ki Hotir bo ki Mahaziot.

⁵Ki Heman in nobaḻí nabi i datu tontaní. Ki TUHAN in nobogoi in adí ḷoḷaki inta mopuḷú bo opat tatua takin adí bobay toḷu kon i Heman, sin ki TUHAN ain nodandi kon mobogoi in ḷoḻitúan mopia kon inia.

⁶Bayongan in adí i Heman tua in mopogogitog in musik simbal, kecapi bo gambus kon bonu in tongganut i amá monia sin moguyun kon upacara ibada kon Baḷoi TUHAN. Ki Asap, ki Yedutun bo ki Heman in nokouḻí kon oaidan podudui in topotundú i datu.

⁷Ki adí ḷoḷaki monia inta doyowa nopuḷú bo opat takin ginaḷum motoḷuadí monia tua in intau mita inta mongopia mita mopogogitog in musik. Kobayong monia komintan tua in 288 in intau.

⁸Bo aka monantú kon wakutu monia mogaid, dá morabutbí in mosia komintan kon undi, pinomayá inta nobagupa andeka inta ain nogurang, pinomayá inta ain kopongalaman andeka inta bagupa mobalajar.

⁹Intau inta 288 tatua in sinilai kon bonu in 24 notonsilai podudui kon batúan in motoḷuadí monia. Batúan in tonsilai kobayongnea in 12 in intau kon bonu in tongganut in intau tobatú. Naa in tundugan tangoi monia podudui in undian: 1. Ki Yusup motoḷuadí i Asap — 13. Ki Subael 2. Ki Gedalya — 14. Ki Matica 3. Ki Zakur — 15. Ki Yeremot 4. Ki Yizri — 16. Ki Hananya 5. Ki Netanya — 17. Ki Yosbekasa 6. Ki Bukia — 18. Ki Hanani 7. Ki Yesarela — 19. Ki Maloti 8. Ki Yesaya — 20. Ki Eliata 9. Ki Matanya — 21. Ki Hotir 10. Ki Simei — 22. Ki Gidalti 11. Ki Azareel — 23. Ki Mahaziot 12. Ki Hasabya — 24. Ki Romamti-Ezer