Read Mongondow TAWARIKH 1 26 Bible Online

TAWARIKH 1 26 - Mongondow bible

TAWARIKH 1 26

¹Naa in tonsilai in oaidan kon intau mita in Lewi moḷoḷukad kon Baḷoi TUHAN. Nongkon inanakan i Korah sinundú in ki Meselemya ki adí i Kore nongkon motoḷuadí i Ebyasap.

²Sia in kogadí kon adí ḷoḷaki taya pitu inta pinais podudui in umur monia: ki Zakharia, ki Yediael, ki Zebaja, ki Yatniel,

³ki Elam, ki Yohanan, ki Elyoënai.

⁴Noiduduimai sinundú in ki Obed-Edom. Sia in binarakatan i Allah pinongin nobogoi in adí ḷoḷaki waḷu inta pinais podudui in umur: ki Semaya, ki Yozabad, ki Yoah, ki Sakhar, ki Netaneel,

⁵ki Amiel, ki Isakhar bo ki Peuletai.

⁶Ki Semaya ki adí guya-guyang i Obed-Edom in kogadí kon adí ḷoḷaki onom: ki Otni, ki Repael, ki Obed, ki Elzabad, ki Elihu bo ki Semakhya; komintan intau mita moponting kon inanakan monia sin mosia in mongotorindog, totokanea kon tua in ki Elihu bo ki Semakhya.

⁸Kon oaidan moḷukad tatua inanakan i Obed-Edom nobogoi in 62 in ḷoḷaki inta mongotorindog.

⁹Inanakan i Meselemya in nobogoi in intau 18 inta mongotorindog.

¹⁰Nongkon inanakan i Merari sinundú in ki Hosa. Sia in kogadí kon adí ḷoḷaki opat: ki Simri (sia in deemanbí guya-guyang táe dinuí i amánea nobaḻí itoi),

¹¹ki Hilkia, ki Tebalya bo ki Zakharia. Kobayong monia komintan in 13 in anggota motoḷuadí i Hosa in nobaḻí moḷoḷukad kon Baḷoi TUHAN.

¹²Moḷoḷukad mita kon Baḷoi TUHAN in sinilai podudui in inanakannea. Mosia in inogoian doman in oaidan mita kon bonu in Baḷoi TUHAN ná intau in Lewi ibanea.

¹³Kon batúan in inanakan pinomayá inanakan inta mobarong andeka inanakan inta moyakag, morabut kon undi sin monotaau mongo bonawang táonda in poḷukadan monia.

¹⁴Ki Selemya in nokouḻí kon bonawang kon dotá in pomukaan. Ki Zakharia ki adínea inta umuran mobogoi in tonggina inta mopia, nokouḻí kon bonawang kon dotá in utuan.

¹⁵Ki Obed-Edom in nokouḻí kon bonawang kon dotá in toḷatan bo ki adínea mita in nokouḻí kon oaidan moḷukad kon gudang mita inta pinotagúan kon bayongan in yagi-yagi.

¹⁶Ki Supim bo ki Hosa in nokouḻí kon bonawang kon dotá in toyopan bo bonawang Syalekhet inta kon daḷan motakod. Oaidan moḷukad tua in sinompia námai tua dá umuran oyúon in moḷukad kon bonawang.

¹⁷Pomuḷoi in singgai kon dotá in pomukaan onom in moḷoḷukad, kon dotá in utuan opat bo kon dotá in toḷatan opat. Gudang mita inta pototagúan kon bayongan in yagi-yagi in iḷukadan in intau opat: tododoyowa in intau kon gudang tobatú

¹⁸Kon Pavilyun kon dotá in toyopan pinoki ḷukad kon intau opat moḷoḷukad kon daḷan bo doyowa in moḷoḷukad kon pavilyun tua.

¹⁹Natuata in pinososilai kon oaidan moḷukad kon inanakan i Korah bo inanakan i Merari.

²⁰Intau mita ibanea kon bonu in suku Lewi in inogoian oaidan moḷukad kon kapunyaan kon bonu in Baḷoi TUHAN bo kon gudang inta pinotagúan kon bayongan in oogoi kon i Allah.

²¹Ki Ladan in adí ḷoḷaki tobatú i Gerson; sia in nopomuí in tongonumai nopaanan in inanakan, noitakin doman in inanakan i Yehiel ki adínea.

²²Ki adí mita i Yehiel, inta ki Zetam bo ki Yoël, in inogoian oaidan kon moindoi kon gudang mita bo soaḷ doit mita kon Baḷoi TUHAN.

²³Buí i Amram, i Yizhar, i Hebron bo i Uziel in nokouḻí doman kon tonsilai oaidan.

²⁴Ki Sebuel nongkon inanakan i Gersom, ki adí i Musa in nobaḻí moḷoḷukad kon kaoyúonan in Baḷoi TUHAN.

²⁵Sia in oyúonpa in uputpa in kompong in motoḷuadí takin i Selomit pinongin i Eleazer ki utat i Gersom. Pipidan buí i Eleazer noidapot kon i Selomit in noiduduimai naa: Ki Eleazer, ki Rehabya, ki Yesaya, ki Yoram, ki Zikhri, ki Selomit.

²⁶Ki Selomit bo ki utatnea mita in inogoian in oaidan moḷukad kon bayongan inta inogoi inta pinosumba i Datu Daud, in tongguḷu mita in motoḷuadí, itoi mita in inanakan, bo porwira mita moḷantud.

²⁷Oogoi mita tatua in tongosilai nongkon barang inta inagow inta nouḻí monia kon parang bo inta pinosumba monia sin tongá pakéon kon bonu in Baḷoi TUHAN.

²⁸Impoḷok mako in singog, ki Selomit bo motoḷuadínea in kitogi totaau kon bayongan in yagi-yagi inta ain inogoi tongá pogaid kon bonu in Baḷoi TUHAN, noitakin doman in sosumba mita inta pinongin i Nabi Samuel in inogoidon i Datu Saul, i Abner adí i Ner, bo i Yoab ki adí i Zeruya.

²⁹Buí i Yizhar, in ki Kenanya bo adínea mita, inogoian in oaidan administrasi in negara bo oaidan mita in pongadilan kon Israel.

³⁰Bayongan in urusan agama bo pomarentaan kon Israel dotá in toyopan kon Ongkag in Yordan in inogoi kon i Hasabya, bo kon 1.700 in ginaḷum motoḷuadínea: komintan intau mita inta nobaḻí tongganut kon buí i Hebron.

³¹Itoi in buí i Hebron in ki Yeria. Kon taong inggopat nopuḷú kon pinomarentaan i Datu Daud inaidandon in pinonaridian kon bui i Hebron. Kon pinonaridian tatua noniata magí kon sigad monia tua oyúon in tontara mita inta mongotorindog inta nogutun kon Yazer kon bonu in butá in Gilead.

³²Bayongan in urusan in agama bo pomarentaan kon Israel kon dotá in pomukaan kon Ongkag in Yordan — inta butá in suku Ruben, Gad bo tongosilai in suku Manasye — in inogoi kon 2.700 in itoi in motoḷuadí i Yeria, mosia komintan in intau mita inta nobaḻí tongganut inta piniḻí i Datu Daud.