Read Mongondow TAWARIKH 1 29 Bible Online

TAWARIKH 1 29 - Mongondow bible

TAWARIKH 1 29

¹Bo ki Datu Daud in nogumandon kon bayongan in intau inta noyosipun kon tua, “Nongkon bayongan in adíku ḷoḷaki, ki Salomobí in piniḻí i Allah. Táe nobagupa totok in sia bo noyakagpa in pongalamannea bokaka oaidan tanaa in totokbí in moḷoben. Apa doman inta posindogon tatua in deemanbí komaḻig in intau, táe baḷoibí kon i TUHAN Allah.

²Bahan mita pakéon kon baḷoi tatua takin pakakatnea mita in sinadiakudon muna onda inta kinomampuanku sinadia. Akuoi in noposadiadon in buḷawan, saḷaka, bitú uatoi, kayu, batu mita koboḻi bo batu mita permata, batu mita inta noyagi-yagimai in batangannea sin mobaḻí ḷambá mita bo nobayong totok in batu pualam.

³Bo popisí in tabiku kon Baḷoi Allahku tatua dá nobogoi domandon in akuoi kon saḷaka bo buḷawan nongkon kapunyaanku tontaní:

⁴Buḷawan inta totok in mopia in noiḻiu kon 100 noton, bo saḷaka totokan in 240 no ton sin pogaip kon dinding in Baḷoi TUHAN, bo pogaip kon pakakat mita inta musti pomiaan in intau mita inta monotaau totok kon oaidan tatua. Dá tanaa in ki inepa in moibog mobogoi in sosumbanea kon i TUHAN takin pia in gina?”

⁶Dá tongguḷu mita in inanakan, tongguḷu in suku, porwira mita bo moḷoḷukad kon kapunyaan i datu in noguman doman kon mosia in moibog doman mosumbang.

⁷Bo mosia in nobogoi in tanaa sin pakéon kon Baḷoi TUHAN tatua: buḷawan noiḻiu kon 170 no ton, saḷaka noiḻiu kon 340 no ton, bitú in gogió bo 620 no ton, bo uatoi in noiḻiu kon 3.400 no ton.

⁸Intau mita inta kobatu mita permata in nobogoidon kon i Yehiel sin pobonu kon kas in Baḷoi TUHAN. (Ki Yehiel in intau in Lewi tobatú nongkon inanakan i Gersom.)

⁹Rayat in nobogoibí takin pia in gina kon i TUHAN bo noḷunganga in gina sin nobayongdon in pinosumba monia. Nosanang domandon totok in gina i Datu Daud.

¹⁰Kon tayowon in intau mobayong tatua ki Datu Daud nodayow kon i TUHAN. Sia in noguman, “Oo TUHAN Allah inta sinumba i Yakub mogoguyang nami, dinayo-dayowdon in Iko modapot in mononoi!

¹¹Iko in totuu moḷoben, bo nongawasa. Iko in momulia, ponango-nangoian bo moagung. Bayongan in yagi-yagi kon ḷangit bo kon butá Ikobí in kitogi. Iko in Datu Moḷoben, pongawasa kon bayongan in yagi-yagi.

¹²Bayongan in kaoyúonan bo kobiagan motompia nongkon ini-Mubí komintan; bayongan in yagi-yagi in kon bonubí in kawasa-Mu inta moropot tua; Ikobí in kitogi kawasa mopobaḻí kon inekabí in mobaḻí intau moḷoben bo moropot.

¹³Tanaa, o Allah nami, kami mopoyaput in sukur kon ini-Mu, bo modayow in kami kon tangoi-Mu inta moḷantud.

¹⁴Akuoi bo rayatku tanaa in diábí mokopobogoi kon onu bo onu kon ini-Mu, sin bayongan in yagi-yagi tua Ikobí in nobogoi bo onu inta inogoi nami naa in Ikobí doman in kitogi.

¹⁵Kinotaauan-Mubí, o TUHAN, kon ná doman mogoguyang nami, kami in nobiag naa in naonda bo mokokiangoi bo intau ango-angoi. Kobiagan nami in naonda bo oḻinow inta noitaḻib, bo kami naa in diábí moiḷagui kon popatoi.

¹⁶Oo TUHAN, Allah nami, bayongan in pakakat inta koboḻi naa in sinipun nami kon naa sin moposindog in baḷoi tobatú kon ini-Mu sinbá kami in motaaudon mohoromat kon tangoi-Mu inta motusi. Táe tua komintan in sinarimabí nami nongkon ini-Mu tontaní bo kapunyaan-Mubí doman.

¹⁷Kinotaauankubí kon Iko in monungkuḷ kon gina in intau kon batúannea bo kinoibog-Mu in intau inta motuḻid in ginanea. Takin gina nobayag bo pia in gina posumbaku in naa komintan kon ini-Mu. Akuoi in nokoontongdon tontaní kon naonda in umat-Mu inta noyosipun kon naa nodia kon sosumba monia kon ini-Mu takin pia in gina.

¹⁸Oo TUHAN Allah, inta sinumba i Abraham, i Ishak bo i Yakub, mogoguyang nami, igumon mako ḷukadan-Mu mako sinbá umat-Mu tantú motabi kon ini-Mu ná tanaa mako bo tuḷungaidon sinbá mosia in umuran mosatia kon ini-Mu.

¹⁹Ogoiaidon in ki Salomo, ki adíku ḷoḷaki in ibog inta totu-totuu dumudui kon bayongan in parenta-Mu bo moposindog in baḷoi pooibadaan tatua inta ain pinosadiaku.”

²⁰Nopaḷut mako nosambayang natua, ki Daud in noguman kon intau nobayong inta noyosipun kon tua, “Dayowdon in ki TUHAN Allahmu!” Dá bayongan in intau kon tua nodayow kon i TUHAN, Allah inta sinumba in mogoguyang monia. Bo sinumungkud in mosia sin mohoromat kon i TUHAN bo datu.

²¹Kon singgai noiduduimai mosia in noratá kon bobiagon sin posumba mobaḻí kuruban kon i TUHAN, bo sinilai kon bayongan in rayat. Koḻikud intua 1.000 in sapi koḷakian, 1.000 in domba koḷakian bo 1.000 in domba batánea inta iratá bo sinubá sibatu kon tudu in mezbah. Mosia in noposumba doman in anggur inta ain sinantú kon kuruban mita tatua.

²²Kon singgai tua mosia in nongaan bo nonginum takin pia in gina kon tayowon i TUHAN. Bo kon induaneadon in mosia nopotaau kon ki Salomo in nobaḻí datu. Pinodoyon kon tangoi TUHAN, mosia in nopobaḻídon kon inia nobaḻí datu monia bo ki Zadok in nobaḻí imang.

²³Dá inta nobaḻí toḻiu i Daud ki amánea, ki Salomo in iḻimitú kon ḷoḻitúan in datu inta ain sinantú i TUHAN. Sia in datu inta nokodapot kon oaidannea komintan bo kinobangkaḷ in bayongan in bangusa Israel.

²⁴Komintan pojabat in pomarenta bo tontara noidapot kon adí mita ḷoḷaki i Daud ibanea in nongakubí kon kawasa i Salomo saḷaku datu.

²⁵Binaḻí i TUHAN in bayongan rayat noibog kon i Datu Salomo bo binaḻí-Nea datu inta motoya-toyang nongkon datu nongkon ondaka inta nokoimontandon nomarenta kon Israel.

²⁶Ki Daud ki adí i Isai in nomarenta kon bayongan in Israel

²⁷opat nopuḷú notaong in koonggotnea. Kon Hebron sia in nomarenta pitu notaong bo kon Yerusalem toḷu nopuḷú bo toḷu notaong in koonggotnea.

²⁸Nooyúon in sia bo ihoromat bo minatoi kon dodai in nogoguyangdon. Ki Salomo ki adínea ḷoḷaki in nobaḻí datu nomaḷui kon inia.

²⁹Kinobiagan i Daud nongkon pinomangkoian noidapot kon imbuitnea ain pinais kon bonu in buk Nabi Samuel, Nabi Natan bo Nabi Gad.

³⁰Kon bonu in buk tatua inouman in pinomarentaannea, kawasa nea bo bayongan inta nobaḻí kon inia, kon Israel bo kon dodatuan mita inta kon diugmai in Israel.