Read Mongondow TAWARIKH 1 9 Bible Online

TAWARIKH 1 9 - Mongondow bible

TAWARIKH 1 9

¹Bayongan intau in Israel in pinais pinodudui kon batúan in motoḷuadínea. Daptar tatua in pinais kon bonu in buk Datu mita in Israel. Nobaḻí hukuman popisí in mosia nomia kon dosa, dá rayat in Yohuda in dinia kon pinoḷumbúan.

²Nongkon sigad monia inta muna-munamai nobui kon butá monia kon kotá mita in intau biasa, imang mita, intau in Lewi bo inta mogogaid mita kon Baḷoi TUHAN.

³Tongosilai nongkon suku in Yohuda, Benyamin, Epraim bo Manasye in nobui bo nogutun kon Yerusalem.

⁴690 in motoḷuadí nongkon suku in Yohuda inta nogutun kon Yerusalem, noitakin doman in buí i adí mita i Yohuda inta ki Peres, ki Syela bo ki Zerah. Buí i Peres in ki Utai in tongganutnea. Pipidan in buí i Utai nongkon ḻimonag bo pinodamonik in ki Utai, ki Amihud, ki Omri, ki Imri, bo ki Bani. Buí i Syela in ki Asaya in tongganutnea. Sia in tongguḷu in motoḷuadí. Buí i Zerah in ki Yeuel in tongganutnea.

⁷Intau mita in suku Benyamin inta nogutun kon Yerusalem kobayongnea in 956 nomotoḷuadí. Tongguḷu mita in motoḷuadí monia in: Ki Salu adí i Mesulam, ki ompu kinoyotan i Hodawya, ki ompu sinompunuk i Hasenua Ki Yibnia adí i Yeroham Ki Ela adí i Uzi, ompu i Mikhri Ki Mesulam ki adí i Sepaca, ki ompu kinoyotan i Rehuel, ki ompu sinompunuk i Yibni.

¹⁰Imang mita inta moiduduimai naa in nogutun kon Yerusalem: Ki Yedaya, ki Yoyarib bo ki Yakhin Ki Azarya adí i Hilkia, mogoguyangnea in ki Mesulam, ki Zadok, ki Merayot bo Ahitub. (Ki Azarya in tongguḷu in pogawai kon Baḷoi TUHAN.) Ki Adaya adí i Yeroham; mogoguyangnea in ki Pasyhur bo ki Malkia. Ki Masai adí i Adiel; mogoguyangnea in ki Yahzera, ki Mesulam, ki Mesilemit, ki Imer.

¹³Imang mita inta nobaḻí tongguḷu in motoḷuadí, kobayongnea in 1.760 in intau. Mosia tua in mongopandoi in mogaid kon onukabí in Baḷoi TUHAN.

¹⁴Intau mita in Lewi noiduduimai naa inta nogutun kon Yerusalem: Ki Semaya adí i Hasub; mogoguyangnea in ki Azrikam bo ki Hasabya nongkon inanakan i Merari Ki Bakbakar, ki Heres bo ki Galal Ki Matanya adí i Mikha; mogoguyangnea in ki Zikhri bo ki Asap. Ki Obaja adí i Semaya; mogoguyangnea in ki Galal bo ki Yedutun Ki Berekhya adí i Asa, ompu i Elkana, sia in nogutun kon butá kon kotá in Netopa.

¹⁷Moḷoḷukad mita kon Baḷoi TUHAN inta nogutun kon Yerusalem inta noyotakin in motoḷuadí mita monia in ki Akub, ki Talmon, ki Ahiman, bo ki Salum tongguḷu in moḷoḷukad.

¹⁸Noidapot in singgai naa intau mita nongkon inanakan monia in pinoki ḷukadan in Bonawang in Datu[16] kon dotá in pomukaan. Dungkuḷmai intau mita nongkon inanakan monia in pinoki ḷukadan in bonawang mita inta mopobayá ná pinononḷoḷaigan in intau in Lewi.

¹⁹Inta pinoki ḷukadan in ngara tumuot kon ḷoḷaigan i TUHAN in ki Salum takin intau mita inta tongo inanakannea, tuata in inanakan i Korah. (Ki Salum in ki adí i Kore ki ompu i Ebyasap.) Dungkuḷmai in mogoguyang monia in nogaid kon oaidan tatua kon tungkuḷ in mosia nopobayá in oaidan kon ḷoḷaigan i TUHAN.

²⁰Ki Pinehas adí i Eleazar — igumon mako ḷukadan i TUHAN in sia! — nokoimontan in nobaḻí tongguḷu monia.

²¹Ki Zakharia adí i Meselemya doman in moḷoḷukad kon ngara moḷoben in Ḷoḷaigan i TUHAN.

²²Bayongan in intau inta piniḻí moḷukad kon ngara mita moḷoben kobayongnea in 212 in intau. Mosia in pinais podudui in ḻipú mita inta pinogutunan monia. Mogoguyang monia in inogoian in oaidan mita tatua i Datu Daud bo i Nabi Samuel.

²³Pinangkoi kon tua mosia takin buí monia in umurandon nobaḻí moḷoḷukad kon bonawang in Baḷoi TUHAN.

²⁴Opat in bonawang: tobatú kon dotá in utuan; tobatú kon dotá in toḷatan; tobatú kon dotá in pomukaan bo tobatú doman kon dotá in toyopan. Kon batúan in ngara tatua sinampatdon in intau in Lewi inta nobaḻí tongguḷu in moḷoḷukad.

²⁵Ginaḷum monia inta nogutun kon ḻipú mita, mobantung kon i monia moyo-moyoḷuan — tumongo diminggu in koonggotnea.

²⁶Táe taya opat inta tongguḷu in moḷoḷukad tatua in mopobayábí in oaidan motantú. Mosia in kitogi totaau kon yuang mita kon Baḷoi TUHAN bo pakakat mita inta sinagú kon tua.

²⁷Mosia in nogutun kon diug in Baḷoi TUHAN, sin mosia in mustibí umuran moḷukad kon baḷoi tatua bo momukat kon bonawangnea mita muḷoi in doḷo-doḷom.

²⁸Tongosilai intau in Lewi in moḷoḷukad kon pakakat mita in ibada. Mosia in nogiap kon tua kon dodai in poḷuaion bo kon dodai in pobuion kon tampatnea.

²⁹Tongosilai doman moḷoḷukad kon pakakat mita in ibada bo kon topong, kon anggur, kon ḷana zaitun, kamania, takin pododungú mita.

³⁰Táe inta mopoyobauk in pododungú mita tatua in imangbí mita.

³¹Inta mogaid kon bayongan in sosumba inta inangag[17] in intau in Lewi tangoinea in ki Matica, adí guya-guyang i Salum nongkon inanakan i Korah.

³²Intau mita nongkon inanakan i Kehat in moindoi kon poposadiaan kon roti inta oḷudon[18] kon i TUHAN muḷoi in singgai in Sabat.

³³Tongosilai intau in Lewi inta ibanea in mopobayá in oaidan nobaḻí mododondong kon Baḷoi TUHAN. Tongguḷu mita in motoḷuadí monia in nogutun kon tongonumai in baḷoi kon Baḷoi TUHAN. Mosia in diábí inogoian in oaidan ibanea, sin mosia in mogaidbí doḷom bo singgai.

³⁴Intau mita inta sinangoi mita tua in tongguḷu mita in motoḷuadí in Lewi podudui in pipidan in buí monia. Mosia in itoi mita inta nogutun kon Yerusalem.

³⁵Ki Yeiel in noposindog in kotá in Gibeon, bo nogutun kon tua. Ki buḷoinea in ki Maakha,

³⁶bo ki adínea inta ḷoḷaki, inta guya-guyang tangoinea in ki Abdon; ibanea in tangoinea ki Zur, ki Kish, ki Baal, ki Ner, ki Nadab,

³⁷ki Gedor, ki Ahyo, ki Zakharia bo ki Miklot,

³⁸ki amá i Simea. Buí monia in nogutun kon Yerusalem noyotakin in motoḷuadí ibanea inta toinanakan monia.

³⁹Ki amá i Datu Saul in tangoinea in ki Kish bo ki ḷakinea in ki Ner in tangoinea. Ki Saul in kogadí kon adí ḷoḷaki opat: ki Yonatan, ki Malkisua, ki Abinadab, bo ki Eshbaal.[19]

⁴⁰Ki Yonatan in kogadí kon adí ḷoḷaki tangoinea in ki Meribaal,[20] amá i Mikha.

⁴¹Ki Mikha in kogadí kon adí ḷoḷaki opat: ki Piton, ki Melekh, Tahrea bo ki Ahas.

⁴²Ki adí i Ahas inta ki Yoada in kogadí kon adí ḷoḷaki toḷu: ki Alemet, ki Azmawet bo ki Zimri. Pipidan in buí i Zimri in ki Moza,

⁴³ki Bina, ki Rapa, ki Elasa bo ki Azel.

⁴⁴Ki Azel in kogadí kon adí ḷoḷaki onom: ki Azrikam, ki Bokhru, ki Ismael, ki Searya, ki Obaja bo ki Hanan.