Read Mongondow TAWARIKH 2 1 Bible Online

TAWARIKH 2 1 - Mongondow bible

TAWARIKH 2 1

¹Ki Salomo ki adí ḷoḷaki i Daud nobaḻídon datu inta moropot in kinoḻitúannea kon bonu in dodatuan Israel. Ki TUHAN Allahnea in nomarakat kon inia bo nopobaḻí kon inia mokawasa totok.

²Bayongan tongguḷu in tontara 1.000 bo 100, bayongan pojabat in pomarenta, bo bayongan tongguḷu in motoḷuadí in Israel pinarentaan i Datu Salomo

³mayá moyotakinnea kon tampat poibadaan kon Gibeon. Mosia minayá intua, sin kon tua oyúon in Ḷoḷaigan i TUHAN inta pinomia i Musa mogogundoi i TUHAN kon dodai in kon padang gurun. (

⁴Táe Poti Dodandian i TUHAN in kon Yerusalem kon bonu in ḷoḷaigan inta pinosindog i Datu Daud sin potagúan kon Poti tatua kon dodai in pinampingnea nongkon Kiryat-Yearim.)

⁵Mezbah bitú inta pinomia i Bezaleel ki adí i Uri, ki ompu i Hur, in kon Gibeon doman kon tayowon in Ḷoḷaigan i TUHAN. Ki Datu Salomo bo bayongan in rayat in noibada kon i TUHAN kon tua.

⁶Kon tayowon in Ḷoḷaigan tatua ki datu in noposumba kon tudu in mezbah bitú 1.000 in bobiagon nobaḻí kuruban payongon kon i TUHAN.

⁷Doḷom tua ki Allah nokipogontong kon i Salomo bo noguman, “Salomo, poigumdon kon onu in koibogmu, ogoi-Kubí intua kon inimu!”

⁸Ki Salomo in notubag, “O Allah, pinoniata-Mu kon notabibí totok in Iko kon i amáku ki Daud, bo Iko in noduídon kon inakó nobaḻí datu nomaḷui kon inia.

⁹Tanaa, o TUHAN Allah, igumon intompodan-Mudon in dandi-Mu kon i amáku. Dinuí-Mudon in akuoi nobaḻí datu in bangusa inta moḷoben tanaa inta diádon koiapan in kobayongnea.

¹⁰Manangka intua ogoiaidon kaasí in akuoi naa in kabijaksanaan bo pongotahuan inta paraḷuonku kon modia kon i monia. Sin aka diá natua, yo diábí in akuoi mokotongod in momarenta kon umat-Mu inta mobarong totok naa?”

¹¹Tubag i Allah kon i Salomo, “Onu inta inigummu tua in mopiabí totok. Iko in diábí noigum kon kaoyúonan andeka kapunyaan andeka ponango-nangoian andeka kopatoian in musungmu mita andeka moumur in kobiaganmu tontaní, táe kabijaksanaanbí bo pongotahuan momarenta kon umat-Ku inta pinoki ḷukad-Ku kon inimu.

¹²Tuamai in kabijaksanaan bo pongotahuan in ogoi-Kubí kon inimu. Koḻikud intua baḻíon-Kubí in iko mobiag mooyúon totok, moiḻiu kon kooyúon bo moiḻiu kon tangoi in datu nongkon ondakabí pinomayá dungkuḷmai andeka kon singgai moiduduimai.”

¹³Onda intua ki Salomo in nonaḷámaidon kon pooibadaan kon Gibeon inta oyúon in Ḷoḷaigan i TUHAN, bodongka nobuidon kon Yerusalem. Nongkon tua nopobayádon in sia in pomarentaannea kon Israel.

¹⁴Sia in nonompakakat kon tontaranea takin 1.400 in kereta in parang bo 12.000 in kabaḷo in parang. Tongosilai in sinampatnea kon Yerusalem, bo kiagatnea in sinilai kon kotá mita ibanea.

¹⁵Kon dodai in ki Salomo nomarenta, buḷawan bo saḷaka in nobaḻídon pakakat biasa kon Yerusalem, nádon onda bo batu; bo kayu ḷokuyú in Libanon nobayongdon totok nádon onda bo kayu ara biasa.

¹⁶Pinongin intau mita inta mopopotaḷui mita inta notuḷung kon i datu, kabaḷo mita pinoangoi nongkon Mesir bo Kewe,

¹⁷bo kereta mita in parang inta pinoangoi nongkon Mesir, onda intua pinoki dia bui kon datu mita in Het bo datu mita in Siria bo boḻinea in 150 in doit saḷaka sin poguboḻi kon kabaḷo tobatú bo 600 in doit saḷaka sin potaḷui kon kereta in parang tobatú.