Read Mongondow TAWARIKH 2 11 Bible Online

TAWARIKH 2 11 - Mongondow bible

TAWARIKH 2 11

¹Naonda in ki Datu Rehabeam noidapot in Yerusalem, nosipun in sia kon 180.000 in tontaranea inta mongopia totok nongkon suku in Yohuda bo Benyamin sin monayow kon intau in Israel bo mopoguḻit bui in kawasa nea kon suku mita kon Israel dotá in utuan.

²Táe ki TUHAN in nopotabá kon i Nabi Semaya

³mopotaau in koyow tanaa kon i Rehabeam bo kon bayongan in intau kon suku in Yohuda bo Benyamin,

⁴“Dikabí tubuonmu in ki utatmu mita intau in Israel. Pobuidon! Onu inta ain nobaḻí tua in kinoibog-Kubí.” Dá mosia in dinumudui kon bayongan in parenta i TUHAN bo diá nobaḻí minayá monubu kon i Yerobeam.

⁵Ki Rehabeam nogutun kon Yerusalem bo nopotabá kon intau nodinding mita in kotá mita inta kon butá in Yohuda bo Benyamin, tuata:

⁶kotá in Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zip,

⁹Adoraim, Lakhis, Azeka,

¹⁰Zora, Ayalon bo Hebron.

¹¹Inirigonannea in kotá mita inta dininding tatua bo pinoki ḷukad kon itoi in tontara tobatú kon batúan in kotá tatua. Kon batúan in kotá tatua pinosadiannea kon kaanon, ḷana in zaitun bo anggur

¹²takin kaḻeaw bo pandong. Dá butá in Yohuda bo Benyamin umuran kon bonu in kawasanea.

¹³Imang mita bo intau in Lewi nongkon bayongan butá in Israel minayá dinumugang kon i Rehabeam.

¹⁴Intau in Lewi mita tatua nonaḷámai kon rawang in bonok bo butá monia bo nomamping kon Yohuda bo Yerusalem, sin ki Yerobeam bo datu mita inta nomaḷui kon inia in diá nobogoi kon i monia nogaid nobaḻí imang i TUHAN.

¹⁵Ki Yerobeam in noduí kon imangnea mita tontaní sin mogundoi kon tampat mita pososumbaan kon berhala bo posumbaan doman kon ging mita takin patong mita in sapi inta pinomianea tontaní.

¹⁶Intau mita nongkon bayongan in suku Israel inta totu-totuudon moibog mosumba kon i TUHAN, Allah in Israel, nomamping kon Yerusalem, dinumudui kon intau mita in Lewi tatua sinbá motaau moposumba in kuruban kon i TUHAN, Allah inta sinumba in mogoguyang monia.

¹⁷Natua in inaidan monia sin moginrigon kon dodatuan in Yohuda. Toḷu notaong in mosia in dinumudui kon pinomarentaan i Rehabeam ki adí ḷoḷaki i Salomo tatua, bo nobiag naonda bo kon tungkuḷ in pinomarentaan i Datu Daud bo i Datu Salomo.

¹⁸Ki Rehabeam notonibuḷoi i Mahalat; ki amá i Mahalat in ki Yerimot ki adí ḷoḷaki i Daud, bo ki inánea in ki Abihail ki adí i Eliab, ki ompu i Isai.

¹⁹Mosia in kogadí kon adí ḷoḷaki taya toḷu: ki Yeus, ki Semarya bo ki Zaham.

²⁰Noiduduimai kon tua ki Rehabeam notonibuḷoi i Maakha ki adí i Absalom. Mosia in nokouḻí kon adí ḷoḷaki taya opat: ki Abia, ki Atai, ki Ziza bo ki Selomit.

²¹Ki Rehabeam in kobuḷoi kon mopuḷú bo waḷu bo pahang in onom nopuḷú, doyowa nopuḷú bo waḷu in adí ḷoḷaki bo onom nopuḷú in adí bobay. Kon sigad in bayongan i buḷoinea bo i pahangnea tatua, ki Maakha inta totok in kinotabinea.

²²Tuamai in ki Abia ki adí i Maakha in totok in kinoibognea kon sigad in bayongan i adínea ibanea, dá ki Abiadon doman in piniḻínea momaḷui kon inia mobaḻí datu.

²³Nomaké in kabijaksanaan ki Rehabeam nobogoi in oaidan mita kon i adínea mita ḷoḷaki bo pinoki bayáannea in kotá mita inta dininding kon bayongan butá in Yohuda bo Benyamin. Inogoiannea in mosia in kaanon inta mobayong totok, bo inogoian doman in buḷoi mobayong kon i monia.