Read Mongondow TAWARIKH 2 13 Bible Online

TAWARIKH 2 13 - Mongondow bible

TAWARIKH 2 13

¹Kon taong impuḷú bo waḷu kon pinomarentaan i Datu Yerobeam kon Israel, ki Abia in nobaḻí datu kon Yohuda,

²bo nomarenta toḷu notaong in koonggotnea kon Yerusalem. Ki inánea in ki Mikhaya ki adí i Uriel nongkon kotá in Gibea. Onda intua nobaḻídon in parang kon sigad i Abia bo i Yerobeam.

³Ki Abia in nopotabádon in tontaranea 400.000, bo ki Yerobeam in nopotabádon in tontaranea 800.000.

⁴Doyowa nopaanan in tontara tatua noyogintayowandon kon butá kon buḷud in Epraim. Ki Abia in notakod kon Buḷud in Zemaraim bo nomaḷú kon i Yerobeam bo kon intau in Israel, “Pokodongog!

⁵Kinotaauan monimu kon ki TUHAN, Allah Israel, ain nogaid kon dandi takin i Daud kon sia bo buínea in umuranbí momarenta kon Israel modapot in mononoi. Dandi tatua in diábí motaau inggamáan.

⁶Umpaka natua, ki Yerobeam ki adí i Nebat tua in nomarontakbí kon i Salomo, ki datunea.

⁷Nosipun in sia kon topaanan in intau mita inta diá koendar bo nomakisa kon onu inta kinoibog monia kon i Rehabeam ki adí ḷoḷaki i Salomo, inta kon dodai intua noiḻiupa in bagu bo diápa kopongalaman noparang.

⁸Tanaa in kai monimu kamai mokoḷawangbí kon kawasa inta inogoi i TUHAN kon buí i Daud, popisí in mobarong totok in tontaramu bo oyúon in sapi buḷawan kon i monimu inta binaḻí i Yerobeam dewamu.

⁹Imang mita i TUHAN bo buí i Harun bo intau mita in Lewi in sinokountundon monimu komintan! Bo toḻiunea kon tua, ki inekabí in moibog mobaḻí imang, asaḷ bo modia in sia kon sapi tobatú andeka domba pitu, yo baḻíondon monimu imang kon i inta deemanbí ki Allah, sin natuabí in oaid in bangusa mita ibanea moduí kon imang monia. Táe kami in diábí nogaid kon natua.

¹⁰Kami in umuranbí nogundoi kon i TUHAN Allah nami bo diábí nonaḷámai kon i-Nia. Imang mita nami in umuranbí nongkon buí i Harun, bo intau mita in Lewi umuranbí mobantung kon i monia.

¹¹Pomuḷoi in doḷo-doḷom bo ḷoḷabungnea motubá in mosia kon dupa bo moposumba in kuruban angagon kon i TUHAN, bo poḷat moposadia in roti oḷudon.[9] Pomuḷoi in doḷom mosia mopoyongkit in togá mita inta kon tudu in pototuduan kon togá nongkon buḷawan. Kami in umuranbí dinumudui kon parenta mita i TUHAN, táe moiko in nonaḷámaidon kon i-Nia.

¹²Itoi nami in ki Allah tontaní bo imang-Nea mita in kon naa. Mosia in nosadiadon mogirup kon torompet nobaḻí tomponuot kon kami in monubudon kon i monimu. Ei intau in Israel, dikabí moḷawang kon i TUHAN, Allah in mogoguyangmu! Diábí in moiko mokountung!”

¹³Kon dodai intua ki Yerobeam in nopotabádon in tongosilai nongkon tontaranea sin monubu kon Yohuda nongkon tumi, bo tongosilai doman in nonayow kon i monia nongkon muna.

¹⁴Naonda in inontong in tontara in Yohuda kon mosia in kinopungdon, nomaḷú in mosia mopoigum in totuḷung kon i TUHAN. Imang mita nogirup kon torompet,

¹⁵bo tontara in Yohuda nopobaḷúdon in yandow in parang bo minayá noparang, sinongganutan i Abia. Koyogot in mosia momaḷú, ki Allah nonaḷow kon i Yerobeam bo tontara in Israel

¹⁶nodapot in noḷagui in mosia. Pinountung i Allah in intau in Yohuda kon i monia.

¹⁷Moḷoben totok in kinotungkudan inta pinoantug i Abia bo tontaranea kon intau in Israel; 500.000 in tontara monia inta mongopia in minatoi.

¹⁸Intau in Yohuda nountung, sin mosia in nopongata kon i TUHAN, Allah in mogoguyang monia.

¹⁹Kon wakutu in ki Abia nogaḷow kon tontara i Yerobeam, nogagow in sia kon tongonumai in kotá mita bo ḻipú mita kon diugneamai. Kotá mita tatua in Betel, Yesana bo Epron.

²⁰Kon tungkuḷ in ki Abia nomarenta, ki Yerobeam diádon nokopoguḻit kon kawasa nea. Imbuitnea iḻimod i TUHAN in sia.

²¹Noyoḻiu kon tua, ki Abia in kodugang-kodugangdon in kawasa nea. Sia in kobuḷoi kon mopuḷú bo opat, bo kogadí kon ḷoḷaki doyowa nopuḷú bo doyowa bo bobay in mopuḷú bo onom.

²²Ouman ibanea kon i Abia, bo bayongan in tosingogon takin oaidnea in pinaisdon kon bonu in buk Ouman i Nabi Ido.