Read Mongondow TAWARIKH 2 14 Bible Online

TAWARIKH 2 14 - Mongondow bible

TAWARIKH 2 14

¹Naonda in minatoidon in ki Datu Abia bo iḷobongdon kon poḷoḷobongan in datu mita kon Kotá i Daud, ki Asa ki adínea ḷoḷaki in nobaḻí datu nomaḷui kon inia. Kon bonu in pinomarentaan i Asa, butá in Yohuda nobiag noaman mopuḷú notaong in koonggotnea.

²Ki Asa in nokosanang kon gina i TUHAN Allahnea sin nogaid kon inta moadil bo mopia.

³Sinoko ḷumbúnea in mezbah mita in bangusa ibanea bo tampat mita pososumbaan kon berhala. Tugu mita in dewa irimumudnea, bo oigi mita in patong i Dewi Asyera inumpagnea.

⁴Intau mita in Yohuda kon kobiagan monia dinumuduibí kon onu inta kinoibog i TUHAN, Allah in moguyang monia, bo dinumudui kon totundú mita bo parenta-Nea mita.

⁵Bayongan tampat pososumbaan kon berhala bo tampat pototubáan kon dupa iḷumbúnea nongkon kotá mita in Yohuda. Dá noonowdon in dodatuan tatua kon tungkuḷ in sia nomarenta,

⁶dá notaaudon in sia noposindog poḷoḷukadan mita kon kotá mita in Yohuda. Tongonumai notaong diábí in parang sin ki TUHAN in nobogoi in kaadaan noonow kon inia.

⁷Guman i Asa kon rayat in Yohuda, “Koḻigai in kita moginropot kon kotá mita takin modinding poḻibuon bo ḷangkeangnea mita takin doman bonawang bonoboinea. Kinawasaandon naton in butá tanaa sin kita in dinumuduidon kon ibog i TUHAN Allah naton. Sia in noḷukad kon i naton bo nobogoi in kaamanan kon bayongan in butá naton.” Dá nomangkoidon in mosia noposindong bo noginḷapat kon oaidan mita tatua pia-pia mako.

⁸Tontara i Datu Asa in 300.000 in intau in Yohuda inta nomaké in kaḻeaw bo pandong, bo 280.000 in intau in Benyamin inta nomaké in kaḻeaw bo piot. Mosia in komintanbí tontara mita inta mongobarani bo nobiasadon noparang.

⁹Kon singgai tobatú intau in Sudan inta ki Zerah in tangoinea nonubu kon Yohuda takin tontaranea inta 1.000.000 bo 300 in kereta in parang. Mosia in minayá nodapot in Maresa.

¹⁰Dá iḷumuaidon in ki Asa nonayow kon i Zerah, bo taya dua in tumpaḷadon nonompia kon pipidannea-pipidannea kon Ḷopá in Zepata kon diug in Maresa.

¹¹Bo ki Asa in nosambayang kon i TUHAN Allahnea, “TUHAN, tongábí Iko in mokobantung kon inta moyangkó monayow kon inta moropot. Tuḷungaipa in kami in tanaa, o TUHAN Allah nami! Tongábí iko in andoḷan nami bo podoyon kon tangoi-Mu kami in ḷumuai moparang monayow kon tontara inta mobarong totok naa. TUHAN, Ikobí in ki Allah nami. Dikabí pomayá mako Iko taḷowon in intau tobatú.”

¹²Bo ki Asa takin tontara in Yohuda minayá nonubu kon tontara in Sudan. Ki TUHAN nonaḷow kon tontara in Sudan dá noḷaguidon in mosia.

¹³Ki Asa bo tontaranea in nondudur kon i monia nodapot in Gerar. Kon dotá in Sudan nobarong totok in minatoi dá tontara monia in diádon mokopongonu sin irimumudon i TUHAN bo tontara doman mita in Yohuda nogagowdon kon nobayong totok in pakakat monia. Onda intua tontara in Yohuda norimumud kon kotá mita kon butá mita inta kon diug in Gerar, sin ki TUHAN in nopobaḻídon kon intau mita inta kon tua inagían in ondok. Tontara in Yohuda nogagow kon bayongan in kotá tatua bo nokouḻí kon nobayong totok in pakakat.

¹⁵Mosia in nonubu doman kon pinononḷoḷaigan in intau mita inta nonombobiagon, bo nogamá kon nobayong in domba bo unta. Nopaḷut mako kon tua nobui in mosia kon Yerusalem.