Read Mongondow TAWARIKH 2 17 Bible Online

TAWARIKH 2 17 - Mongondow bible

TAWARIKH 2 17

¹Ki Yosapat nobaḻí datu in Yohuda nonoḻiu kon i Asa ki amánea, bo noginropot sin monayow kon Israel.

²Sinampatneadon in tontara kon bayongan in kotá inta dininding kon Yohuda, bo kon butá mita inta kon ḷuai in kotá kon Yohuda, bo kon kotá mita inta inagow i amánea kon butá in Epraim.

³Ki TUHAN in nomarakat kon i Yosapat sin sia in dinumudui kon aid i amánea; diá in sia nosumba kon Baal,

⁴táe tongábí moibada kon i Allah. Sia in motoindudui kon bayongan in parenta i Allah, bo kobobiagnea in diábí ná datu mita in Israel.

⁵Ki TUHAN in nobogoi kon i Yosapat in ḷoḻitúan inta moropot nobaḻí datu in Yohuda. Bayongan in rayat nobogoi in tombuinag mita kon inia bo nobaḻí in sia nooyúon poḷat doman ihoromat totok.

⁶Takin ibog moḷoben dinumudui in sia kon parenta i TUHAN bo norimumud kon bayongan in tampat pososumbaan kon berhala takin doman patong mita i Dewi Asyera kon Yohuda.

⁷Kon taong nogintoḷu kon pinomarentaannea nopotabá in sia in intaunea mita moḷoben sin motundú kon hukum mita i TUHAN kon kotá mita in Yohuda. Naa in tangoi monia: ki Benhail, ki Obaja, ki Zakharia, ki Netaneel bo ki Mikha.

⁸Mosia in inimbayongan intau in Lewi taya siow bo imang doyowa. Naa in tangoi in intau mita in Lewi tua: ki Semaya, ki Netanya, ki Zebaja, ki Asael, ki Semiramot, ki Yonatan, ki Adonia, ki Tobia, bo ki Tob-Adonia. Imang doyowa tatua in ki Elisama bo ki Yoram.

⁹Takin kodia-dia in buk In Hukum mita i TUHAN mosia in minayá kon bayongan in kotá kon Yohuda bo notundú kon rayat kon tua.

¹⁰Ki TUHAN nopobaḻí kon bayongan in dodatuan kon diugmai in Yohuda moondok in moparang monayow kon i Datu Yosapat.

¹¹Sia in notarima kon nobayong in saḷaka nongkon intau in Pilistin bo tombuinag mita ibanea, bo nongkon intau in Arab sia in notarima kon 7.700 in domba bo 7.700 in bembé.

¹²Natuata in nobaḻí, koonggot-koonggot koḷoben-koḷobendon in kawasa i Yosapat. Kon sinangkub in Yohuda noposindog in sia in dinding bo kotá mita inta pototagúan kon tongkaaḷ.

¹³Nosipun in sia kon nobayong totok in tongkaaḷ kon kotá mita tatua. Kon Yerusalem in sinampatannea doman in porwira mita inta mongotorindog,

¹⁴kon batúan monia kotaki-takin in paanannea-paanannea tontaní podudui in inanakannea. Ki Adna in tongguḷu totokan in pinonobatúan nongkon inanakan mita in Yohuda. Sia in nonongganut kon 300.000 in tontara.

¹⁵Intau nogindua in ki Yohanan; sia in nobaḻí tongguḷu kon 280.000 in tontara.

¹⁶Intau nogintoḷu in ki Amasia ki adí i Zikhri; sia in nobaḻí tongguḷu kon 200.000 in tontara (Ki Amasia naa in intau tobatú inta ibogneabí tontaní in nogundoi kon i TUHAN.)

¹⁷Tongguḷu totokan in pinonobatúan nongkon inanakan mita kon bonu in suku Benyamin in ki Elyada, tontara tobatú inta motorindog. Sia in nobaḻí tongguḷu in 200.000 in tontara inta notouḷut in piot bo kaḻeaw.

¹⁸Intau nogindua kon bonu in pinonobatúan tanaa in ki Yosabab, sia in nobaḻí tongguḷu in 180.000 in tontara inta notouḷut in sonjata monia.

¹⁹Mosia tuata inta nopobayá in oaidan monia kon Yerusalem. Koḻikud intua, ki datu in nokiḷukad doman kon pinonobatúan mita ibanea kon dinding mita kon butá in Yohuda.