Read Mongondow TAWARIKH 2 18 Bible Online

TAWARIKH 2 18 - Mongondow bible

TAWARIKH 2 18

¹Naonda in ki Yosapat datu in Yohuda nobaḻí nooyúon bo ponango-nangoiandon, pinopobuḷoinea in intau tobatú agat in motoḷuadínea kon motoḷuadí i Ahab datu in Israel.

²Tongonumai notaong noiduduimai kon tua ki Yosapat minayá nokipodungkuḷ kon i Ahab kon kotá in Samaria. Mohoromat kon i Yosapat bo paanannea, ki Ahab in nomia kon rame bo nokiratá in sapi bo domba nobayong. Kon kasampatan tatua sia in nonongganut kon i Yosapat monubu kon kotá in Ramot kon Gilead.

³Sia in noḻibó, “Moibog degá in iko mayá moyotakinku monubu kon Ramot?” Ki Yosapat in notubag, “Mopia, tontaraku in dumugangdon kon tontaramu. Moparang moyotakin in kita.

⁴Táe mopia-piabí kon munapa ḻibóon naton kon i TUHAN.”

⁵Dá ki Ahab in nosipun kon degá 400 in nabi bodongka noḻibó kon i monia, “Motaau degá in akuoi mayá monubu kon Ramot andeka diá?” “Motaau!” tubag monia. “Posarakanbí i Allah in kotá tatua kon i Tuang datu.”

⁶Táe ki Yosapat in noḻibó bui, “Degá kon naa diá in nabi ibanea inta motaau moḻibó kon i TUHAN sin kopontingan naton?”

⁷Ki Ahab in notubag, “Tobatú, ki Mikha ki adí i Yimla. Táe moyaat in ginaku kon inia, sin diábí kon dodai in onda in sia nonoḻindap kon inta mopia kon inakó; umuranbí inta diá mopia.” “Uḻe, dikabí moguman kon natua!” tubag i Yosapat.

⁸Dá ki Ahab in nogoiní kon pogawai in komaḻig tobatú bo nopotabá kon inia iḻimikat minayá nonontomu kon i Mikha.

⁹Kon dodai intua ki Ahab bo ki Yosapat, takin nogiḷambung in ḷambung datu, iḻimitú kon kadera in dodatuan kon tampat poḷoḻintogan kon gandum kon muna in bonawang in Samaria, bo nabi mita in namangoi bo nopotaau in toḻindap monia.

¹⁰Tobatú kon sigad in nabi mita tatua, inta tangoinea in ki Zedekia ki adí i Kenaana, nomia kon tungoinea mita uatoi bo noguman kon i Ahab, “Naa inta pinoguman i TUHAN, ‘Pinongin tungoi mita ná tanaa ki Tuang datu in monanut kon Siria bo morimumud kon i monia.’ ”

¹¹Bayongan in nabi ibanea notobatú bo noguman, “Tubudon in Ramot, taḷowonbí i Tuang datu. Pountungonbí i TUHAN i ki Tuang datu.”

¹²Kon dodai intua totabá inta nonontomu kon i Mikha, noguman kon i Mikha, “Bayongan in nabi inta ibanea in nonoḻindap kon kountungan kon i datu. Igumon mako ki Amá in monoḻindap kon inta mopia ná mosia.”

¹³Táe ki Mikha in notubag, “Podoyon kon i TUHAN inta nobiag, akuoi in tongábí moguman kon onu inta pinoguman i Allah kon inakó!”

¹⁴Naonda in ki Mikha noiyaput kon tayowon i Datu Ahab, ki datu in noḻibó, “Motaau degá in akuoi bo ki Datu Yosapat in mayá monubu kon Ramot andeka diá?” “Tubudon!” tubag i Mikha. “Tantú mountungbí in ki Tuang datu. Ki TUHAN in mopountungbí kon i Tuang datu.”

¹⁵Ki Ahab in notubag, “Aka iko bo mosingog podoyon kon tangoi TUHAN, yo pogumanbí inta totuu. Kotongonu degá in akuoi moguman kon inimu kon soaḷ tatua?”

¹⁶Ki Mikha in notubag, “Akuoi in nokoontong kon tontara in Israel noirarit kon buḷud mita. Mosia in naonda bo domba inta diá kogombala, bo ki TUHAN in noguman kon soaḷ mosia, ‘Intau mita tanaa in diádon koitoi. Pomayádon mako in mosia mobui takin pia-pia.’ ”

¹⁷Bo ki Ahab in noguman kon i Yosapat, “Totuubí uḻe in, gumanku? Diábí kon dodai in onda in sia nonoḻindap kon inta mopia kon inakó! Umuranbí inta diá mopia!”

¹⁸Ki Mikha in noguman bui, “Tanaa in indongogaidon onu inta pinoguman i TUHAN! Akuoi in nokoontong kon ki TUHAN in iḻimitú kon ḷoḻitúan pomomarentaan-Nea kon soroga, bo bayongan in malaekat-Nea in sinimindog kon diug-Nea.

¹⁹Ki TUHAN in noguman, ‘Ki ine in modondouḷug kon i Ahab sinbá moibog in sia mayá moparang bo matoi kon Ramot kon Gilead?’ Tubag in malaekat mita tatua in noyo-noyoposi.

²⁰Imbuitnea namangoidon in tobatú dimukud. Dinimiug in sia kon i TUHAN bo noguman, ‘Akuoibí in modondouḷug kon inia.’ ‘Naonda in podondouḷugmu?’ iḻibó i TUHAN.

²¹Dimukud tatua in notubag, ‘Mayá in akuoi bo baḻíonku in nabi mita i Ahab in monguboḷ.’ Ki TUHAN in noguman, ‘Mopia, aidaidon intua, mokodondouḷugbí in iko kon inia.’ ”

²²Noiduduimai kon tua ki Mikha in noguman, “Yo, tuata inta mobaḻí! Ki TUHAN in nopobaḻídon kon nabi mita i Tuang monguboḷ kon i Tuang datu sin ki TUHAN in nonantúdon kon mopouma in bodito kon i Tuang datu!”

²³Dá minayádon in muna in ki Nabi Zedekia dinimiug kon i Mikha bo nonokap kon pogotnea poḷat noguman, “Umpaka Roho i TUHAN nonaḷámai kon inakó bo nosingog pinongin inimu?”

²⁴Ki Mikha in notubag, “Bain indoiannea in buktinea kon dodai in iko tumuot in gopot tobatú sin mogadop!”

²⁵“Domok in sia!” parenta i Datu Ahab, “bo diá in sia kon i Amon, walikota, bo kon i Pangeran Yoas.

²⁶Pokibonudon kon i monia bonu in sia kon ponjara, bo tongá ogoiai in kaanon bo inumon tumongo piḻik modapot in akuoi mobui mangoi takin pia-pia mako.”

²⁷Guman i Mikha, “Aka ki Tuang datu mobui mangoi takin pia-pia mako, dá mangaḻenea kon tua kon ki TUHAN in diábí nosingog pinongin inakó. Komintan intau kon naa in mobaḻí sakusi.”

²⁸Onda intua ki Ahab datu in Israel bo ki Yosapat datu in Yohuda minayá nonubu kon kotá in Ramot kon Gilead.

²⁹Ki Ahab in noguman kon i Yosapat, “Akuoi in mogiḷambung in ḷambung ibanea bo dumudui moparang, táe iko umuranbí pogiḷambung in ḷambung datu.” Natuata in ki datu Israel kon dodai in minayá noparang.

³⁰Kon dodai intua itoi mita totok in tontara inta sinumakoi kon kereta in parang in Siria aindon pinarentaan i datunea kon tongábí monubu kon i datu in Israel.

³¹Dá naonda in mosia nokoontong kon i Datu Yosapat, kai monia kamai dá siabí tua in datu in Israel. Tuamai in sinubu monia in sia. Táe ki Yosapat in nomaḷú, bo sinuḷungan i TUHAN Allah in sia, bo nomurowdon kon pinonubuan tatua kon tampat ibanea.

³²Kon dodai in itoi totok in tontara in parang in Siria nonotaaudon kon tua in deemanbí datu in Israel, dá nogogaidon in mosia nonubu kon inia.

³³Noikoḷatbí in tontara in Siria tobatú nopopiot in piotnea takin diábí in pinopotanaan. Táe mata in piot tatua noitugatbí kon i Ahab bo noiḷambai kon ḷambung in parangnea kon inta pinonondoḷan. “Kinotugatan in akuoi” guman i Ahab kon intau inta nodia kon keretanea, “Pomurow bo diádon in akuoi ḷumuai nongkon pinoparangan tanaa!”

³⁴Táe popisí in parang totokpa in tumagab, ki Datu Ahab umuranpa simindog mako poḷat ginopodan kon bonu in keretanea nonayow kon tontara in Siria. Kon dodai in sinumoyopdon in mata in singgai minatoi in sia.