Read Mongondow TAWARIKH 2 21 Bible Online

TAWARIKH 2 21 - Mongondow bible

TAWARIKH 2 21

¹Ki Yosapat in minatoi bo iḷobong kon poḷoḷobongan kon Kotá i Daud. KI Yehoram ki adínea ḷoḷaki in nobaḻí datu nomaḷui kon inia.

²Ki Yehoram ki adí i Yosapat datu in Yohuda, in kogutat kon ḷoḷaki onom: ki Azarya, ki Yehiel, ki Zakharia, ki Azariahu, ki Mikhail bo ki Sepaca.

³Mosia in nokouḻí kon nobayong in buḷawan, saḷaka bo pakakat mita ibanea nongkon i amá monia, bo kon batúannea inogoian doman in kotá tobatú inta dinding kon Yohuda. Táe popisí in ki Yehoram adí ḷoḷaki inta guya-guyang, dá siadon in sinantú i Yosapat nobaḻí datu.

⁴Kon dodai in ki Yehoram nokotaaumai kon ḷoḻitúannea in noropotdon, dá pinoki ḻimodneadon in bayongan ki utatnea, bo tongonumai in intau moḷoben ibanea.

⁵Ki Yehoram in nobaḻí datu kon dodai in umur toḷu nopuḷú bodoyowá notaong, bo nomarenta in sia kon Yerusalem waḷu notaong in koonggotnea.

⁶Sia in dinumudui kon kobobiag i Datu Ahab bo datu mita in Israel ibanea, sin sia in notonibuḷoi in adí bobay tobatú i Ahab. Binaradosa in sia kon i TUHAN,

⁷táe ki TUHAN in doíbí momutú kon datu inta nongkon buí i Daud sin Sia in nodandidon kon buí i Daud in umuranbí momarenta.

⁸Kon pinomarentaan i Yehoram, Edom in nomarontak kon Yohuda bo nomia kon dodatuan tontaní.

⁹Tuamai in ki Yehoram bo takin itoi in tontaranea mita iḻumuai takin kereta mita in parangnea bo nonubu kon Edom. Kinopung in sia in tontara mita in Edom, táe nodoḷom monag mosia in dinumumpak kon kopungan in musung bo noḷagui.

¹⁰Nongkon tuadon Edom diádon sinumungkud kon Yohuda. Kon tungkuḷ doman tua kotá in Libna in nomarontak domandon. Tua mita in nobaḻí sin ki Yehoram in nonaḷámaidon kon i TUHAN, Allah inta sinumba in mogoguyangnea.

¹¹Nodapotbí in sia noposindog in tampat mita pososumbaan kon berhala kon butá in buḷud in Yohuda, bo nokopopisí kon rayat in Yohuda bo Yerusalem binaradosa kon i TUHAN.

¹²Bo ki Yehoram in nokouḻí kon surat tobatú inta pinais i Nabi Elia kon wakutu in sia nobiagpa. Nanaa in tombonu in surat tatua, “Ki TUHAN, Allah inta sinumba i Daud mohukum kon i Tuang sin ki Tuang in diá dinumudui kon aid i amá bo i aki i Tuang.

¹³Nodapotbí in ki Tuang nobiag naonda bo datu mita in Israel, bo nokopopisídon kon rayat in Yohuda bo Yerusalem diá mosatia kon i Allah. Ki Tuang in nogaid kon ná inta inaidan i Datu Ahab bo datu mita inta nomaḷui kon inia. Ki Tuang in nodapotbí in noḻimod kon i utat mita i Tuang, bokaka mosiabí in mopia-pia nongkon i Tuang.

¹⁴Hukuman inta mobogat nongkon i TUHAN in moiantugbí kon rayat, adí mita takin buḷoi mita i Tuang, bo monginggamá kon bayongan in kapunyaan i Tuang.

¹⁵Ki Tuang tontaní in kotugatanbí in takit in kompong inta muḷoi in singgai kodugang-kodugangdon in kobogatnea!”

¹⁶Kon dodai intua oyúon in intau in Pilistin bo intau in Arab inta nogutun kon diug in pogogutunan in intau in Sudan kon diug in pintad. Ki TUHAN in nopogonú kon gina in intau mita tatua sin monubu kon i Yehoram.

¹⁷Mosia in nonubu kon Yohuda, bo nogagow kon komaḻig in datu, bo nodia kon bayongan adí bo buḷoi i Yehoram saḷaku intau mita inta dinakop kon parang koḻikudbí in ki Ahazia ki adínea inta muit.

¹⁸Naonda in bayongan inta nobaḻí tatua, ki TUHAN in nohukum kon i Yehoram pinongin takit in kompong inta diábí mopia.

¹⁹Gogió bo doyowa notaong in takit tatua bo kodugang-kodugangdon in roriganea nodapot in minatoi in sia. Rayatnea in diábí nopoyongkit in tuḷú moḷoben nobaḻí tomponuot kon dumudui nonogumatoi ná biasamai aidan monia kon mogoguyang monia.

²⁰Diábí tobatúmai in nomanasaḷ in kinopatoiannea. Iḷobong in sia kon Kotá i Daud, táe deemanbí kon bonu in poḷoḷobongan in datu mita. Kon dodai in nobaḻí datu ki Yehoram in umur toḷu nopuḷú bodoyowá notaong, bo nomarenta in sia kon Yerusalem waḷu notaong in koonggotnea.