Read Mongondow TAWARIKH 2 22 Bible Online

TAWARIKH 2 22 - Mongondow bible

TAWARIKH 2 22

¹Kon pinonubuan tobatú in topaanan in intau in Arab, komintan ki adí ḷoḷaki i Yehoram kinoḻimodan, koḻikudbí in ki Ahazia. Tuamai in intau in Yerusalem noduí kon i Ahazia nobaḻí datu nonoḻiu kon i amánea.

²Ki Ahazia in nobaḻí datu kon dodai in umur doyowa nopuḷú bo doyowa notaong, [11] bo sia in nomarenta kon Yerusalem totaong in koonggotnea. Ki Ahazia in nobiag doman naonda bo motoḷuadí i Datu Ahab, sin ki Atalya ki inánea in nononggina kon inia sinbá mogaid kon inta moraat. Ki Atalya in ki adí bobay i Datu Ahab, ki ompu i Omri datu in Israel.

⁴Ki Ahazia in binaradosa kon i TUHAN naonda bo motoḷuadí i Ahab, sin mosia tua in nobaḻí mononongginanea naonda in ki amánea minatoi. Monononggina mita tatuata inta nokobodito kon inia.

⁵Podudui in tonggina monia, sia in dinumugang kon i Yoram datu in Israel sinbá moparang moḷawang kon i Hazael datu in Siria. Mosia in noparang kon Ramot, butá in Gilead. Ki Yoram in pinaḻían kon pinoparangan tatua,

⁶bo nobui in sia kon kotá in Yizreel sin undaman, bo ki Ahazia in minayá noḷongow kon inia kon tua.

⁷Ki Allah in nonantúdon kon ki Ahazia in matoibí kon dodai in sia mokipodungkuḷ kon i Yoram. Kon pinoyodungkuḷan tatua ki Ahazia bo ki Yoram in sinayowan in intau tobatú inta ki Yehu in tangoinea ki adí i Nimsi, inta ain piniḻí i TUHAN moyompat kon motoḷuadí i Datu Ahab.

⁸Koyogot in ki Yehu nopobayá in hukuman i TUHAN kon motoḷuadí tatua, noyodungkuḷ in sia in topaanan i intau mita moḷoben in Yohuda bo pokuadíon mita i Ahazia inta dinumudui kon pinoyodungkuḷan tatua. Dá ki Yehu in noḻimod kon i monia komintan.

⁹Onda intua nopotabá in sia kon intau notayak kon i Ahazia inta kon dodai intua nogadop kon Samaria. Naonda in nouḻídon in ki Ahazia, dinia in sia kon i Yehu bo iḻimod. Umpaka natua táe iḷobongbí doman monia in sia sin mohoromat in mosia kon i Datu Yosapat, ki akinea inta nogundoi kon i TUHAN takin ḻimbatú in gina. Nongkon motoḷuadí i Ahazia diábí in mokotongod mogamá kon ḷoḻitúan in pomarentaan.

¹⁰Kon tungkuḷ in kinotaauandon i Atalya kon ki Datu Ahazia ki adínea in minatoidon, nomarenta in sia sinbá bayongan in motoḷuadí i datu kon Yohuda in ḻimodon.

¹¹Ki Ahazia in kogutat kon bobay tobatú tangoinea in ki Yoseba inta notonibuḷoi takin in imang tobatú inta ki Yoyada in tangoinea. Takin inumuni-uni mako in ki Yoseba nogamá kon adí ḷoḷaki tobatú i Ahazia inta ki Yoas in tangoinea nongkon sigad in adí mita i datu inta pinoki ḻimod i Atalya. Adí tatua takin moḷoḷukadnea in binuninea kon gopot tobatú kon Baḷoi TUHAN. Tuata in inaidan i Yoseba sin moposaḷamat kon adí tatua dá diá iḻimod i Atalya.

¹²Onom notaong koonggotnea in pinobunian kon i Yoas kon Baḷoi TUHAN, bo ki Atalya in nomarenta nobaḻí datu.