Read Mongondow TAWARIKH 2 27 Bible Online

TAWARIKH 2 27 - Mongondow bible

TAWARIKH 2 27

¹Ki Yotam in nobaḻí datu kon dodai in umur doyowa nopuḷú bo ḻima notaong, bo sia in nomarenta kon Yerusalem mopuḷú bo onom notaong in koonggotnea. Ki inánea in ki Yerusa ki adí i Zadok.

²Ki Yotam in nokosanang kon gina i TUHAN, ná ki Uzia ki amánea. Tongá sia in diábí notubá kon dupa[12] kon Baḷoi TUHAN, ná inta inaidan i amánea. Umpaka natua, rayat in umuranbí doman nogaid kon dosa.

³Ki Yotambí inta noposindog in Bonawang Utuan kon Baḷoi TUHAN, bo noginrigon kon dinding in Yerusalem kon butá inta sinangoian Opel.

⁴Sia in noposindog in kotá mita kon buḷud in Yohuda bo dinding mita takin ḷangkeang mita kon kayuon mita.

⁵Sia in nomarang bo nonaḷow kon i datu in Amon takin tontaranea, bo nomakisa kon in intau in Amon moguboḻi kon iba. Pomuḷoi in taong, toḷu notaong noyodudui in koonggotnea mosia in mustibí mopoguboḻi in 3.400 nokilo in saḷaka, doyowa norupa in gandum, tumongoribu noton.

⁶Kodugang-kodugang in kawasa i Yotam sin mosatia in sia bo motoindudui kon i TUHAN Allahnea.

⁷Onu mita inta nobaḻí ibanea kon bonu in pinomarentaan i Yotam, pinoparangan mita bo siasatnea mita, komintandon pinais kon bonu in buk Ouman in Datu mita in Israel bo Yohuda.

⁸Ki Yotam in umur doyowa nopuḷú boḻima notaong kon dodai in sia nobaḻí datu, bo nomarenta kon Yerusalem mopuḷú bo onom notaong in koonggotnea.

⁹Sia in minatoi bo iḷobong kon Kotá i Daud, bo ki Ahas ki adínea ḷoḷaki in nobaḻí datu nomaḷui kon inia.