Read Mongondow TAWARIKH 2 32 Bible Online

TAWARIKH 2 32 - Mongondow bible

TAWARIKH 2 32

¹Naonda in ki Datu Hizkia nogaid kon soaḷ mita inta noponiata kon kotoinduduinea kon i TUHAN, ki Sanherib datu in Asyur nonubu kon Yohuda. Nongopung in sia kon kotá mita inta dininding bo nomarenta kon tontaranea sinbá mogagow.

²Onda in kinotaauan i Hizkia kon ki Sanherib noniatdon monubu kon Yerusalem,

³sia takin pogawai mita bo porwiranea mita nonantúdon kon modimpot kon tampat mita in tubig kon ḷuai in kotá takin makusud sinbá intau mita in Asyur in diá mokouḻí kon tubig aka modapotdon in mosia kon diug in Yerusalem. Nobayong totok in intau pinotabá nodimpot kon bayongan in bobayáan tubig inta moiḻig ḷumuai in kotá.

⁵Bo ki datu in noginropot kon poḷoḷukadan in kotá pinongin nonompia kon dindingnea, noposindog in ḷangkeang mita kon tudunea bo noposindog in dinding ibanea kon ḷuai. Koḻikud intua nonompia doman in sia kon dinding inta pinosindognea kon tudu in butá inta pinomumbun kon dotá in pomukaan kon dotá in Yerusalem koyongan. Nopotabá doman in sia nokiaid in nobayong totok in pandong bo kaḻeaw.

⁶Noduí in sia kon porwira mita sin mobaḻí tongguḷu kon bayongan in ḷoḷaki kon bonu in kotá, bo nopotabá kon i monia noyosipun kon lapangan kon tayowon in bonawang in kotá. Bo noguman in sia kon i monia,

⁷“Korigon in gina bo mokopoyakin; dikabí moondok kon i datu in Asyur andeka kon tontaranea. Kitabí in moropo-ropot in mosia.

⁸Kon inia in ropot in intau, táe kon inaton in ropot i TUHAN Allah naton inta motuḷung bo moparang kon kopontingan naton.” Nokodongogmai kon tosingogon mita in datu monia tatua, rayat inangoian in barani.

⁹Diá noonggot nongkon tua naonda in ki Datu Sanherib takin tontaranea kon Lakhispa, nopotabá in sia in totabá namangoi kon i Hizkia bo rayat in Yohuda kon Yerusalem sin mopotaau in koyow tanaa,

¹⁰“Akuoi ki Sanherib datu in Asyur, moibog moḻibó nongonu sin mobaranibí totok in moiko in tantú mogutun kon Yerusalem inta koyogotdon in kinopung tatua.

¹¹Degá ki Hizkia in noguman kon ki TUHAN Allahmu in mopoḷuat kon i monimu nongkon kawasa nami? Dika mopirisaya, sin tongábí in sia monguboḷ kon i monimu. Sia in mopomayábí mako kon i monimu matoi in gogoy bo rogang.

¹²Siabí tua inta ain norimumud kon tampat mita pooibadaan bo mezbah mita kon i TUHAN, bodongka nopotabá kon intau in Yohuda bo Yerusalem noibada poḷat notubá kon dupa tongá kon mezbah tobatú.

¹³Degá diábí kinotaauan monimu onu inta ain inaidanku bo in mogoguyangku kon bangusa mita ibanea? Diápabí kon dodai onda in dewa mita in bangusa ibanea nopoḷuat kon bangusanea nongkon kawasa in datu in Asyur!

¹⁴Ki ine in nongkon sigad monia in nokoimontandon nogaid kon natua? Diábí doman in dewamu in mokoposaḷamat kon i monimu!

¹⁵Dikabí pomayá mako in datumu tatua mongakaḷ bo monguboḷ kon i monimu! Dika mopirisaya kon inia! Sin diábí kon dodai onda in dewa in bangusa taondaka in mokomampu mopoḷuat in bangusanea nongkon kawasa in datu in Asyur. Notantú bidon kon dewamu tua in diábí doman mokopoḷuat kon i monimu!”

¹⁶Nobayongpa doman in tosingogon ibanea in siningog in totabá mita in Asyur tatua sin moningkuḻe kon i TUHAN Allah bo kon i Hizkia, mogogundoi i TUHAN tua.

¹⁷Ki datu in Asyur in nomais doman kon surat inta moḷawang kon i TUHAN, Allah inta sinumba in intau Israel. Nanaa in tombonu in surat tatua, “Dewa mita in bayongan in bangusa ibanea diábí mokopoḷuat kon bangusanea nongkon kawasa ku, natuabí doman in dewa i Hizkia tua diábí doman mokopoḷuat kon bangusanea nongkon kawasa ku.”

¹⁸Totabá mita in Asyur tatua nopobaḷú in bayongan tua kon bonu in singog in Ibrani sin mopogogondok bo monginggamá kon barani in intau mita in Yerusalem inta kon tudu in dinding kotá, sinbá koagowan monia in kotá tatua takin diá moyoyiga.

¹⁹Mosia in mongonguman kon i Allah inta sinumba kon Yerusalem notongkai ná doman dewa mita in bangusa ibanea, inta patong mita inta pinomia in intau.

²⁰Dá nosambayangdon in ki Datu Hizkia bo ki Nabi Yesaya ki adí i Amos. Mosia in nomaḷú noigum in totuḷung kon i Allah.

²¹Bo ki TUHAN in nopotabá mangoi in malaekat inta noḻimod kon tontara mita bo porwira mita in Asyur tatua. Sidia in oyá totok nobuidon in ki datu Asyur kon butánea. Kon singgai tobatú kon dodai in sia kon bonu in baḷoi in dewanea, tongonumai nongkon i adínea mita in namangoi nonibat in pitow kon inia.

²²Natuata in pinototuḷung i TUHAN nopoḷuat kon i Hizkia bo intau mita in Yerusalem nongkon kawasa i Sanherib datu in Asyur, bo nongkon musung mita monia ibanea. Ki TUHAN in nobogoi kon i monia in kobiagan inta moaman takin diá tuyayowon in bangusa mita kon diugmai monia.

²³Nobayong in intau in namangoi in Yerusalem modia kon sosumba kon i TUHAN bo tombuinag mita kon i Hizkia, dá nongkon dodaidon intua sia ihoromat in bayongan bangusa.

²⁴Kon dodai intua ki Datu Hizkia in notakit. Takitnea tatua in moyoyigadon totok nodapot in sia gogiódon matoi. Sia in nosambayang, bo ki TUHAN in nobogoi in tomponuot kon inia kon sia in mopiabí.

²⁵Táe popisí in sia mokaḷakuang, sia in diábí nopoyaput in sukur kon kinopiaan in takitnea inta inogoi i TUHAN kon inia. Tuamai in ki TUHAN sinumorú kon i Yohuda bo kon Yerusalem.

²⁶Táe imbuitnea ki Hizkia bo intau mita in Yerusalem sinumonsiupdon, dá kon bonu in ki Hizkia nobiagpa yo hukuman tatua in diábí pinopouma.

²⁷Ki Datu Hizkia in nobaḻídon nooyúon totok, bo ihoromat in bayongan intau. Nogaid in sia kon gopot mita sin potagúan kon kapunyaannea tuata: buḷawan, saḷaka, batu mita permata, pododungú mita, kaḻeaw bo pakakat mita inta koboḻi ibanea.

²⁸Oyúon doman in ontagnea mita sin potagúan kon bungai mita in boyó ná umpamanea: gandum, anggur, bo ḷana in zaitun; bo ḷantung doman sin pomiagan kon sapi mita bo dombanea mita inta nobayong totok.

²⁹Koḻikud intua noposindog doman in sia kon nobayong in kotá. Kaoyúonan inta inogoi i Allah kon inia noiḻiudon in kobayongnea.

³⁰Ki Datu Hizkia tuata inta nodimpot kon bokaká in tubig in Gihon, bo pinobayá pinongin daḷan in tubig kon ḻimonag in butá pinobayá in kotá in Yerusalem. Bayongan inta inaidan i Hizkia noḷapatbí.

³¹Bo kon tungkuḷ in totabá mita inta nongkon Babel namangoi sin moḻibó kon inia kon kinopopia in takitnea inta mokoherang, ki TUHAN nopomayá kon i Hizkia nogaid tontaní, sinbá motaau monungkuḷ kon ginanea.

³²Ouman ibanea kon i Datu Hizkia, bo tabinea kon i TUHAN in pinais kon bonu in buk Wahyu nongkon i Allah kon i Nabi Yesaya ki adí i Amos, bo kon bonu in buk Ouman in Datu mita in Yohuda bo Israel.

³³Ki Hizkia in minatoi, bo iḷobong kon potakodan kon butá inta poḷoḷobongan kon datu mita. Bayongan in rayat in Yohuda bo Yerusalem nohoromat totok kon inia kon tungkuḷ in sia minatoi. Ki Manasye ki adínea ḷoḷaki in nobaḻí datu nomaḷui kon inia.