Read Mongondow TAWARIKH 2 33 Bible Online

TAWARIKH 2 33 - Mongondow bible

TAWARIKH 2 33

¹Ki Manasye in umur mopuḷú bo doyowa notaong kon dodai in sia nobaḻí datu in Yohuda bo nomarenta in sia kon Yerusalem ḻima nopuḷú bo ḻima notaong in koonggotnea.

²Sia in binaradosa kon i TUHAN, popisí in dinumudui kon kabiasaan mita inta moraat in bangusa mita inta pinoguntun i TUHAN nongkon Kanaan kon tungkuḷ in intau in Israel sinumuot in butá tatua.

³Tampat mita pososumbaan kon berhala inta ain irumbun i Hizkia, ki amánea, pinosindognea bui. Sia in noposindog in mezbah mita sin poibadaan kon i Baal, bo nogaid in sia kon patong mita i Dewi Asyera, bo poḷat nosumba kon tundi mita.

⁴Ki TUHAN ain noguman kon modapot in mononoi Yerusalem in mobaḻíbí tampat pooibadaan kon i-Nia, táe kon tua kon Baḷoi TUHAN tatua, ki Manasye in noposindogdon in mezbah mita kon dewa mita.

⁵Kon posiḷosi in palas in Baḷoi TUHAN tatua noposindog in sia in mezbah mita sin posumbaan kon tundi mita.

⁶Ki adínea mita pinosumbanea nobaḻí kuruban payongon kon Ḷopá in Hinom. Sia in dinumudui doman nogaid kon pongonggaing, mopirisaya kon tundi mita, totaau, bo nopoigum in totundú mita kon dimukud mita. Totok in sia binaradosa kon i TUHAN dá nokopomuká kon torú i TUHAN.

⁷Patong in berhala inukatnea kon bonu in Baḷoi TUHAN, bokaka tampat tatua in pinoguman bidon i Allah kon i Daud bo kon i Salomo ki adínea ḷoḷaki, “Baḷoi-Ku kon Yerusalem naa, inta ain piniḻí-Ku nongkon sigad in mopuḷú bodoyowá in butá in suku Israel, in tampat inta ain sinantú-Ku nobaḻí tampat pooibadaan kon i-nakó modapot in mononoi.

⁸Aka umat in Israel motoindudui kon bayongan in parenta-Ku bo dumududui kon hukum mita inta inogoi i Musa mogogundoi-Ku kon i monia, dá Akuoi in diábí mopomayá mako kon i monia poguntunon nongkon butá inta ain inogoi-Ku kon mogoguyang monia.”

⁹Ki Manasye nokopopisí kon rayat in Yohuda nogaid kon dosa mita inta moraa-raat nongkon dosa inta inaidan in bangusa mita inta pinoguntun i TUHAN nongkon Kanaan kon tungkuḷ in umat i TUHAN sinumuot kon butá tatua.

¹⁰Ki TUHAN nonoboḷow kon i Manasye bo rayatnea, táe mosia in doíbí mokidongog.

¹¹Tuamai ki TUHAN in nopoangoi in tongguḷu totokanea in tontara in Asyur sin monubu kon Yohuda. Ki Manasye in dinomok in kokarit, bo inumantungan bo dinia pinobayá in Babel.

¹²Kon bonu in roriganea tatua sinumonsiup in sia kon i TUHAN Allahnea, bo nosambayang nopoigum in totuḷung-Nea.

¹³Ki Allah in nokidongog bo nogaid kon onu in pinoigum i Manasye bo nopobui kon inia minayá in Yerusalem sin momarenta bui. Popisí in onu inta nobaḻí tatua ki Manasye in noyakindon kon ki TUHAN in ki Allahbí.

¹⁴Onda intua ki Manasye in noginḷantud kon dinding in ḷuai inta kon dotá in pomukaan kon Kotá i Daud. Pinangkoinea nongkon tampat tobatú kon ḷopá kon diug in bokaká in Gihon bo minayá ná utuan nodapot in Bonawang Toyá bo dotá in kotá inta sinangoi Opel. Kon batúan in kotá inta dininding kon Yohuda, sinampatnea doman in tobatú tongguḷu totokan in tontara.

¹⁵Iḷumbúnea in patong mita in dewa in bangusa mita ibanea bo berhala mita inta ain inukatnea kon Baḷoi TUHAN. Kinokainea in mezbah mita in berhala inta kon buḷud kon Baḷoi TUHAN, bo kon tampat mita ibanea kon Yerusalem. Tua komintan in dinianea kon ḷuai in kotá bo iḷumbú.

¹⁶Onda intua sinompianea in mezbah tampat pooibadaan kon i TUHAN bo noposumba kon tua in kuruban dodamean bo kuruban sukur. Bayongan intau in Yohuda pinoki ibadaannea kon i TUHAN Allah in Israel.

¹⁷Rayat in umuranpabí doman moposumba in kuruban kon tampat mita pososumbaan ibanea, táe pinosumbaan tatua in kon i TUHANbí.

¹⁸Ouman ibanea kon i Manasye, bo sambayangnea kon i Allah, bo koyow mita i Allah inta pinoyaput kon inia in nabi mita pinodoyon kon tangoi TUHAN, Allah in Israel, komintandon pinais kon bonu in buk Ouman in datu mita in Israel.

¹⁹Kon bonu in buk Ouman in Nabi mita pinais domandon in sambayang i Manasye bo tubag i Allah kon sambayang tatua, bo ouman in dosanea mita kon dodai in sia diápa nogogai in nogaid kon dosa, tampat mita pososumbaan kon berhala bo patong mita i Dewi Asyera inta pinomianea, bo berhala mita inta sinumbanea.

²⁰Ki Manasye in minatoi bo iḷobong kon komaḻig. Ki Amon ki adínea ḷoḷaki in nobaḻí datu nonoḻiu kon inia.

²¹Ki Amon umur doyowa nopuḷú bodoyowá notaong kon dodai in sia nobaḻí datu in Yohuda bo nomarenta in sia kon Yerusalem doyowa notaong in koonggotnea.

²²Naonda bo ki amánea sia in binaradosa doman kon i TUHAN. Sia in nosumba kon berhala mita inta sinumba i amánea bo noposumba in kuruban kon berhala mita tatua.

²³Táe noyoposi i amánea, ki Amon in diábí sinumonsiup bo diá doman nobui mangoi kon i TUHAN; nodapotbí in sia in binara-baradosa nongkon i amánea.

²⁴Pogawai mita i Datu Amon noyopopog noḷawang kon inia bo poḷat noḻimod kon inia kon komaḻig.

²⁵Táe rayat in Yohuda noḻimod kon intau mita inta noḻimod kon i Datu Amon tatua, bo noduí kon i Yosia ki adínea nobaḻí datu.