Read Mongondow TAWARIKH 2 6 Bible Online

TAWARIKH 2 6 - Mongondow bible

TAWARIKH 2 6

¹Ki Datu Salomo in nosambayang, “Oo TUHAN, Iko in moibo-ibogbí mogutun kon sindip in goḷom.

²Tanaa in pinosindogkudon kon ini-Mu in Baḷoi inta mogaga, sin pogutunan-Mu mononoi.”

³Nopaḷut mako nosambayang, ki datu in inimindoidon kon bayongan in rayat inta sinimindog mako kon tua, bo pinoigumannea kon barakat i Allah in mosia.

⁴Sia in noguman, “Dungkuḷmai ki TUHAN in nodandidon kon i amáku ki Daud nanaa, ‘Pinangkoipamai kon Akuoi nodia kon umat-Ku iḻumuai kon Mesir noidapot kon singgai naa, kon butá in Israel diábí in tobatúmai in kotá in piniḻí-Ku nobaḻí tampat inta musti poposindogan in baḷoi sin tampat poibadaan kon i-Nakó, bo diábí tobatúmai in piniḻí-Ku sin mobaḻí itoi in umat-Ku Israel. Táe tanaa in piniḻí-Kudon in Yerusalem nobaḻí tampat pooibadaan kon i-Nakó. Bo iko, Daud, piniḻí-Kudon sin momarenta kon umat-Ku.’ Dinayo dayowdon in ki TUHAN Allah in Israel inta ain nogintompod kon dandi-Nea tatua.!”

⁵

⁶

⁷Noiduduimai kon tua ki Salomo in noguman, “Ki amáku ki Daud ain nonomayá moposindog in baḷoi pooibadaan kon i TUHAN Allah in Israel.

⁸Táe ki TUHAN in noguman kon inia, ‘Makusudmu tua in mopiabí.

⁹Táe, deemanbí iko, táe ki adímubí in moposindog in baḷoi-Ku tua.’

¹⁰Tanaaya ki TUHAN in nogintompodon kon dandi-Nea. Akuoi in nobaḻídon datu in Israel nomaḷui kon i amáku, bo akuoi in noposindogdon doman in baḷoi pooibadaan kon i TUHAN, Allah in Israel.

¹¹Kon bonu in Baḷoi TUHAN tatua in sinadiakudon in tampat potagúan kon Poti Dodandian inta pinobonuan kon batu dodandian i TUHAN bo in intau in Israel.”

¹²Ki Salomo in nogaidon kon panggung bitú kon yua-yuak in palas in Baḷoi TUHAN. Kobanatnea bo kooḷadnea in 220 nosenti, bo koḷantudnea in 130 nosenti. Kon tayowon in rayat inta kon tua, ki Salomo in noponik kon panggung tatua bo sinimindog sinumayow kon mezbah. Bayongan in intau mokoontongbí kon inia. Onda intua sinumungkud in sia bo notonggó kon ḻimanea doyowa nosimpaḷ bo sinonggónea pinotayownea kon ḷangit bo nosambayang,

¹³

¹⁴“TUHAN, Allah in Israel! Kon ḷangit andeka kon butá diábí in ná Iko! Iko in nogintompod kon dandi-Mu bo nopoontong in tabi-Mu kon umat-Mu inta mosatia bo motoindudui takin ḻimbatú in gina kon ini-Mu.

¹⁵Iko in nogintompodon kon dandi-Mu kon i amáku ki Daud. Onu in pinodandi-Mu tua inaidan-Mudon singgai in naa.

¹⁶Iko in nodandi domandon kon i amáku kon aka buínea in totu-totuu motoindudui kon hukum-Mu ná sia, dá mononoibí in intau tobatú nongkon buínea in momarenta mobaḻí datu in Israel. Tanaa, o TUHAN Allah in Israel, intompodaidon doman in bayongan inta ain pinodandi-Mu kon i amáku ki Daud, mogogundoi-Mu tua.

¹⁷

¹⁸Táe, o Allah totuu moibog degá in Iko in mogutun kon dunia naa kon sigad in intau, umpakabí modait in ḷangit yo diábí tugatan kon ini-Mu, apa doman baḷoi ibada inta pinosindogku tanaa!

¹⁹Oo TUHAN, Allahku, akuoi in mogogundoi-Mu! Tongá indongogaipa kaasí in sambayangku, bo aidaipa in oigumku.

²⁰Igumon mako doḷom singgai Iko in moḷukad kon baḷoi tanaa inta ain piniḻí-Mu nobaḻí pooibadaan kon ini-Mu. Igumon mako nongkon tampat-mu kon soroga Iko mokidongog bo mongampung kon inakó bo intau in Israel, umat-Mu tua, aka kami in tumayow kon baḷoi tanaa bo mosambayang kon ini-Mu.

²¹

²²Aka intau tobatú pinoponapudan kon kotaḷá kon intau ibanea bo dinia kon mezbah-Mu kon bonu in baḷoi-Mu tanaa sin mongibot kon sia in diá kotaḷá,

²³o TUHAN, indongogaipa kaasí nongkon soroga bo momaḷut kon pelekara mita in bobantung-Mu mita tanaa. Hukumdon in inta kotaḷá bo poḷuatdon in inta diá kotaḷá.

²⁴Aka umat-Mu Israel taḷowon in musungnea mita popisí in binaradosa in mosia bo nomanasaḷ bo mohoromat bui kon ini-Mu saḷaku TUHAN, bo onda intua bui mamangoi kon baḷoi-Mu tanaa bo mosambayang mopoigum in ampung kon ini-Mu,

²⁵igumon mako indongogan-Mupa kaasí kon soroga. Igumon mako ampungan-Mu in dosa in umat-Mu tanaa, bo modia bui kon i monia mayá in butá inta ain inogoi-Mu kon i monia bo kon mogoguyang monia.

²⁶Aka umat-Mu baradosaan kon ini-Mu bo hukumon-Mu in mosia pongin diá mopoangoi in uyan, bo mogogaidon in mosia in mogaid kon dosa monia bo mohoromat kon ini-Mu saḷaku TUHAN, onda intua tumayow kon baḷoi-Mu tanaa bo mosambayang kon ini-Mu,

²⁷o TUHAN kon soroga, indongogaipa kaasí in mosia bo ampungaipa in dosa in bobantung-Mu mita umat in Israel. Tundúdon in mosia mogaid kon onu in moitutui. Mopaḷut mako kon tua TUHAN, o TUHAN, popoangoidon in uyan kon butá-Mu, butá inta ain inogoi-Mu kon umat-Mu sin mobaḻí kapunyaannea mononoi.

²⁸Aka butá tanaa bo koantugan in malarat in gogoy andeka yampoi andeka pinomuḷa mita pinoguyaat in tompot mopatú, mahaḷuk andeka pangkoḷá andeka aka umat-Mu sinubu in musung, andeka sinugatan in takit,

²⁹igumon mako indongogan-Mupa kaasí in sambayang monia. Aka kon sigad in umat-Mu Israel oyúon in mokuyang in gina bo mosambayang kon ini-Mu poḷat mopotonggó in ḻimanea potayow kon Baḷoi-Mu tanaa,

³⁰yo igumon mako Iko nongkon tampat pinogutunan-Mu kon soroga moibogpa kaasí mokidongog bo mongampung kon i monia. Tongábí Iko in monotaau kon bonu in gina in intau. Tuamai in popoaidon kon intau podudui kon aid mita monia,

³¹sinbá umat-Mu umuran motoguondok bo motoindudui kon ini-Mu kon bonu in mosia mogutun kon butá inta inogoi-Mu kon mogoguyang nami.

³²Aka intau ango-angoi nongkon butá inta moyayú mokodongog kon kamuliaan bo kawasa-Mu, bo Iko in umuranbí moibog motuḷung, bo mamangoi in sia kon Baḷoi-Mu sin mosambayang kon ini-Mu,

³³igumon mako nongkon tampat pinogutunan-Mu kon soroga moibogpa kaasí in Iko mokidongog bo mobogoi kon onu inta pinoigumnea. Pongin natua dá bayongan in bangusa kon dunia in monotaaudon kon ini-Mu bo motoindudui domandon kon ini-Mu ná umat-Mu Israel. Kotaauandon monia kon baḷoibí inta pinosindogku tanaa in tampat pooibadaan kon ini-Mu.

³⁴Aka Iko mopotabá kon umat-Mu mayá moparang monayow kon musung, bo kon ondaka in mosia, táe tumayow kon kotá inta piniḻí-Mu tanaa bo mosambayang tumayow kon baḷoi tanaa inta ain pinosindogku kon ini-Mu,

³⁵yo igumon mako kon soroga in Iko mokidongogpa kon sambayang monia tua, bo mopountung kon i monia.

³⁶Aka umat-Mu binaradosadon kon ini-Mu — totuubí kon diábí in tobatúmai in intau kon dunia naa in diá binaradosa — bo popisí in torú-Mu binió-Mudon mako in mosia sinaḷow in musung bo dinia nobaḻí intau inta dinakop pinobayá in butá inta moyayú andeka nodiug,

³⁷igumon mako indongogan-Mupa kaasí in sambayang monia. Aka kon butá tatua bo monaḷámai in mosia kon dosa mita monia, bo mosambayang kon ini-Mu poḷat mongaku kon mosia in aindon binaradosa bo nogaidon kon inta moraat, indongogaipa kaasí in sambayang monia, o TUHAN.

³⁸Aka kon butá tatua bo mosia takin ibogbí monia tontaní bo totu-totuudon monaḷámai kon dosa mita monia, bo mosambayang kon ini-Mu tumayow kon butá tanaa inta inogoi-Mu kon mogoguyang nami, tumayow kon kotá inta ain piniḻí-Mu bo baḷoi pooibadaan inta ain pinosindogku kon ini-Mu tanaa,

³⁹dá nongkon pinogutunan-Mu kon soroga igumon mako indongogan-Mupa kaasí in sambayang monia bo monotabi kon i monia. Ampungaidon kaasí in bayongan in dosa in umat-Mu.

⁴⁰Tanaa, o Allahku, indoiaipa in kami bo indongogaipa doman kaasí in sambayang mita inta pinoyaput nami nongkon tampat tanaa.

⁴¹Sindogpa kaasí in tanaa mako, o TUHAN Allah! Bo moyotakin in Poti Dodandian inta nobaḻí tomponuot kon kawasa-Mu intua dá igumon mako tumuotdon in Iko kon Baḷoi-Mu tanaa bo mogutun kon naa moidapot in mononoi. Barakataipa in bayongan in oaidan in imang-Mu mita, bo poigumon mako bayongan in umat-Mu moḷunganga in gina popisí in Iko in mopia kon i monia.

⁴²TUHAN Allah, dikapa indoíon-Mu in datu inta ain piniḻí-Mu tanaa. Toropdon in tabi-Mu kon i Daud mogogundoi-Mu.”