Read Mongondow TAWARIKH 2 8 Bible Online

TAWARIKH 2 8 - Mongondow bible

TAWARIKH 2 8

¹Ki Salomo noposindog in Baḷoi TUHAN bo komaḻig in datu 20 notaong in koonggotnea.

²Kotá mita inta inogoi i Datu Hiram kon inia in buínea pinosindog, bo pinoki pogutunannea kon tua in intau in Israel.

³Inagownea in butá in Hamat bo Zoba

⁴bo noginropot kon kotá in Tadmor kon padang gurun, bo noposindog bui in bayongan pototagúan kon tongkaaḷ kon Hamat.

⁵Kotá in Bet-Horon-Ḻimonik bo Bet-Horon-Ḻimonag pinosindognea bui nobaḻí kotá inta oyúon in poḷoḷukadan takin pinogaidan kon bonawang inta pinakéan in bonoboi in ḷoḻingkop.

⁶Bo pinosindognea doman bui in kotá in Baalat, bo bayongan in kotá inta pototagúan kon tongkaaḷ, bo kotá mita doman inta pototagúan kon kereta mita in parang takin kabaḷonea. Bayongan in tomayá moposindog intua in kon Yerusalem, Libanon bo bayongan in butá kawasa nea in ain inaidannea.

⁷Bayongan in buí in bangusa in Kanaan inta diá motaau ḻimodon komintan in intau in Israel kon dodai in iḻimitú kon butá tatua, pinoki aidan i Salomo nobaḻí ata. Mosia tua in intau in Het, Amori, Peris, Hewi bo Yebus. Umaai in tanaa mosia tua in umuranpa doman ata.

⁹Intau in Israel diábí pinakisa in nogaid; mosia in binaḻí tontara, itoi in tontara, tongganut in kereta in parang, bo tontara in parang inta sinumakoi kon kabaḷo.

¹⁰Doyowa nogatut bo ḻima nopuḷú in intau inogoian in oaidan moindoi kon oaidan in intau mita inta nobaḻí ata kon bayongan in oaidan mogaid kon baḷoi.

¹¹Pinampingdon i Salomo in ki buḷoinea inta ki adí bobay i datu in Mesir, nongkon kotá i Daud pinobayá in baḷoi inta pinosindog kon inia. Sin ki Salomo in norai, “Ki buḷoiku in diábí motaau in mogutun kon komaḻig i Daud, datu in Israel, sin bayongan in tampat inta nokoimontandon pinotagúan kon Poti Dodandian in tampatbí inta motusi.”

¹²Ki Salomo in noposumba in kuruban payongon kon i TUHAN kon tudu in mezbah inta pinosindognea kon tayowon in Baḷoi TUHAN.

¹³Kuruban mita tatua in pinosumbanea podudui in hukum i Musa inta kon muḷoi in singgai moḷoben: Singgai moḷoben Sabat, Singgai moḷoben Buḷan Mobagu, bo toḷu in singgai moḷoben taongan, inta singgai moḷoben Roti Diá Iragian, singgai moḷoben Posipunan kon bungai in boyó, bo singgai moḷoben in Ḷuḷung in Daun.

¹⁴Podudui kon atorang mita i Daud ki amánea, ki Salomo in nonantú kon oaidan pomuḷoi in singgai in imang mita bo intau mita in Lewi inta musti mopodondong in dondong dodayow kon i TUHAN bo mobantung kon imang mita mopobayá in upacara mita ibada. Bo moḷoḷukad mita doman in Baḷoi TUHAN in sinilainea kinolompok sin moḷukad kon batúan in bonawang, pinodudui in topotundú i Daud mogogundoi i Allah.

¹⁵Bayongan in topotundú i Daud kon imang mita bo kon intau mita in Lewi soaḷ ontag mita bo soaḷ mita ibanea, dinuduiannea kinotoḷutui.

¹⁶Dá nopaḷutdon in pinogaidan kon baḷoi inta sinomayá i Salomo. Bayongan in oaidan, pinangkoi kon nopoukat in pondasi noidapot in noḷapat in Baḷoi TUHAN, inaidandon nopira.

¹⁷Nopaḷut mako kon tua ki Salomo minayá in Ezion-Geber bo Elot, kotá mita totubuan in kapaḷ kon pintad in Ḷuok in Akaba kon butá in Edom.

¹⁸Ki Datu Hiram in nopoangoi in kapaḷ mita kon inia inta dinia in intau mita in kapaḷ i Hiram noyotakin in intau mita in kapaḷ inta kopongalamandon. Iḷumeag in mosia minayá in butá in Opir noyotakin in intau mita i Salomo bo nogamá kon 15.000 nokilo in buḷawan kon tua bodongka dinia kon i Salomo.