Read Mongondow EZRA 10 Bible Online

EZRA 10 - Mongondow bible

EZRA 10

¹Koyogot in ki Ezra nosambayang koomba-ombaḷ bo nongaku kon dosa kon tayowon in Baḷoi TUHAN, nobayong totok in intau in Israel in namangoi noyosipun, pinomayá ḷoḷaki andeka bobay bo adí mita. Mosia in iḻimibu kon inia poḷat doman nongombaḷ inimibo-ibogbí.

²Onda intua ki Sekhanya ki adí i Yehiel nongkon inanakan i Elam, noguman kon i Ezra, “Kami in binaradosadon kon i TUHAN popisí in nononibuḷoidon kon bangusa ibanea. Umpaka natua táe oyúonpabí in kamang kon Israel.

³Koḻigai in kita mongibot kon i Allah, kon kita in mopoguntunbí kon bayongan in bobay tatua takin adí mita monia. Kami in dumuduibí kon bayongan in tongginamu bo tonggina in intau mita ibanea inta nohoromat kon parenta i Allah. Kami in dumuduibí kon hukum i Allah.

⁴Ikobí in musti mopobayá. Kami in totu-totuubí mobantung kon inimu. Aidaidon intua komintan dapot in moḷapat.”

⁵Dá nomangkoidon nopobayá in oaidannea in ki Ezra. Pinotabánea in imang mita tongguḷu, intau mita in Lewi bo intau mita in Israel ibanea in nongibot kon mosia in mopobayábí in onu inta pinoigum i Sekhanya tatua.

⁶Naonda in mosia nongibot, minayá in ki Ezra nongkon tayowon in Baḷoi TUHAN bo sinumuot kon bonu in tampat pinogutunan i Yohanan ki adí i Elyasib bo nosiug kon[16] tua. Sia in doíbí nongaan andeka nonginum popisí in norobonoḷ totok in ginanea in noraimai kon oaid in intau mita inta iḷumbú tatua.

⁷Onda intua pinotaau-taaudon mako in tobatú parenta kon sinangkup in Yerusalem bo Yohuda kon bayongan in intau inta ain nobui nongkon pinoḷumbúan, sinbá moyosipun kon Yerusalem.

⁸Ki ine in diá mamangoi kon bonu in toḷu nosinggai, daiton gamáan in bayongan kapunyaannea bo sia in diá bidon inanggap agat in intau in Israel. Parenta tatua in sinekeng in itoi mita in rayat.

⁹Naonda in toḷudon nosinggai, kon singgai in doyowa nopuḷú buḷan in siownea, bayongan intau ḷoḷaki inta nogutun kon butá in Yohuda bo Benyamin in namangoi in Yerusalem bo noyosipun kon bosí in Baḷoi TUHAN. Kon dodai intua nonguyan norogot totok. Bayongan in intau nongourotdon popisí in motumping totok bo popisí doman in moponting totok in pinoyodungkuḷan tatua.

¹⁰Onda intua ki Ezra in sinimindog bo nosingog kon i monia. Sia in noguman, “Moiko in binaradosadon bo nodugangdon kon taḷá in Israel popisí in nononibuḷoidon kon bobay mita in bangusa ibanea.

¹¹Tuamai, akudon in dosamu kon i TUHAN, Allah inta sinumba in mogoguyang naton, bo aidaidon onu inta mokosanang kon gina-Nea. Pokoyayúdon kon intau ibanea inta nogutun butá naton bo untundon in ki buḷoimu mita inta nongkon bangusa ibanea tatua.”

¹²Intau mita tatua in notubag noropot, “Duduianbí nami in tongginamu.”

¹³Bo mosia in noguman bui, “Táe inta namangoi in naa in nobayong totok bo uyan in morogot doman totok. Diábí in kami mokotahang in simindog kon ḷuai nanaa. Apa doman pelekara tanaa in diábí kotoimpaḷutan kon bonu in tosinggai andeka doyowa nosinggai, sin nobayongbí totok in kami in noiḷautdon nogaid kon dosa tanaa.

¹⁴Ogoidon in itoi nami in mogutun kon Yerusalem bo mogimpaḷut kon soaḷ tatua. Bo kon batúan in intau kon kotá mita nami, inta kobuḷoi nongkon bobay in bangusa ibanea, in mustibí mamangoi podudui in wakutu inta ain sinantú, moyotakin in itoi mita bo hakim mita in kotánea-kotánea. Tua in aidan sinbá ki TUHAN Allah in diádon tumorú bui kon i naton popisí in pelekara tatua.”

¹⁵Diábí tobatúmai in intau in nopoyaput in simbayow kon tomayá tatua, koḻikudbí in ki Yonatan ki adí i Asael bo ki Yahzeya ki adí i Tikwa, sinongod in intau in Lewi taya dua, inta ki Mesulam bo ki Sabetai.

¹⁶Intau mita iḷumbú inta ain nobui tatua in umuranbí mopobayá in tomayá tatua, tuamai in ki Imang Ezra in nomiḻí[17] kon tongonumai in intau kon sigad in tongguḷu mita in inanakan, bo nomais kon tangoi monia. Kon singgai imitánea buḷan impuḷúnea mosia in nomangkoidon nosidang sin monaridi kon pelekara tatua.

¹⁷Kon bonu in toḷu nobuḷan noiduduimai nopaḷutdon monia pinirikisa in bayongan in ḷoḷaki inta ain nononibuḷoi kon bobay mita nongkon bangusa ibanea.

¹⁸Naa in tangoi in intau mita inta kobuḷoi kon bobay nongkon bangusa ibanea: Imang mita, pinais takin inanakannea: Inanakan i Yesua takin ki utatnea mita, ki adí mita i Yozadak: ki Maaseya, ki Eleazer, ki Yarib bo ki Gedalya.

¹⁹Mosia in nodandi kon monggaatbí kon i buḷoi monia, bo mosia in noposumba in domba koḷakian sin pokuruban kon pongampungan kon dosa monia.

²⁰Inanakan i Imer: ki Hanani bo ki Zebaja.

²¹Inanakan i Harim: ki Maaseya, ki Elia, ki Semaya, ki Yehiel bo ki Uzia.

²²Inanakan i Pasyhur: ki Elyoënai, ki Maaseya, ki Ismael, ki Netaneel, ki Yozabad, bo ki Elasa.

²³Intau mita in Lewi: Ki Yozabad, ki Simei, ki Kelaya (dinonoi doman ki Kelita), ki Petahya, ki Yuda bo ki Eleazer.

²⁴Mododondong mita: Ki Elyasib Moḷoḷukad mita kon bonawang in baḷoi TUHAN: Ki Salum, ki Telem bo ki Uri.

²⁵Intau mita in Israel inta ibanea: Inanakan i Paros: ki Ramya, ki Yezia, ki Malkia, ki Miyamin, ki Eleazar, ki Malkia bo ki Benaya.

²⁶Inanakan i Elam: ki Matanya, ki Zakharia, ki Yehiel, ki Abdi, ki Yeremot bo ki Elia.

²⁷Inanakan i Zatu: ki Elyoënai, ki Elyasib, ki Matanya, ki Yeremot, ki Zabad bo ki Aziza.

²⁸Inanakan i Bebai: ki Yohanan, ki Hananya, ki Zabai bo ki Atlai.

²⁹Inanakan i Bani: ki Mesulam, ki Malukh, ki Adaya, ki Yasub, ki Seal bo ki Yeramot.

³⁰Inanakan i Pahat-Moab: ki Adna, ki Kelal, ki Benaya, ki Maaseya, ki Matanya, ki Bezaleel, ki Binui bo ki Manasye.

³¹Inanakan i Harim: ki Eleazer, ki Yisia, ki Malkia, ki Semaya, ki Simeon, ki Benyamin, ki Malukh bo ki Semarya.

³³Inanakan i Hasum: ki Matnai, ki Matata, ki Zabad, ki Elipelet, ki Yeremai, ki Manasye bo ki Simei.

³⁴Inanakan i Bani: ki Maadai, ki Amram, ki Uel, ki Benaya, ki Bedeya, ki Keluhu, ki Wanya, ki Meremot, ki Elyasib, ki Matanya, ki Matnai, ki Yaasai.

³⁸Inanakan i Binui: ki Simei, ki Selemya, ki Natan, ki Adaya, ki Makhnadbai, ki Sasai, ki Sarai, ki Azareel, ki Selemya, ki Semarya, ki Salum, ki Amarya bo ki Yusup.

⁴³Inanakan i Nebo: Ki Yeiel, ki Matica, ki Zabad, ki Zebina, ki Yadai, ki Yoël bo ki Benaya.

⁴⁴Intau mita tatua komintan nononibuḷoi kon bobay nongkon bangusa ibanea. Dá ki buḷoi mita monia tatua in ginaatdon bo inuntun noyotakin in adí mita monia.