Read Mongondow EZRA 3 Bible Online

EZRA 3 - Mongondow bible

EZRA 3

¹Kon buḷan impitunea, intau mita in Israel nogutundon notantú kon kotánea-kotánea. Kon singgai imitánea buḷan tatua mosia in noyosipun kon Yerusalem,

²bo ki Yesua ki adí i Yozadak takin totakinnea imang mita bo ki Zerubabel ki adí i Sealtiel takin ginaḷumnea, noposindog bui in mezbah i Allah in Israel. Dá notaaudon in mosia motubá kon kuruban kon tudunea, podudui ná inta topotundú mita inta pinais kon bonu in hukum i Musa, mogogundoi i Allah.

³Umpaka[4] mosia in moondok kon intau inta nogutun kon butá tatua, tongá noposindogbí doman in mosia in mezbah tatua kon tampatnea inta muna. Bo nomangkoidon in mosia noposumba in kuruban payongon, kon tungkuḷ in doḷo-doḷom bo ḷoḷabungnea.

⁴Mosia in norame doman kon Singgai Moḷoben in Pondok Daun, podudui in atorang; bo pomuḷoi in singgai moposumba in kuruban inta ain sinantú kon singgai tatua.

⁵Koḻikud intua takin notompia mosia in moposumba in kuruban payongon bo kuruban kon Singgai Moḷoben Buḷan Mobagu, bo kon bayongan in Singgai moḷoben ibanea inta inaidan sin mosumba kon i TUHAN. Mosia in moposumba doman in sosumba ibog tontaní kon i TUHAN.

⁶Umpaka Baḷoi TUHAN diápa pinangkoi pinosindog, táe kon singgai imitánea buḷan impitunea, rayat nomangkoidon notubá kon kuruban kon i TUHAN.

⁷Rayat in nobogoidon in doit sin ponondan kon bas mita in batu bo mogogimok mita kon kayu. Mosia in nokidia doman in kaanon, oinumon bo ḷana in zaitun kon kotá mita in Tirus bo Sidon sin ponoḻiu kon kayu ḷokuyú in Libanon nongkon kotá mita tatua. Kayu tatua in dinia kon Yapo pinongin dagat. Tua komintan inaidan in rayat pinodoyon kon parenta i Kores, datu in Persia.

⁸Dá kon buḷan induanea, kon taong nogindua naonda in intau in Israel nobui kon Yerusalem, nomangkoidon in mosia noposindog bui in Baḷoi TUHAN. Ki Zerubabel, ki Yesua, bo topobayat monia tobangusa, imang mita, intau in Lewi, impoḷok mako in singog, komintan intau inta nokoimontandon iḷumbú, sinumakin nogaid. Intau mita in Lewi inta umur 20 notaong bo namonik sinundú pinoki indoian in oaidan kon poposindogan in Baḷoi TUHAN.

⁹Dá ki Yesua intau in Lewi tatua, takin ki adínea mita bo ki utatnea mita bo ki Kadmiel doman takin ki adínea mita (inanakan i Hodawya)[5] noyotakin noḷukad kon pinogaidan kon Baḷoi TUHAN tatua. Mosia in binantungan in intau mita i Lewi nongkon inanakan i Henadad.

¹⁰Kon dodai in nomangkoidon nogukat kon pondasi in Baḷoi TUHAN, imang mita nogijubah bo kokada-kadai in torompet nogamádon kon tampat monia tontaní. Intau mita in Lewi nongkon inanakan i Asap in sinimindog doman kon tua kokada-kadai in goḷantung mongointok. Mosia in nodayow kon i TUHAN podudui in atorang inta ain sinantú kon tungkuḷ in ki Datu Daud.

¹¹Rayat nopodondong in dodayow kon i TUHAN, sindaḷan nopobui-buimai in dondong inta imbuitnea, nanaa, “Ki TUHAN tua in mopia; bo tabi-Nea kon Israel in mononoi.” Bayongan in rayat dinumudui nonggoḷokap bo nodayow kon i TUHAN, sin pondasi in Baḷoi TUHAN in pinoḻitúdon.

¹²Nobayong in kon sigad in imang mita, intau mita in Lewi bo tongguḷu mita in inanakan inta ain nogoguyang in nokoimontandon nokoontong kon Baḷoi TUHAN inta muna. Naonda in mosia nokoontong kon pinogukatan kon pondasi in Baḷoi TUHAN tanaa, nongombaḷdon totok in mosia. Táe intau mita ibanea inta kon tua in nonggoḷokap sin noḷunganga in gina,

¹³dá diádon motaau poyoposion in goḷokap ḷunganga in gina bo ombaḷ. Moḷangon totok in singognea, dá kodongogan modapot in moyayú.