Read Mongondow EZRA 4 Bible Online

EZRA 4 - Mongondow bible

EZRA 4

¹Habar kon intau mita inta nobui nongkon pinoḷumbúan tatua in koyogotdon moposindog in Baḷoi TUHAN, Allah in Israel, kinodongogandon in musung in intau in Yohuda bo in Benyamin.

²Tuamai in nokipodungkuḷ in mosia kon i Zerubabel bo tongguḷu mita in inanakan, bo noguman, “Ogoipa in kami tumakin mogaid kon Baḷoi TUHAN, sin kami in mosumbabí doman kon i Allah i utat mita, ná doman ki utat mita. Kami in umuranbí moposumba in kuruban kon i-Nia pinangkoi kon ki Esar-Hadon, datu in Asyur nodia mangoi kon inami.”

³Táe ki Zerubabel, ki Yesua bo tongguḷu mita in inanakan tatua in notubag, “Kami in diápabí moparaḷu kon totuḷung i utat mita in moposindog in baḷoi kon i TUHAN Allah nami. Kami in moposindogbí tontaní podudui in parenta i Kores, datu in Persia, kon inami.”

⁴Onda intua intau mita inta ain noonggot in nogutun kon butá tatua nomangkoidon monginggamá kon ibog in intau in Yahudi poḷat doman mopogogondok kon i monia sinbá oaidan tatua pogogaiondon.

⁵Mosia in nobogoi in doit kon intau mita moḷoben kon pomarentaan in Persia sinbá monginggamá kon tomayá in intau mita in Yahudi tatua. Tua komintan umuran nobaḻí kon tungkuḷ in pinomarentaan i Datu Kores nodapot kon pinomarentaan i Datu Darius.[6]

⁶Kon pinomangkoian pinomarentaan i Datu Ahasyweros, musung mita in intau in Yerusalem bo Yohuda in nomais kon surat gugatan.

⁷Ná doman tua in kon pinomarentaan i Artahsasta, kaisar in Persia, tua in nobaḻí bui: ki Bislam, ki Mitredat, ki Tabeel bo yobayat mita monia in nomais kon surat kon i datu. Surat tatua in pinais kon bonu in tosingogon in Aram,[7] bo musti terjemahan kon dodai in bacaan.[8]

⁸Ki Artahsasta in notarima doman kon surat soaḷ Yerusalem. Surat tatua in pinoki dia mangoi i Gubernur Rehum bo i Simsai momomais in propinsi bo binantungan doman in topotakin mita monia, tuata in hakim mita bo bayongan in intau moḷoben kon Persia ibanea inta nongkon Erekh, Babel, bo Sudan kon butá in Elam,

¹⁰bo in bangusa doman ibanea inta inakut i Asnapar Inta Moḷoben bo pinoki pogutunan notantú kon kotá in Samaria bo kon kotá mita ibanea kon bonu in propinsi Eprat Toyopan.

¹¹Nanaa in bonu in surat tatua, “Kon tayowon i Datu Artahsasta, nongkon bobantung i Tuang inta nogutun kon Eprat Toyopan. Salam.

¹²Poigumon mako komangaḻean i Tuang, kon intau in Yahudi inta ain nonaḷámai kon butá mita ibanea kon bonu in dodatuan i Tuang, tanaa in nogutundon notantú kon Yerusalem bo koyogot in noposindog bui in kotá inta moraat bo moibog momarontak tua. Mosia in nomangkoidon noposindog bui in dindingnea mita bo diádon moonggot bo moḷapat in oaidan tatua.

¹³Aka kotá tatua bo koposindogan bui bo dindingnea mita in moḷapatdon posindogon, yo intau mita inta nogutun kon tua in doí bidon moguboḻi kon pajak, bo doit tumuot kon dodatuan in mogaatdon.

¹⁴Kami in koboḻidon kon kopopia in gina i Tuang bo doíbí in mokoontong kon i Tuang porugionmai. Tuamai poigumon nami,

¹⁵sinbá ki Tuang mokitayak in surat mita in mogoguyang mita i Tuang. Nongkon tombonunea kotaauandon i Tuang kon kotá in Yerusalem moibogbí momarontak bo nongkon koḻipodpabí umuran mokoporugimai kon datu mita bo pongawasa in propinsi. Intaunea mita in umuranbí mororiga tongganutan. Tuamai in kotá tatua in irimumudon.

¹⁶Dá, moyakinbí in kami, kon aka kotá tatua posindogon bui bo dindingnea mita in posindogondon, dá ki Tuang in diá bidon bui mokokawasa kon propinsi in Eprat in Toyopan tanaa.”

¹⁷Ki datu in nokidia in tubag tanaa, “Kon i Gubernur Rehum bo kon i Simsai momomais in propinsi bo topotakin monia inta nogutun kon Samaria bo kon kotá mita ibanea kon propinsi Eprat Toyopan.[9] Salam.

¹⁸Surat inta pinoki dia i utat mita in binacadon kon tayowonku pinongin singog nami.

¹⁹Bo pinodudui in parentaku dá sinarididon, bo totuu kon pinangkoipabí kon tungkuḷ intua in Yerusalem umuranbí moḷawang kon kawasa in datu mita bo nobayong in kon sigad in intaunea mita in momomarontak bo mogogaid kon dowawá.

²⁰Nokoimontan doman in datu mita inta motorindog nomarenta kon tua bo nongawasa kon sinangkup in propinsi Eprat Toyopan bo noigum kon pajak bo iba.

²¹Tuamai, poḷuaidon in parenta mopogogai in oaidan in intau mita tatua, sinbá kotá tatua in diádon posindogon bui modapot in akuoi mobogoi bui in parenta ibanea.

²²Ḷagidon aidan in parentaku tatua sinbá diádon modugang in karugianku!”

²³Naonda in surat i Artahsasta tatua binaca kon i Rehum, kon i Simsai bo kon topotakin monia, ḷagidon nobuat in mosia minayá in Yerusalem bo nomakisa kon intau in Yahudi nopogogai in oaidan moposindog bui in kotá tatua.

²⁴Pinogaidan kon Baḷoi TUHAN in pinogogaidon bo diádon iningguputan nodapot kon taong nogindua kon pinomarentaan i Darius, datu in Persia.