Read Mongondow EZRA 5 Bible Online

EZRA 5 - Mongondow bible

EZRA 5

¹Kon dodai intua doyowa in nabi, inta ki Hagai bo ki Zakharia ki adí i Ido, nomangkoidon nosingog pinodoyon kon tangoi i Allah in Israel kon intau in Yahudi inta nogutun kon Yohuda bo kon Yerusalem.

²Nokodongogmai kon koyow in nabi doyowa tatua, ki Zerubabel ki adí i Sealtiel bo ki Yesua ki adí i Yozadak ḷagidon nomangkoi bui noposindog in Baḷoi TUHAN kon Yerusalem, binantungan in nabi doyowa tatua.

³Táe ki Tatnai, gubernur in propinsi Eprat Toyopan, takin i Syetar-Boznai in ḷagi namangoi kon Yerusalem bo noḻibó kon intau mita in Yahudi, “Ki ine in nopotabá kon i monimu moposindog bo monompakakat kon Baḷoi pooibadaan tanaa?”

⁴Mosia[10] in moḻibó doman kon tangoi in bayongan intau inta nobantung noposindog in Baḷoi TUHAN tatua.

⁵Táe ki Allah in noindoi mako bo nogoḻiung kon itoi mita in Yahudi tatua, dá intau mita moḷoben pomarenta in Persia nonantúdon kon diádon mopogogai kon i monia kon dodai in mosia diápa mokidia in surat kon i Darius bo motarima kon tubagnea.

⁶Naa in lapuran inta pinoki dia monia kon i datu,

⁷“Kon tayowon i Datu Darius. Poigumon mako ki Tuang momarenta takin pia-pia mako!

⁸Poigumon mako komangaḻean i Tuang, kon kami in minayádon kon propinsi in Yohuda bo nokoontong kon Baḷoi TUHAN, Allah Inta Moḷoben, in koyogotdon posindogon bui nomaké in batu mita moḷoben bo dindingnea mita inta inaipan in kayu. Oaidan tatua inaidan takin notaridi totok bo minayá notompia.

⁹Onda intua iḻibó nami kon itoi mita in bangusa tatua, ki ine inta ain nobogoi in kasampatan kon in monia moposindog bui in Baḷoi Pooibadaan tatua bo nonompakakat.

¹⁰Iḻibó domandon nami in tangoi mita monia sinbá motaau mopotaau kon i Tuang ki inedon mako in nobaḻí tongguḷu kon oaidan tatua.

¹¹Mosia in notubag, ‘Kami naa in mogogundoi i Allah mongongawasa kon dunia naa. Kami in koyogot in moposindog in Baḷoi TUHAN inta pinosindog bo sinompakakatan kon puḷúan in taong inta noitaḻibdon i datu tobatú in Israel inta moḷoben.

¹²Táe popisí in mogoguyang nami ain nokopomuká kon torú i Allah mongongawasa kon soroga, dá Sia nobogoi kon i monia kon bonu in kawasa i Nebukadnezar, datu in Babel nongkon buí in Kasdim. Sia in norimumud kon Baḷoi tatua bo nogakut kon bangusa nami pinobayá in Babel.

¹³Onda intua ki Kores nobaḻí datu in Babel bo kon taong imitánea kon pinomarentaannea, sia in nopoḷuai in parenta kon moposindog bui in Baḷoi TUHAN tatua.

¹⁴Nodapotbí in pinobuineadon bui in pakakat mita buḷawan bo saḷaka inta pinaké kon bonu in Baḷoi TUHAN bo inta ginamá nongkon Yerusalem i Nebukadnezar bo inukat kon bonu in kuil kon Babel. Pakakat mita tatua in inogoi bui i Datu Kores kon intau inta ki Sesbazar, inta ain dinuínea nobaḻí gubernur in Yohuda.

¹⁵Ki Datu in nopotabá kon inia nogamá kon pakakat mita tatua bo nopobui intua kon Baḷoi TUHAN kon Yerusalem, bo noposindog bui in Baḷoi tatua.

¹⁶Bo namangoidon in ki Sesbazar kon Yerusalem bo nogukat kon pondasi in Baḷoi TUHAN tatua. Pinangkoi kon tua nodapot in tanaa pinogaidan kon tua umuranbí minayá, táe diápa doman nopaḷut.’

¹⁷Aka ogoi i Tuang, kami in mopoigum sinbá monaridi kon bonu in surat mita in dodatuan in Babel. Dá kotaauandon mongo totuu kon oyúon degá in parenta i Datu Kores moposindog bui in Baḷoi TUHAN kon Yerusalem tanaa. Onda intua kami mopoigum in habar kon soaḷ bontow in singog i Tuang kon soaḷ in pelekara tatua.”