Read Mongondow EZRA 7 Bible Online

EZRA 7 - Mongondow bible

EZRA 7

¹Tongonumai notaong noiduduimai kon tua, kon dodai in ki Artahsasta nomarenta nobaḻí datu in Persia, oyúon in ḷoḷaki tobatú tangoinea in ki Ezra, nongkon buí i Imang Moḷoben ki Harun. Pipidan in pinomuíannea nongkon ḻimonag bo pinoonik in noiduduimai naa: Ki Ezra Ki Seraya Ki Azarya Ki Hilkia

²Ki Salum Ki Zadok Ki Ahitub

³Ki Amarya Ki Azarya Ki Merayot

⁴Ki Zerahya Ki Uzi Ki Buki

⁵Ki Abisua Ki Pinehas Ki Eleazar Ki Imang Moḷoben ki Harun

⁶Ki Ezra in intau tobatú inta nosikoḷa bo nobayong in kinotaauannea in soaḷ Hukum inta inogoi i TUHAN, Allah in Israel kon i Musa. Popisí in ki Ezra binarakatan i TUHAN Allahnea, dá ki datu in nobogoi kon inia in bayongan inta pinoigumnea. Kon taong impitunea kon pinomarentaan i Datu Artahsasta, nobuatdon in ki Ezra nongkon Babel bo minayá in Yerusalem noyotakin in topaanan in intau Israel inta imang mita, intau in Lewi, mododondong bo moḷoḷukad kon ngara kon Baḷoi TUHAN, bo mogogaid mita.

⁸Mosia in nonaḷámai kon Babel kon singgai imitánea kon buḷan doman imitánea bo pinodoyon kon totuḷung i Allah, nodapotdon in mosia kon Yerusalem kon singgai imitánea buḷan in ḻimanea.

¹⁰Ki Ezra in totokdon in nonaridi kon Hukum i TUHAN, sin aidan bo motundú kon bayongan in inta sinantú bo atorangnea kon bangusa in Israel.

¹¹Naa in surat inta inogoi i Datu Artahsasta kon i Ezra, imang tobatú bo intau inta nonotaau totok in Hukum,

¹²“Nongkon i Datu Artahsasta ogoi kon i Imang Ezra, intau inta nonotaau totok in Hukum i Allah inta nongawasa kon soroga.[12]

¹³Akuoi in nomarenta kon bayongan in imang, intau in Lewi bo intau mita in Israel ibanea inta kon sinangkup in dodatuan ku, inta moibog mayá in Yerusalem, in ogoibí mayá moyotakin i Utat.

¹⁴Sin akuoi takin mononongginaku taya pitu in nopotabá kon i Utat mayá in Yerusalem bo Yohuda sin monaridi kon kaadaannea bo moindoi mongo Hukum i Allah inta pinoki kadai kon i Utat, in totu-totuu dinuduian.

¹⁵Akuoi takin mononongginaku in moibog moposumba in buḷawan bo saḷaka kon i Allah in Israel, Allah inta nogutun kon Yerusalem. Diadon in sosumba nami tatua.

¹⁶Diadon doman in bayongan buḷawan bo saḷaka inta sinipun i Utat kon sinangkup in Babel bo bayongan in sumbangan in bangusa in Israel takin imangnea mita sin ogoi kon Baḷoi TUHAN Allah monia kon Yerusalem.

¹⁷Pakédon kopia in doit tatua sin potaḷui kon sapi koḷakian, domba koḷakian, ki adí in domba, gandum bo anggur. Posumba intua komintan kon tudu in mezbah Baḷoi TUHAN kon Yerusalem.

¹⁸Saḷaka bo buḷawan inta ki agatnea in motaaubí pakéon i Utat kon kaparaḷuan i Utat bo totakin i Utat mita podudui in ibog i Allah i Utat.

¹⁹Ogoidon kon i Allah kon Yerusalem in bayongan pakakat inta inogoi kon i Utat sin pakéon kon ibada kon Baḷoi Allah.

²⁰Bo bayongan in kaparaḷuan ibanea inta pakéon kon Baḷoi TUHAN, motaaubí in igumon i Utat nongkon kas in dodatuan.

²¹Kon i monia inta nokadai kon kas in dodatuan kon propinsi Eprat Toyopan akuoi in momarenta sinbá onu kabí in igumon i Imang Ezra, intau inta nonotaau totok in Hukum i Allah inta nongawasa kon soroga, yo ḷagi ogoi kon inia,

²²modapot in ná tanaa in kobayongnea: saḷaka modapot in 3.400 nokilo, gandum in modapot in 10.000 nokilo, anggur in modapot in 2.000 noliter, ḷana in zaitun modapot in 2.000 noliter, bo simuton kinobobayongbí inta paraḷuon.

²³Aidan kopiaan totok in moposadia kon bayongan inta inigum i Allah inta nongawasa kon soroga inta pakéon kon Baḷoi-Nea sinbá diá in Sia tumorú kon inakó andeka kon intau mita inta noigum moiduduimai kon inakó.

²⁴Moiko in diábí motaau in moigum kon pajak nongkon imang mita, intau in Lewi, mododondong, moḷoḷukad kon bonawang, mogogaid, andeka ki inekabí inta oyúon in oaidannea kon Baḷoi TUHAN.

²⁵Ki Utat ki Ezra, pakédon in pandoi inta ain inogoi i Allah kon i Utat, bo duídon in itoi mita bo hakim mita sin momarenta kon bayongan in intau kon propinsi Eprat Toyopan inta nobiag podudui in Hukum i Allah i Utat. Ki Utat in mustibí motundú kon Hukum tatua kon bayongan in intau inta diápa nonotaau kon tua.

²⁶Pomuḷoi in intau inta doí dumudui kon Hukum mita i Allah i Utat, andeka hukum mita in dodatuan, mustibí ḷagi hukumon matoi andeka ḷumbúon, andeka gamáan in kapunyaannea, andeka bonuon kon ponjara.”

²⁷Bo ki Ezra in noguman, “Dayowdon in ki TUHAN, Allah inta sinumba in mogoguyang naton! Sia in nopogonúdon kon gina i datu dá ki datu in noibogdon noindoi totok kon Baḷoi TUHAN kon Yerusalem.

²⁸Pinodoyon kon totuḷung i Allah akuoi in kinosanang i datu, in monononggina bo pojabatnea mita inta nongawasa tatua; ki TUHAN Allahku ain nobogoi in ibog moḷoben kon inakó dá akuoi in nokotongganutdon kon nobayong totok in tongguḷu in inanakan Israel sin mobui kon Yerusalem.”