Read Mongondow EZRA 8 Bible Online

EZRA 8 - Mongondow bible

EZRA 8

¹Naa in tangoi in tongguḷu mita in inanakan inta iḷumbú kon Babel bo nobui noyotakinku, ki Ezra, minayá in Yerusalem kon dodai in ki Artahsasta nomarenta nobaḻí datu:

²Ki Gersom, nongkon inanakan i Pinehas Ki Daniel, nongkon inanakan i Itamar Ki Hatus ki adí i Sekhanya, nongkon inanakan i Daud Ki Zakharia, nongkon inanakan i Paros, noyotakin in 150 in ḷoḷaki nongkon inanakannea (oyúonbí in pinais soaḷ pinomuían monia) Ki Elyoënai ki adí i Zerahya, nongkon inanakan i Pahat-Moab, noyotakin in 200 in ḷoḷaki Ki Sekhanya ki adí i Yahaziel, nongkon inanakan i Zatu,[13] noyotakin in 300 in ḷoḷaki Ki Ebed ki adí i Yonatan, nongkon inanakan i Adin, noyotakin in 50 in ḷoḷaki Ki Yesaya ki adí i Atalya, nongkon inanakan i Elam, noyotakin in 70 in ḷoḷaki Ki Zebaja ki adí i Mikhael, nongkon inanakan i Sepaca, noyotakin in 80 in ḷoḷaki Ki Obaja ki adí i Yehiel, nongkon inanakan i Yoab, noyotakin in 218 in ḷoḷaki Ki Selomit ki adí i Yosipia, nongkon inanakan i Bani, [14] noyotakin in 160 in ḷoḷaki Ki Zakharia ki adí i Bebai, nongkon inanakan i Bebai, noyotakin in 28 in ḷoḷaki Ki Yohanan ki adí(...)

¹⁵Bayongan kolompó tatua in sinipun kon ongkag inta moiḻig ná kotá in Ahawa bo kami in nononḷoḷaigan kon tua toḷu nosinggai. Naonda in pinirikisaku, noniata magí yo oyúonbí in tongonumai in imang kon sigad monia, táe diá tobatúmai in nongkon suku in Lewi.

¹⁶Bo inoiníku in intau taya siow kon sigad in itoi mita, inta ki Eleazer, ki Ariel, ki Semaya, ki Elnatan, ki Yarib, ki Elnatan, ki Natan, ki Zakharia, ki Mesulam bo doyowa doman in guru, inta ki Yoyarib bo ki Elnatan.

¹⁷Onda intua pinotabáku in mosia minayá kon i Ido, tongguḷu in intau mita kon Kasipya, takin oigum sinbá ki Ido bo topotakinnea inta mogogaid kon Baḷoi TUHAN, in mopotabádon mangoi kon inami in intau mita inta mogundoi kon Baḷoi TUHAN.

¹⁸Popisí in kopopia in gina i Allah, mosia in nopotabá mangoi kon inami in ki Serebya, intau in Lewi tobatú inta mopandoi nongkon inanakan i Mahli. Noyotakinnea in ki adí mita doman i utatnea mita, kobayongnea in 18 intau.[15]

¹⁹Ki Hasabya bo ki Yesaya nongkon inanakan i Merari, takin doyowa nopuḷú in intau in ginaḷum monia, pinotabá doman namangoi kon inami.

²⁰Koḻikud intua oyúon doman in 220 in intau inta mogogundoi kon Baḷoi TUHAN inta kinopaisandon in tangoi monia. Mogoguyang monia pinangkoi nongkon koḻipod in sinantúdon i Datu Daud bo intau mita moḷoben kon dodatuan sin mobantung kon intau in Lewi.

²¹Bo kon bingkí in Ongkag in Ahawa tatua akuoi nopotaau kon mosia komintan in mustibí mopuasa bo tumonsiup kon tayowon i Allah. Kami in nosambayang sinbá ki Allah in nokapit kon inami kon binayáan tatua, bo mogoḻiung kon inami, kon i adí mita nami bo bayongan in kapunyaan nami.

²²Akuoi in mobangkaḷ moigum kon i datu in tontara tumotakoi kon kabaḷo sin moḷukad kon inami nongkon musung kon binayáan. Sin akuoi in nogumandon kon inia, kon ki Allah nami in momarakat kon bayongan in intau inta mogundoi kon i-Nia bo mondoí poḷat mohukum kon intau inta diá mosatia kon i-Nia.

²³Dá nopuasadon in kami bo nosambayang kon i Allah nopoigum sinbá ḷukadan bo inindogogan-Nea doman in sambayang nami.

²⁴Kon sigad in imang mita inta noiḷontú piniḻíku in 12 in intau: ki Serebya, ki Hasabya, bo 10 in intau ibanea.

²⁵Onda intua sinimbangku kon i monia in saḷaka, buḷawan bo pakakat mita inta ain pinosumba i datu, in monononggina mita bo intau mita moḷoben bo in bayongan in intau in Israel, sin pakéon kon bonu in Baḷoi TUHAN. Bayongan intua inogoiku kon imang mita tatua.

²⁶Naa inta inogoi mita tatua: saḷaka — 22 noton 100 in pakakat mita saḷaka — 70 nokilo buḷawan — 3.400 nokilo 20 in mangko buḷawan — 8.400 gram 2 in mangko bitú inta totok in mogaga, inta notongkai in boḻinea in mangko buḷawan.

²⁸Akuoi in noguman kon imang mita tatua, “Moiko in sinondídon sin mogaid kon bonu in Baḷoi TUHAN, Allah inta sinumba in mogoguyang naton, natua doman in pakakat saḷaka bo buḷawan inta pinosumba kon i TUHAN in sinantú bidon kon tongá kon i TUHAN.

²⁹Ḷukadai in pakakat mita tatua kopiaan modapot in moiyaput kon Baḷoi TUHAN. Moiyaputmai kon tua, moiko in mustibí monimbang kon pakakat mita tatua bo ogoi kon imang mita itoi bo itoi mita in Lewi, takin itoi mita in intau in Israel kon Yerusalem.”

³⁰Bo imang mita bo intau mita in Lewi tatua in notarima kon saḷaka, buḷawan bo pakakat mita tatua sin diaan kon Baḷoi TUHAN kon Yerusalem.

³¹Kon singgai impuḷú bo doyowánea buḷan imitánea, kami in nonaḷámai kon Ongkag in Ahawa bo minayá in Yerusalem. Kon binayáan tatua kami in iḷukadan i Allah nami nongkon musung mita inta monubu bo moḷamboi.

³²Naonda in noiyaput kon Yerusalem, nogogai in kami toḷu nosinggai in koonggotnea.

³³Onda intua kon singgai inggopatnea minayádon in kami kon Baḷoi TUHAN, bo nonimbang kon saḷaka, buḷawan bo pakakat mita tatua. Nopaḷut mako kon tua inogoi nami kon i Imang Meremot ki adí i Uria takin inindoian mako i Eleazar ki adí i Pinehas bo intau in Lewi doyowa, tuata in ki Yozabad ki adí i Yesua bo ki Noaja ki adí i Binui.

³⁴Bayongan in pakakat mita tatua iniap bo sinimbang, bodongka pinais kinotaḻit.

³⁵Kon singgai tatua doman, bayongan intau inta ain nobui nongkon pinoḷumbúan tatua, noposumba in kuruban payongon kon i Allah in Israel. Mosia in noposumba in 12 in sapi koḷakian kon kopontingan in bayongan in Israel, 96 in domba koḷakian bo 77 in ki adí in domba; koḻikud intua 12 in bembé sin pokuruban kon pongampungan kon dosa kon i monia tontaní. Bayongan in biag tatua sinubá nobaḻí kuruban kon i TUHAN.

³⁶Bo surat inta inogoi i datu kon i monia, pinotaau kon gubernur mita bo kon pojabat in propinsi Eprat Toyopan. Dá pojabat mita tatua in nobogoi in totuḷung kon rayat sinbá mosia in motaaudon umuran moibada kon i TUHAN.