Read Mongondow NEHEMIA 1 Bible Online

NEHEMIA 1 - Mongondow bible

NEHEMIA 1

¹Naa in lapuran i Nehemia ki adí i Hakhalya soaḷ inta inaidannea mita. Kon buḷan Kislew kon taong indoyowa nopuḷú kon pinomarentaan i Artahsasta saḷaku datu in Persia, akuoi, ki Nehemia, in kon Susan, ibukotá in dodatuan.

²Kon tungkuḷ intua, ki utatku ki Hanani, namangoi nongkon Yohuda noyotakin in tongonumai in intau. Bo iḻibóku kon i monia in kaadaan kon Yerusalem bo intau mita in Yahudi inta ain nobui nongkon pinoḷumbúan kon[1] Babel.

³Inouman monia kon intau mita inta nokoimontandon iḷumbú inta ain nobui kon butá[2] tatua, tanaa in nobiag nororiga bo siningkuḻe in bangusa mita ibanea inta kon diugneamai. Apadoman, dinding mita in kotá in Yerusalem norimumudpa posiyayit bo bonawangnea mita in diápa sinompia pinangkoipa kon sinurub mako kon tungkuḷ intua.

⁴Nokodongogmai kon habar tatua, iḻimitú in akuoi bo nongombaḷ. Tongonumai nosinggai norobonoḷ totok in ginaku. Akuoi in umuran mopuasa poḷat mosambayang kon i Allah,

⁵“Oo TUHAN Allah inta nongawasa kon soroga. Iko in Allah Inta Moḷoben bo kami in tumayow kon ini-Mu takin moondok totok. Iko in tantúbí mosatia bo nokadai kon dandi-Mu kon intau mita inta motabi kon ini-Mu bo motoindudui kon parenta-Mu.

⁶Indoiaipa in akuoi o TUHAN, bo indongogaipa in sambayang inta pinoyaputku kon ini-Mu singgai doḷom sin kopontingan in umat Israel, mogogundoi-Mu tua. Akuonku kon kami, umat in Israel, ain binaradosa; akuoi bo mogoguyangku mita ain binaradosa doman.

⁷Kami in nokoyaatdon kon gina-Mu bo iḻimimpatdon kon parenta-Mu mita. Kami in diá notoindudui kon hukum mita inta inogoi-Mu kon inami pinongin i Musa, mogogundoi-Mu tua.

⁸Oo TUHAN, toropdon in tosingogon-Mu mita inta siningog i Musa pinodoyon kon parenta-Mu, kon aka kami, umat in Israel, diá mosatia kon ini-Mu, kami in porariton-Mu kon sigad in bangusa mita ibanea.

⁹Táe aka kami in bui mobui mangoi kon ini-Mu bo dumudui bui kon parenta-Mu mita, dá kami inta ain noirarit tatua in sipunon-Mubí bui, umpakabí kami in kon popod mita in butá. Bo kami in pobuion-Mubí bui kon tampat inta ain piniḻí-Mu mobaḻí tampat pooibadaan kon ini-Mu.

¹⁰TUHAN, kami naa in mogogundoi-Mu mita, umat-Mu tontaní inta pinosaḷamat-Mu pinongin kawasa bo ropot-Mu inta motoyang.

¹¹Indongogaipa in sambayangku bo sambayang in bayongan mogogundoi-Mu mita ibanea, inta moibog mohoromat kon ini-Mu. Tuḷungaipa sinbá kon singgai in naa mogogundoi-Mu in mokouḻídon kon totabi nongkon i datu.” Kon dodai intua akuoi in mopoposadia in oinumon i datu.