Read Mongondow NEHEMIA 10 Bible Online

NEHEMIA 10 - Mongondow bible

NEHEMIA 10

¹Intau inta dungkuḷ totok notekeng in ki Gubernur Nehemia ki adí i Hakhalya. Noiduduimai in ki Zedekia. Nopaḷut mako kon tua intau mita inta noiduduimai naa in notekeng doman:

²Imang mita Ki Seraya, ki Azarya, ki Yeremia, Ki Pasyhur, ki Amarya, ki Malkia, Ki Hatus, ki Sebanya, ki Malukh, Ki Harim, ki Meremot, ki Obaja, Ki Daniel, ki Gineton, ki Barukh, Ki Mesulam, ki Abia, ki Miyamin, Ki Maazya, ki Bilgai bo ki Semaya.

⁹Intau mita in Lewi Ki Yesua ki adí i Azanya, Ki Binui buí in inanakan in Henadad, Ki Kadmiel, ki Sebanya, ki Hodia, Ki Kelita, ki Pelaya, ki Hanan, Ki Mikha, ki Rehob, ki Hasabya, ki Zakur, ki Serebya, ki Sebanya, ki Hodia, ki Bani bo ki Beninu.

¹⁴Itoi mita in bangusa Ki Paros, ki Pahat-Moab, Ki Elam, ki Zatu, ki Bani, Ki Buni, ki Azgad, ki Bebai, Ki Adonia, ki Bigwai, ki Adin, Ki Ater, ki Hizkia, ki Azur, Ki Hodia, ki Hasum, ki Bezai, Ki Harip, ki Anatot, ki Nebai, Ki Magpias, ki Mesulam, ki Hezir, Ki Mesezabeel, ki Zadok, ki Yadua, Ki Pelaca, ki Hanan, ki Anaya, Ki Hosea, ki Hananya, ki Hasub, Ki Halohes, ki Pilha, ki Sobek, Ki Rehum, ki Hasabna, ki Maaseya, Ki Ahia, ki Hanan, ki Anan, Ki Malukh, ki Harim bo ki Baana.

²⁸Kami, rayat in Israel, imang mita intau mita in Lewi, moḷoḷukad mita kon ngara in Baḷoi TUHAN, mogogogitog in musik bo mogogaid mita kon bonu in Baḷoi TUHAN, bo buḷoi adí nami inta tugatdon in umur bo momangaḻédon bo intau mita inta motoindudui kon hukum i Allah bo inta ain sinumondí kon intau ango-angoi inta nogutun kon butá nami.

²⁹Kami komintan in dinumugangdon takin itoi mita nami bo nongibot kon mobiag podudui in hukum i Allah inta ain inogoi-Nea pinongin i Musa mogogundoi-Nea. Igumon mako ki Allah mongutuk kon inami aka diá intompodan nami in dodandian nami tanaa. Kami in mongibot kon dumuduibí kon bayongan in parenta, hukum bo atorang i TUHAN, Allah nami.

³⁰Kami in nongibot kon diábí mobuḷoi takin bangusa mita ibanea inta nogutun kon butá nami.

³¹Aka oyúon in bangusa ibanea in mopotaḷui in gandum andeka onuka kon inami kon singgai in Sabat andeka singgai motusi ibanea, yo diábí intua taḷuion nami. Kon pomuḷoi in taong impitunea, diábí tonggobaan nami in gobá bo diábí moigum kon boḻi.

³²Pomuḷoi in taong kami kon batúannea in moposumbang in ḻima nogram in saḷaka sin pobantung pakéon kon Baḷoi TUHAN.

³³Kami in moposadiabí in bayongan kaparaḷuan pakéon kon ibada kon Baḷoi TUHAN, tuata: roti oḷudon, sosumba in gandum muḷoi in singgai, biag inta pakéon kuruban payongon muḷoi in singgai, sosumba motusi ibanea, kuruban mita pongampung kon dosa mita in Israel, bo bayongan inta paraḷuon pakéon kon Baḷoi TUHAN.

³⁴Kami, rayat, imang mita bo intau mita in Lewi, in mopogonik in undi muḷoi in taong sin monantú kon inanakan táonda in musti moposadia kon kayu pondungú kon kuruban mita sosumba kon i TUHAN Allah nami, podudui in atorang in hukum.

³⁵Pomuḷoi in taong modia in kami pobayá in Baḷoi TUHAN in bungai in gandum inta dungkuḷ totok bo ayop mita inta munamai totok moḷutú kon pangkoi in ayop mita nami.

³⁶Kami in modiabí kon adí nami ḷoḷaki inta guya-guyang kon imang mita inta kon Baḷoi TUHAN sin posarakan kon i Allah, podudui in atorang in hukum. Kami in mobogoi doman in ki adí in sapi, ki adí in domba andeka ki adí in bembé nami inta dungkuḷ totok pinononggadí.

³⁷Kami in mogatod doman kon imang mita kon Baḷoi TUHAN in pomiaan kukis nongkon gandum inta muna-munamai kinoyut pomuḷoi in taong, bo sosumba doman mita ibanea ná anggur, ḷana in zaitun bo bayongan in ayop. Sosumba mopuḷú noporosen nongkon bungai in boyó kon gobá nami in diaan nami kon intau mita in Lewi inta nogamá kon sosumba mita mopuḷú noporosen kon kotá mita inta monononggobá.

³⁸Táe imang tobatú buí i Harun in mustibí kotaki-takin in intau mita in Lewi tatua aka mogamá in mosia kon sosumba mita tatua. Bo mopuḷú noporosen nongkon bayongan in sosumba tatua in musti diaan in intau mita in Lewi tatua kon gopot mita inta pototagúan kon kaanon mita kon Baḷoi TUHAN.

³⁹Rayat in Israel bo intau mita in Lewi in mustibí modia kon sumbangan inta motantú ná gandum, anggur bo ḷana in zaitun kon gopot mita inta pinotagúan kon kokaanon mita inta nobaḻí pototagúan mita kon pakakat mita in Baḷoi TUHAN. Kon tua doman in pogogutunan in imang mita inta koyogot in mopobayá in oaidan monia, moḷoḷukad mita kon ngara in Baḷoi TUHAN bo mododondong mita. Kami in diábí ḷumaḷoi in monompia kon Baḷoi TUHAN nami.